Gudnius abaotem Jisas Kraes wea Jon hemi raetem 10 - Pijin Bible

Tokpiksa abaotem sipsip an man fo lukaftarem olketa

¹ Jisas hemi sei moa, “Mi talem yufala tru samting nao, man hu hemi no kam insaet long barava geit blong fens blong sipsip bat hemi klaem kam long deferen ples, hemi man fo stil an man fo spoelem olketa sipsip ya.

² Bat man hu hemi go stret insaet long geit ya, hem nao hemi barava man fo lukaftarem olketa sipsip ya.

³ An disfala sekiuriti blong geit hemi save openem geit fo hem ya, an olketa sipsip i heremsave toktok blong hem. Man ya hemi save kolem nem blong evri sipsip blong hem, an hemi save lidim olketa fo goaot.

⁴ Taem hemi mekem olketa sipsip blong hem fo goaot finis, hemi save wakabaot go fastaem long olketa an olketa save falom hem nao, bikos olketa heremsave toktok blong hem.

⁵ Sapos deferen man hemi kam, bae olketa no save falom hem ya. Bae olketa ranawe from hem nomoa, bikos olketa nating heremsave toktok blong hem.”

⁶ Jisas hemi talem disfala tokpiksa long olketa, bat olketa nating save long wanem nao hemi trae fo minim long disfala toktok ya.

Jisas hemi man fo lukaftarem sipsip

⁷ So Jisas hemi sei moa long olketa, “Mi talem yufala tru samting nao, mi nao mi olsem geit blong sipsip.

⁸ Evriwan wea olketa kam fastaem long mi, olketa i man fo stil an fo spoelem olketa sipsip ya, bat olketa sipsip olketa no heresave long olketa.

⁹ Mi nao mi olsem geit blong sipsip. Eniwan hu hemi kam long mi, bae God hemi sevem hem. An bae hemi olsem sipsip wea hemi kam insaet fo stap long sef ples an hemi goaot moa fo faendem kaikai.

¹⁰ Man hu hemi stil, hemi kam nomoa fo stilim olketa sipsip an fo spoelem olketa an fo kilim olketa dae. Bat mi ya, mi kam fo mekem olketa garem tru laef, an disfala laef hemi fulap long evri gud samting.

¹¹ “Barava man fo lukaftarem sipsip hemi wiling fo dae fo sevem olketa sipsip blong hem. Mi nao disfala barava man fo lukaftarem sipsip.

¹² Bat man wea olketa haerem hem nomoa fo kam lukaftarem olketa sipsip wea hemi no onam olketa, hemi save ranawe nomoa from olketa taem hemi lukim eni wael dog i kam. So wael dog hemi save kam kasholem samfala, an olketa narawan save ranawe go olobaot nao.

¹³ Diskaen man hemi save ranawe from olketa sipsip bikos hemi waka fo seleni nomoa ya, an hemi no save wari long olketa sipsip.

^14-15 Mi nao mi barava man fo lukaftarem sipsip, an mi wiling fo dae fo sevem olketa sipsip blong mi. Olketa savegud long mi an mi savegud long olketa, long sem wei olsem Dadi blong mi hemi savegud long mi an mi savegud long hem.

¹⁶ Mi garem samfala sipsip tu wea olketa no stap yet insaet long disfala fens. Bae mi mas tekem olketa fo kam insaet tu, an bae olketa heremsave toktok blong mi. Long wei ya nao, bae olketa evri sipsip olketa stap tugeta long wanfala seksin nomoa, an wanfala man nomoa hemi lukaftarem olketa.

¹⁷ “Dadi blong mi hemi lavem mi tumas ya, bikos mi wiling fo dae, mekem mi save laefbaek moa.

¹⁸ No eniwan save kilim mi dae sapos mi no letem, bat distaem mi wiling nomoa fo dae. Mi nomoa mi garem paoa fo letem mi seleva fo dae, an mi garem paoa fo mi laefbaek moa. Hem nao wanem Dadi blong mi hemi talem mi fo duim.”

¹⁹ Long taem ya moa, olketa Jiu olketa no wanmaen abaotem toktok blong Jisas.

²⁰ Plande long olketa sei, “!Disfala man ya, wanfala devol nao hemi stap long hem an hed blong hem hemi krangge nao! !Yufala mas no lisin long hem!”

