Jenesis 36 - Pijin Bible

Olketa wea i bon kam long laen blong Iso

¹ Stori abaotem laen blong Iso wea narafala nem blong hem nao Idom, hemi olsem:

² Iso hemi maritim tufala woman long Kenan, wea nem blong tufala nao Ada, an Oholibama. Ada ya, dadi blong hem nao Elon, man long laen blong Het, an Oholibama ya, dadi blong hem nao Ana, an hemi smolfala grani blong Sibeon, hu hemi man long laen blong Hivi.

³ An hemi maritim wanfala woman moa, wea nem blong hem nao Basemat, an dadi blong hem nao Ismael, hu hemi barava sista blong Nebaeot.

^4-5 An olketa pikinini blong Iso ya, nem blong olketa nao, Elifas, wea mami blong hem nao Ada, an Jehus, an Jalam, an Kora, wea mami blong trifala nao Oholibama, an Rehuel wea mami blong hem nao Basemat. Hem nao olketa pikinini blong Iso wea i bon long kantri ya olketa kolem Kenan.

⁶ Nao Iso hemi tekem trifala waef blong hem ya, wetem olketa pikinini blong hem, an olketa pipol wea i stap wetem hem, an olketa animol blong hem, an evrisamting blong hem wea hemi garem long Kenan, nao hemi lusim brata blong hem Jekob, an hemi go stap long narafala kantri.

⁷ Hemi lusim hem, bikos graon ya wea tufala stap long hem hemi no naf moa nao fo givim kaikai long olketa animol blong tufala, bikos olketa animol ya i gohed fo kamap plande tumas.

⁸ So Iso hemi go stap long olketa maonten long kantri ya olketa kolem Idom, wea olfala nem blong hem nao Seia.

⁹ Long wei ya nao, hemi kamap grandadi blong olketa pipol long Idom, wea hem nao olketa wea i stap long olketa maonten long kantri ya.

^10-13 Olketa laen wea i bon kam long laen blong Iso hemi olsem. Pikinini blong hem ya Elifas wea Ada hemi bonem, hemi garem faefala pikinini boe. Nem blong olketa nao Teman, an Omara, an Sefo, an Gatam, an Kenas. Elifas hemi garem wanfala slev woman wea nem blong hem nao Timna, an hemi narafala waef blong hem tu ya, Woman ya hemi bonem wanfala pikinini boe, wea nem blong hem nao Amalek. Pikinini blong Iso ya Rehuel, wea Basemat hemi bonem, hemi garem fofala pikinini boe, wea nem blong olketa nao Nahat, an Sera, an Sama, an Misa.

¹⁴ An trifala pikinini blong Iso ya, Jehus, an Jalam, an Kora, wea Oholibama hemi bonem, trifala ya i garem moa olketa pikinini blong trifala.

^15-16 Hem ya nao olketa laen blong Iso wea olketa gohed fo makem olketa olo blong olketa. Olketa laen blong Teman, an olketa laen blong Omara, an olketa laen blong Sefo, an olketa laen blong Kenas, an olketa laen blong Kora, an olketa laen blong Gatam, an olketa laen blong Amalek, olketa laen ya nao grandadi blong olketa hemi Elifas. Olketa ya nao i bon kam long laen blong Ada hu hemi waef blong Iso.

¹⁷ Nao olketa laen blong Nahat, an olketa laen blong Sera, an olketa laen blong Sama, an olketa laen blong Misa, olketa laen ya nao grandadi blong olketa hemi Rehuel. Olketa ya nao i bon kam long laen blong Basemat hu hemi waef blong Iso.

¹⁸ An olketa laen blong Jehus, an olketa laen blong Jalam, an olketa laen blong Kora, olketa laen ya nao grandadi blong olketa hemi Iso. Olketa ya nao i bon kam long laen blong Oholibama hu hemi waef blong Iso, an dadi blong woman ya hemi Ana.

¹⁹ Olketa evriwan ya nao i laen blong Iso.

