Jajis 7 - Pijin Bible

Yawe hemi talem Gidion dat ami blong hem hemi bik tumas

^1-3 Nao Jerub-Baal, hu hemi Gidion, wetem olketa soldia blong hem i getap long eli moning an olketa go fo stap kolsap long springwata long Harod. Olketa stap kolsap long hil wea olketa kolem Gilead. An ami blong Midian hemi stap long narasaet long bikfala flat ples long Jesreel long not, kolsap long wanfala hil wea nem blong hem nao More. Yawe hemi tok olsem long hem, “Gidion. Ami blong yu hemi bik tumas, mi no save yusim olketa fo winim ami blong Midian. Sapos olketa win, bae olketa tingse olketa nao win long paoa blong olketa seleva nomoa. An bae olketa no save tinghae long mi. Yu mas tok olsem long evriwan, ‘!Olketa! !Sapos samfala long yufala i fraet tumas, olketa ya save gobaek long ples blong olketa!’” So taem Gidion hemi tok olsem long evriwan, 22,000 man nao i gobaek long ples blong olketa, 10,000 nomoa i stap wetem hem.

⁴ Yawe hemi tok olsem moa long Gidion, “Olketa man ya i staka tumas yet ya. Yu mas tekem olketa evriwan fo godaon long wata, an long ples ya nao bae mi divaedem olketa. Sapos mi tok olsem long yu, ‘Man ya hemi no fitim,’ bae hemi no save go. Bat sapos mi tok olsem, ‘Man ya hemi fitim’, bae hemi go fo faet.”

⁵ So Gidion hemi tekem olketa evriwan godaon long wata fo dring. An Yawe hemi tok olsem long hem, “Yu divaedem olketa hu i dring long han blong olketa from olketa narafala grup hu i nildaon, an putum hed blong olketa go long wata fo dring.”

⁶ Long datfala taem, 300 man nomoa i dring long han blong olketa. An olketa narafala man nao olketa nildaon an putum hed blong olketa go long wata fo dring.

⁷ Den Yawe hemi tok olsem long hem, “Bae mi yusim 300 man ya fo sevem yufala, an bae mi mekem yufala fo winim ami blong Midian long faet. Bat yu talem olketa narafala man ya fo go hom.”

⁸ So Gidion hemi talem 300 man ya fo stap wetem hem, an hemi tok olsem long olketa narafala man ya, “Yufala livim olketa basket kaikai wetem olketa trampet blong yufala long hia, an yufala go hom.” Long datfala taem, Gidion wetem olketa soldia ya i stap antap long hil, an ami blong Midian hemi stap long flat ples.

Yawe hemi som Gidion dat bae hemi winim faet

⁹ Long datfala naet, Yawe hemi tok olsem long Gidion, “Gidion, getap an tekem olketa man blong yu an go faet long olketa blong Midian. Bae mi mekem yufala fo winim olketa.

¹⁰ Bat sapos yu fraet fo go, hemi gud yu gohaed wetem soldia blong yu Pura, mekem yutufala go lukim ples blong olketa fastaem.

¹¹ An taem yu herem wanem samfala soldia blong Midian i talem, bae tingting blong yu hemi kamap strong moa fo winim olketa.” So Gidion wetem Pura tufala godaon haed kolsap long olketa gadhaos blong ami blong Midian.

¹² Olketa ami wea i stap long bikfala flat ples ya nao hemi olsem, ami blong Midian wetem ami blong Amalek, an ami blong olketa long drae eria long saet long ist. Olketa ya i staka tumas olsem anis wea hemi kavaremap olketa ples. An olketa kamel blong olketa evriwan i plande tumas tu olsem sanbis long saetsi.

¹³ Oraet, taem Gidion kasem datfala ples hemi herem wanfala man blong Midian hemi stori long fren blong hem abaotem wanfala drim blong hem. Hemi tok olsem, “Ya man, mi drim dat mi lukim wanfala bred wea olketa wakem long bali, bat wea, hemi rol kamdaon long hil long yumi olsem wanfala bikfala ston, an hemi bangam wanfala haostent blong yumi, so hemi foldaon an hemi barava nogud tumas.”

