Jenesis 5 - Pijin Bible

Olketa laen blong Adam hemi stat long Set, hemi kam kasem Noa

^1-2 Stori abaotem Adam wetem laen hemi olsem: Long taem ya wea God hemi mekem man, hemi mekem hem fo tekem wei blong hem seleva. Fastaem, hemi mekem tufala man nomoa, wanfala wea i man an narafala wea i woman, an long de ya hemi mekem tufala, hemi blesim tufala, an hemi kolem tufala, Man.

³ Adam hemi kasem 130 yia blong hem, nao hemi bonem wanfala pikinini boe moa wea i olsem hem seleva an hemi tekem wei blong hem, an hemi kolem pikinini ya Set.

⁴ Nao hemi stap 800 yia moa, an long taem ya, hemi bonem olketa narafala pikinini moa, samfala wea i boe an samfala wea i gele.

⁵ An taem hemi dae, hemi kasem 930 yia blong hem.

⁶ Taem Set hemi kasem 105 yia blong hem, hemi bonem Enos.

⁷ Nao hemi stap 807 yia moa, an long taem ya, hemi bonem olketa narafala pikinini moa, samfala wea i boe an samfala wea i gele.

⁸ An taem hemi dae, hemi kasem 912 yia blong hem.

⁹ Taem Enos hemi kasem 90 yia blong hem, hemi bonem Kenan.

¹⁰ Nao hemi stap 815 yia moa, an long taem ya, hemi bonem olketa narafala pikinini moa, samfala wea i boe an samfala wea i gele.

¹¹ An taem hemi dae, hemi kasem 905 yia blong hem.

¹² Taem Kenan hemi kasem 70 yia blong hem, hemi bonem Mahelalel.

¹³ Nao hemi stap 840 yia moa, an long taem ya, hemi bonem olketa narafala pikinini moa, samfala wea i boe an samfala wea i gele.

¹⁴ An taem hemi dae, hemi kasem 910 yia blong hem.

¹⁵ Taem Mahelalel hemi kasem 65 yia blong hem, hemi bonem Jered.

¹⁶ Nao hemi stap 830 yia moa, an long taem ya, hemi bonem olketa narafala pikinini moa, samfala wea i boe an samfala wea i gele.

¹⁷ An taem hemi dae, hemi kasem 895 yia blong hem.

¹⁸ Taem Jered hemi kasem 162 yia blong hem, hemi bonem Inok.

¹⁹ Nao hemi stap 800 yia moa, an long taem ya, hemi bonem olketa narafala pikinini moa, samfala wea i boe an samfala wea i gele.

²⁰ An taem hemi dae, hemi kasem 962 yia blong hem.

²¹ Taem Inok hemi kasem 65 yia blong hem, hemi bonem Metusela.

²² Nao hemi stap 300 yia moa, wea oltaem hemi gohed wetem God, an long taem ya, hemi bonem olketa narafala pikinini moa, samfala wea i boe an samfala wea i gele.

^23-24 Oltaem long laef blong hem hemi stap fren gud wetem God, nao God hemi tekem hem aot from wol ya taem hemi laef yet, an olketa man i no lukim hem moa. Long taem ya, hemi kasem 365 yia blong hem.

²⁵ Taem Metusala hemi kasem 187 yia blong hem, hemi bonem Lamek.

²⁶ Nao hemi stap 782 yia moa, an long taem ya, hemi bonem olketa narafala pikinini moa, samfala wea i boe an samfala wea i gele.

²⁷ An taem hemi dae, hemi kasem 969 yia blong hem.

²⁸ Taem Lamek hemi kasem 182 yia blong hem, nao hemi bonem wanfala pikinini boe.

²⁹ Hemi tok olsem, “Pikinini ya bae hemi helpem yumi, mekem yumi res lelebet long olketa hadwaka blong yumi long graon ya, wea Yawe hemi jajem finis an hemi mekem kamap nogud.” Nao hemi kolem pikinini ya Noa.

³⁰ Nao hemi stap 595 yia moa, an long taem ya, hemi bonem olketa narafala pikinini moa, samfala wea i boe an samfala wea i gele.

³¹ An taem hemi dae, hemi kasem 777 yia blong hem.

³² Taem Noa hemi kasem 500 yia blong hem, hemi bonem trifala pikinini boe wea hemi kolem olketa long Siem, an Ham an Jafet.