²¹ Bat samfala long olketa sei, “!Man hu devol hemi stap long hem hemi no save toktok olsem! !An devol hemi no save mekem ae blong olketa pipol hu i blaen fo save lukluk moa!”

Olketa Jiu trae fo kilim Jisas dae

²² Nao long Jerusalem hemi kasem taem blong olketa Bikde blong Tambuhaos. Long taem ya hemi kol taem ya,

²³ an Jisas hemi wakabaot go nomoa insaet long Tambuhaos long disfala eria wea olketa kolem “Varanda blong Solomon.”

²⁴ An olketa Jiu olketa hipap kam raonem hem, an olketa talem hem olsem, “!Man, yu mekem mifala fo weit longtaem tumas nao! Sapos yu nao disfala Mesaea, yu mas talem stret long mifala distaem nao.”

²⁵ Nao Jisas hemi ansarem olketa olsem, “Mi talem long yufala finis nao, bat yufala nating wande fo bilivim mi nomoa. Olketa bikfala waka wea mi duim long nem blong Dadi blong mi, olketa nao somaot hu nao mi.

²⁶ Bat yufala nating wande fo biliv nomoa, bikos yufala i no olketa sipsip blong mi.

²⁷ Olketa sipsip blong mi, olketa heremsave toktok blong mi an olketa go bihaen long mi. Mi save long olketa

²⁸ an mi givim tru laef wea hemi no save finis long olketa. Bae olketa no save dae, an bae no eniwan i save pulumaot olketa from han blong mi.

²⁹ Olketa ya wea Dadi blong mi hemi givim long mi, olketa nao i bikfala winim evrisamting. An no eniwan save pulumaot olketa from han blong Dadi blong mi.

³⁰ Mitufala Dadi blong mi, mitufala wanfala nomoa.”

³¹ Long taem ya moa, olketa Jiu ya i pikimap ston nao fo sutim Jisas dae long hem.

³² Nao Jisas hemi askem olketa olsem, “Plande gudfala waka nao Dadi ya hemi talem mi fo duim, an yufala bin lukim taem mi duim olketa. ?Nao watkaen waka nao long olketa ya yufala wande fo sutim mi dae long hem?”

³³ Olketa ansarem hem olsem, “Mifala no laek fo sutim yu dae from eni gudfala waka wea yu duim. Bat yu tokspoelem God ya, an from diskaen wei nao mifala wande fo sutim yu dae. !Yu man nomoa ya, bat yu talem yu nao God!”

³⁴ Jisas hemi ansarem olketa olsem, “Olketa raetem insaet long Lo blong yufala wea God hemi tok olsem, ‘Yufala olsem God ya.’

³⁵ So olketa pipol wea God hemi toktok go long olketa ya, hemi sei olketa olsem hem nao, an yumi save dat enisamting Buktambu hemi talem, hemi tru olowe nao.

³⁶ ?So waswe nao yufala sei mi tokspoelem God taem mi sei mi San blong hem nomoa? Bikos mi ya, Dadi blong mi hemi siusim mi an hemi sendem mi kam long disfala wol nao ya.

³⁷ Sapos mi no duim olketa waka wea Dadi blong mi hemi laekem mi fo duim, hemi no fitim fo yufala biliv long mi tu.

³⁸ Bat mi barava duim olketa waka ya. So nomata yufala no bilivim wanem mi talem, yufala save biliv long olketa waka ya nao. Mekem bae yufala gohed fo savegud moa wea Dadi blong mi hemi stap wetem mi, an mi barava stap wetem hem.”

³⁹ Nao olketa trae fo kasholem hem moa, bat hemi haed nomoa an hemi lus nao.

⁴⁰ Bihaen diswan, Jisas hemi katkros gobaek moa long narasaet long riva long Jodan. An hemi stap long disfala eria wea Jon hemi bin baptaesim olketa pipol long hem fastaem.

⁴¹ An plande pipol nao olketa kam long Jisas an olketa sei, “!Maewat, Jon hemi no mekem eni mirakol nomoa, bat evrisamting wea hemi talem abaotem disfala man ya hemi barava tru nao!”

⁴² So plande pipol long ples ya nao olketa biliv long hem.