¹⁴ Den fren blong hem hemi tok olsem, “Sei, hem nao naef fo faet blong disfala bikman blong Israel, Gidion san blong Joas. Hemi no eni deferen samting moa ya. Bae God hemi putum yumi Midian long han blong hem.”

¹⁵ Taem Gidion hemi herem drim ya an mining blong hem, hemi nildaon fo mekhae long Yawe. Den hemi kambaek long ami blong hem an hemi singaot olsem, “!Yumi go! !Mi save nao dat Yawe hemi putum finis ami blong Midian long han blong yumi!”

Gidion wetem olketa man blong hem i go raonem ami blong Midian

¹⁶ Den Gidion hemi divaedem 300 man blong hem long trifala grup, an hemi givim trampet an pot wea olketa wakem long graon long olketa evriwan. Evriwan i garem laet wea hemi gohed fo bone insaet long pot.

¹⁷ An hemi tok olsem long evriwan, “Taem yumi go kolsap long ami blong Midian, yufala mas lukluk falom mi. Wanem samting mi duim, yufala tu mas duim.

¹⁸ Yumi mas stanap raonem ples blong olketa. An taem mi wetem grup blong mi, mifala bloum trampet, bae yufala tu mas bloum trampet, an yumi mas barava singaot bikfala olsem, ‘!Yawe an Gidion nao mas winim faet!’”

¹⁹ Long midol long naet, taem olketa soldia blong Midian hu i gadem ples i sens, Gidion wetem 100 man blong hem i kasem nao saet long datfala ples fo raonem. Den olketa bloum trampet blong olketa, an olketa brekem olketa pot blong olketa mekem laet long hem hemi saenaot.

²⁰ Semtaem nomoa, tufala narafala grup ya tu i duim olsem. Olketa bloum trampet an brekem olketa pot. Olketa evriwan i holem laet long lefhan an trampet long raethan, an olketa gohed fo singaot bikfala olsem, “!Kilim olketa dae! !Kilim olketa dae! !Yawe an Gidion nao mas winim faet!”

^21-22 Olketa soldia blong Gidion i gohed fo stanap raonem ami blong Midian. An olketa evriwan i bloum trampet. Oraet, Yawe hemi mekem ami blong Midian i barava fraet fogud. So olketa ran olobaot an tekem olketa naef fo faet an gohed fo kilim olketa wantok blong olketa seleva. So evriwan long olketa enemi ya i singaot long fraet an ranawe nao. Olketa ranawe go fo ples long Serera, bat olketa kasem nomoa taon long Bet-Akesia wea hemi stap long spialaen blong Abel-Mehola kolsap long ples long Tabat.

Gidion wetem ami blong hem i ronem ami blong Midian

²³ Den Gidion hemi sendem toktok go long traeb blong Naftali, an long traeb blong Asa, an long evriwan long traeb blong Manase, mekem evriwan kam fo kilim dae olketa blong Midian. So evriwan i kam fo ronem olketa.

²⁴ An hemi sendem samfala man fo go long olketa ples long olketa maonten long lan blong Efrem. Olketa sei olsem, “Yufala kamdaon kuiktaem mekem yumi faetem ami blong Midian. Yufala gadem olketa ples wea olketa save krosim Jodan riva. Yufala no letem eniwan long olketa fo go akros narasaet long Jodan Riva fo kasem Bet-Bara.” So olketa soldia blong Efrem i kam tugeta an satem evri ples fo krosim Jodan riva go kasem Bet-Bara.

²⁵ Olketa long Efrem i kasholem tufala long olketa sif blong Midian, wea nem blong tufala, Blak Igol an Wael Dog. Oraet Blak Igol ya, olketa katemaot hed blong hem kolsap long wanfala bikfala ston wea bihaen olketa kolem ston ya Blak Igol. An Wael Dog ya, olketa katemaot hed blong hem long ples fo wakem waen wea bihaen olketa kolem ples ya Wael Dog. Olketa gohed yet fo ronem disfala ami blong Midian. An olketa tekem hed blong tufala sif ya go long Gidion hu hemi stap finis narasaet long Jodan Riva.