Jeremaea 47 - Pijin Bible

Mesij blong Yawe abaotem Filistia

¹ Hem ya nao Mesij blong Yawe agensim olketa blong Filistia, wea hemi givim long Profet Jeremaea bifoa king blong Ijip wetem ami blong hem i kam fo faet agensim olketa long taon long Gasa.

² Yawe nao hemi tok olsem, “!Lukim kam! Olketa enemi i hipap kam long not, olsem bikfala flad. Bae olketa kavaremap disfala lan, wetem evrisamting wea hemi stap long hem. Bae olketa kavaremap olketa taon, wetem olketa pipol wea i stap long olketa. Olketa pipol ya bae i singaot bikfala fo help, an olketa hu i stap long lan bae i kraeaot tumas,

³ bikos olketa herem noes blong olketa hos wea i resis kam, an noes from wil blong olketa kaat fo faet. Taem olketa ranawe, olketa dadi kamap wik tumas long fraet, mekem olketa kanduit stop fo helpem olketa pikinini.

⁴ Taem hemi kam nao fo spoelem finis olketa pipol blong Filistia. Ya, bae Yawe hemi kilim dae olketa ya hu i kamaot long aelan long Krit bifoa. Bae hemi duim olsem, mekem olketa no save helpem tufala taon long Taea an Saedon long Fonisia.

⁵ Olketa long taon long Gasa bae i resarem hed fo somaot dat olketa sore an krae. Olketa long taon long Askelon bae i stap kuaet nomoa nao, bikos olketa no save tok. !Olketa blong Filistia hu i stap laef yet! ?Hao long nao bae yufala gohed fo katem skin blong yufala fo somaot sore blong yufala?

⁶ “Yufala gohed fo kraeaot olsem, ‘!Ooo Yawe! ?Naef fo faet blong yu bae hemi gohed fo kilim mifala dae go-go kasem wataem? Plis yu putum hem gobaek long paos blong hem, mekem hemi stop fo no kilim moa.’

⁷ ?Bat hao nao naef ya hemi save res gud? !Yawe hemi givim waka fo hem wea hemi mas duim! Hemi talem hem finis fo kilim olketa blong Askelon, wetem olketa narafala pipol wea i stap kolsap long solwata.”