Olketa wea i bon kam long laen blong Seia

^20-21 Fastaem olketa narafala pipol nao i stap long kantri ya wea olketa kolem Idom. Olketa ya i bon kam long laen blong wanfala man, wea nem blong hem Seia, wea i laen blong Hori. Seia ya, hemi garem sevenfala pikinini wea i bon kam long laen blong hem wea olketa i grandadi blong olketa narafala laen. Nem blong olketa nao Lotan, an Sobal, an Sibeon, an Ana, an Dison, an Esa, an Disan.

²² Lotan ya, hemi grandadi blong olketa laen blong Hori, an olketa laen blong Homam. An sista blong hem nao Timna.

²³ Sobal ya, hemi grandadi blong olketa laen blong Alvan, an olketa laen blong Manahat, an olketa laen blong Ebal, an olketa laen blong Sefo, an olketa laen blong Onam.

²⁴ Sibeon ya, hemi bonem tufala pikinini boe, wea nem blong tufala nao Aea, an Ana. Hem nao sem Ana wea hemi faendem springwata ya wea hemi hot, wea i stap long drae eria. Hemi lukim springwata ya long taem wea hemi stap long drae eria, an hemi gohed fo lukaftarem olketa dongki blong dadi blong hem.

^25-26 Ana hemi dadi blong Dison, an Dison hemi grandadi blong olketa laen blong Hemdan, an olketa laen blong Esban, an olketa laen blong Itran, an olketa laen blong Keran. Ana ya hemi bonem wanfala dota tu, wea nem blong hem Oholibama.

²⁷ Esa ya, hemi grandadi blong olketa laen blong Bilhan, an olketa laen blong Sahavan, an olketa laen blong Akan.

²⁸ Disan ya, hemi grandadi blong olketa laen blong Us, an olketa laen blong Aran.

^29-30 Long wei ya nao olketa garem laen blong Lotan, an olketa laen blong Sobal, an olketa laen blong Sibeon, an olketa laen blong Ana, an olketa laen blong Dison, an olketa laen blong Esa, an olketa laen blong Disan. Hem nao olketa long laen blong Hori, wea olketa stap fastaem long kantri ya wea olketa kolem Idom.

Olketa King blong olketa pipol long Idom

³¹ Bifoa, taem wea olketa laen blong Israel i no garem king blong olketa seleva yet, bat olketa pipol long Idom i garem finis olketa king blong olketa. Nem blong olketa nao hemi olsem.

³² Fastaem, olketa garem King Bela, wea dadi blong hem nao Beo, an hemi blong bikfala taon ya olketa kolem Dinaba.

³³ Bihaen long hem, olketa garem King Jobab, wea dadi blong hem nao Sera, an hemi man blong Bosera.

³⁴ Bihaen long hem, olketa garem King Husam wea hemi man blong Teman.

³⁵ Bihaen long hem, olketa garem King Hadad, wea dadi blong hem nao Bedad, an hem blong bikfala taon ya wea olketa kolem Avit. King Hadad ya, hemi go an faet wetem olketa pipol blong Midian long kantri ya wea olketa kolem Moab, an hemi winim olketa.

³⁶ Bihaen long hem, olketa garem King Samlaa wea i man blong Masreka.

³⁷ Bihaen long hem, olketa garem King Saol, wea i man blong Rehobot, taon ya olketa wakem kolsap long Yufretis riva.

³⁸ Bihaen long hem, olketa garem King Balanan, wea dadi blong hem Akboa.

³⁹ Bihaen long hem, olketa garem King Hadad wea bikfala taon blong hem nao olketa kolem Pao. Waef blong hem nao Mehetabel, wea mami blong hem nao Matred, an grani blong hem nao Mesahab.

^40-43 Hem ya nao olketa laen blong Iso wea i stap long Idom. Olketa ya nao laen blong Timna, an laen blong Alva, an laen blong Jetet, an laen blong Oholibama, an laen blong Ela, an laen blong Pinon, an laen blong Kenas, an laen blong Teman, an laen blong Mibsara, an laen blong Magdiel, an laen blong Iram. Olketa evriwan ya i laen blong Iso ya. An oltaem, olketa ples wea olketa stap long hem olketa kolem falom nem blong olketa olo wea i grandadi blong olketa.