Jeremaea 19 - Pijin Bible

Pot long graon wea hemi brek

¹ (Profet) Yawe nao hemi tok olsem long mi, “Yu go peim wanfala pot long graon, nao yu tekem samfala long olketa lida, an samfala bikman long olketa prist.

² Yufala goaot long geit blong bikfala wolston blong taon, wea nem blong hem ‘Geit blong Pot long graon wea hemi brek’, an godaon insaet long vali long Hinom. Long datfala ples, bae yu talemaot long olketa evri toktok wea mi givim long yu.

³ Hem ya nao mesij wea mi laekem yu fo talem: !Lisin kam gudfala long Mesij blong Yawe, yufala king blong Jiuda an yufala pipol blong Jerusalem! Yawe hu hemi garem evri paoa an hu hemi God blong Israel, hemi tok olsem, ‘!Olketa! Mi seleva nao bae mi mekem bikfala trabol fo kasem disfala ples, an eniwan wea hemi herem nius ya, bae hemi seke fogud.

⁴ Bae mi duim olsem bikos olketa pipol long ples i lusim mi finis an spoelem ples ya. Olketa bin tekem kam olketa god blong narafala kantri fo wosipim. Olketa bin mekem sakrifaes wea i barava bone long olketa god ya nomata olketa wetem olketa grani bifoa an olketa olfala king blong Jiuda tu i no save long olketa god ya. Olketa mekem disfala ples hemi fulap fogud long blad blong olketa stretfala man.

⁵ Olketa wakem olketa olta blong god Baal fo bonem olketa pikinini blong olketa long faea, fo sakrifaesim go long hem. Bat mi no talem olketa fo duim olsem. Diskaen barava ravis samting hemi no kamaot long tingting blong mi.

⁶ From samting ya nao, mi talemaot disfala woning. Bikos olketa duim olsem, bae taem hemi kolsap kam wea olketa no kolem ples ya olsem Tofet, o vali long Hinom, bat bae olketa kolem hem Vali fo Kilim Man Dae.

⁷ “‘An long disfala ples, bae mi spoelem olketa plan blong olketa blong Jiuda an Jerusalem. Bae mi mekem olketa enemi blong olketa fo kilim olketa dae long faet. An olketa bodi ya, bae mi givim olketa long olketa bed an olketa wael animol fo kaikaim.

⁸ Bae mi spoelem disfala taon finis, mekem evri pipol hu i lukim bae i tokspoelem hem. Olketa hu i gopas long hem, bae i seke fogud an toknogud long hem.

⁹ Taem olketa enemi i raonem taon, mekem olketa save kilim olketa dae, bae olketa hu i insaet long taon i finisim evri kaikai blong olketa. An bihaen olketa gohed fo hanggre tumas, go-go olketa kaikaim olketa san an olketa dota an olketa wantok blong olketa.’

¹⁰ “Oraet. Jeremaea, taem yu talemaot finis disfala mesij an olketa pipol ya i gohed fo lukim yu, torowem go disfala pot long graon fo brekem long pisis.

¹¹ Talem olketa olsem, ‘Yawe hu hemi garem evri paoa, hemi tok olsem: Olketa. Barava olsem disfala pot hemi brek finis, bae mi brekem disfala taon an kantri blong yufala tu, mekem no eniwan save joenem olketa pisis tugeta moa. Bae olketa pipol i yusim ples long Tofet fo berem olketa man dae blong olketa go-go no eni ples moa hemi stap fo berem long hem.

¹² Mi talem stret long yufala. Hem ya nao olketa samting wea bae mi duim long disfala ples wetem olketa hu i stap long hem. Bae mi spoelem disfala taon, mekem hemi kamap barava olsem Tofet.

¹³ Antap long flat ruf blong olketa haos long Jerusalem an olketa haos blong olketa king blong Jiuda, yufala bin bonem insens antap long olketa fo mekem wosip long olketa sta, an yufala bin kapsaetem waen go long olta, fo mekhae long olketa narafala god. Bae mi mekem olketa haos ya evriwan i ravis long ae blong mi, barava olsem ples long Tofet.’”

¹⁴ So mi go long Tofet, an mi talemaot profesi olsem Yawe hemi talem long mi. Den mi gobaek insaet long taon an go long Tambuhaos blong Yawe, an stanap long ples ya, nao mi tok olsem long olketa pipol ya,

¹⁵ “Yawe hu hemi garem evri paoa an hu hemi God blong Israel, hemi tok olsem, ‘!Olketa! Mi seleva nao bae mi mekem bikfala trabol fo kasem disfala taon an olketa vilij blong hem barava olsem wea mi talem, bikos yufala i bikhed tumas, an yufala les fo lisin long olketa toktok blong mi.’”