Jeremaea 39 - Pijin Bible

Olketa blong Babilonia i spoelem Jerusalem

¹ Long meknaen yia wea King Sedekaea hemi rul ovarem Jiuda, long mekten mans blong hem, King Nebukadnesa blong Babilonia hemi kam wetem ami blong hem, nao olketa hipap kam raonem Jerusalem fo faet agensim olketa ya.

² An long mekleven yia long mekfoa mans long meknaen de blong hem, olketa brekemdaon haf long wolston blong taon, mekem olketa save kam insaet.

³ Taem olketa winim taon, olketa bikman blong king blong Babilonia i kam insaet, an olketa sidaon long geit blong bikfala wolston blong taon wea nem blong hem nao Midol Geit, fo mekem kot long hem. Olketa bikman ya, i olsem Negal-Saresa, an Samga-Nebo, an Sasekim, an narafala Negal-Saresa moa, wetem olketa narafala bikman blong king.

⁴ Taem King Sedekaea blong Jiuda wetem olketa soldia blong hem i lukim olketa samting ya, olketa trae fo ranawe long naet. Olketa gotru long gaden blong king, an goaot long geit wea hemi midol long tufala wolston. Olketa ranawe falom disfala rod wea hemi go long bikfala vali kolsap long Jodan Riva.

⁵ Bat olketa soldia blong Babilonia i aftarem olketa an kasholem king long disfala vali kolsap long taon long Jeriko. Olketa tekem hem go long King Nebukadnesa wea hemi stap long lan long Hamat farawe long not, long taon long Ribla, nao king ya hemi jajem hem long datfala ples.

⁶ Long Ribla ya, King Nebukadnesa hemi talem olketa man blong hem fo kilim dae olketa san blong Sedekaea, stret long ae blong hem, an kilim dae tu olketa bikman blong Jiuda.

⁷ An bihaen, olketa aotem tufala ae blong Sedekaea, an olketa taengem tufala han blong hem long strongfala sen fo tekem hem go long Babilonia.

⁸ Long semtaem ya, long Jerusalem, olketa blong Babilonia i bonem haos blong king, wetem olketa haos blong olketa narafala pipol, an olketa brekemdaon bikfala wolston blong taon tu.

⁹ An Nebusaradan hu hemi sif long spesol ami blong bikfala king blong Babilonia, hemi tekem olketa hu i stap yet insaet long taon, wetem olketa hu bin ranawe from taon fo go joenem olketa blong Babilonia long aotsaet, nao hemi fosim olketa evriwan fo lusim lan blong olketa an go stap long Babilonia.

¹⁰ Bat samfala long olketa pua pipol, wea i no onam enisamting, Nebusaradan hemi letem olketa stap long Jiuda, an hemi givim graon long olketa, an hemi givim tu olketa plantesin blong grep long olketa.

Olketa letem Profet Jeremaea fo go fri

¹¹ King Nebukadnesa hemi tok long sif long spesol ami blong hem, Nebusaradan, mekem hemi go tok long olketa bikman blong hem. Hemi tok olsem,

¹² “Yufala go lukaotem Profet Jeremaea. An taem yufala faendem hem, bae yufala no spoelem hem, bat yufala mas lukaftarem hem gudfala. Yufala duim enisamting hemi askem yufala fo duim.”

¹³ So Nebusaradan wetem tufala bikman ya, Nebusasban an Negal-Saresa, an olketa narafala bikman blong king,

¹⁴ olketa sendem samfala soldia fo faendem Jeremaea. Nao olketa kam tekem hem aot from ples ya long haos blong king wea olketa sekiuriti i stap long hem. An olketa putum hem long han blong Gedalaea, san blong Ahikam hu hemi san blong Safan, fo tekem hemi gobaek long ples blong hem. So hemi save gohed fo stap nomoa wetem olketa pipol blong hem.

Yawe hemi strongim tingting blong Ebed-Melek

¹⁵ Bifoa kam, taem olketa gohed fo kipim Profet Jeremaea yet insaet long ples ya long haos blong king wea olketa sekiuriti i stap long hem, Yawe hemi talemaot Mesij blong hem long Jeremaea. Hemi tok olsem,

¹⁶ “Yu go long Ebed-Melek, disfala man blong Kus, an tok olsem long hem, ‘Yawe hu hemi garem evri paoa an hu hemi God blong Israel, hemi tok olsem: Bae mi letem bikfala trabol hemi kam kasem disfala taon, barava olsem wea mi talem finis. Taem olketa samting ya hemi hapen, bae yu stap long ples ya, mekem yu save lukim olketa samting.

¹⁷ Bat bae mi lukaftarem yu. An olketa wea yu gohed fo fraetem olketa, bae mi no letem olketa fo spoelem yu.

¹⁸ Bae mi sevem yu, mekem olketa no save kilim yu dae, bikos oltaem yu gohed fo trastem mi.’” Hem nao mesij blong Yawe.