Jajis 17 - Pijin Bible

Maeka hemi wakem samfala tambu kaving

¹ Bifoa kam, wanfala man hemi stap wea nem blong hem nao Maeka an hemi blong traeb blong Efrem. Hemi stap long olketa maonten long lan blong Efrem.

² Wanfala de, hemi tok olsem long mami blong hem, “Mami, lastaem mi herem dat yu kolem trabol fo kasem man hu hemi stilim 1,100 silva seleni blong yu. Mi nomoa mi tekem, hemi wetem mi nomoa.” Den mami blong hem hemi tok olsem, “San blong mi, letem Yawe hemi blesim yu.”

³ So Maeka hemi givimbaek silva seleni ya long mami blong hem. An mami blong hem hemi tok olsem, “Distaem mi mektambu long disfala silva seleni fo go long Yawe mekem san blong mi hemi garem wanfala tambu kaving long hem.” So mami blong hem hemi tok olsem long Maeka, “Distaem, mi givim silva seleni ya long yu nao.”

⁴ Bat Maeka hemi givim gobaek disfala silva seleni long mami blong hem. Oraet, mami blong Maeka hemi tekemaot 200 silva seleni an hemi givim long wanfala man fo wakem tambu kaving long hem. Nao olketa putum disfala tambu kaving long haos blong Maeka.

⁵ Maeka ya hemi garem wanfala tambuples an hemi wakem olketa tambu kaving an wanfala tambu kaleko wea olketa kolem efod. An hemi mektambu long wanfala san blong hem fo duim waka blong prist.

⁶ Long datfala taem, pipol blong Israel i no garem king yet, so evriwan i gohed fo duim olketa samting wea hemi stret long tingting blong olketa seleva nomoa.

⁷ Oraet, wanfala yangman from traeb blong Livae, hemi stap long Betlehem long lan blong traeb blong Jiuda, bat hemi no man blong datfala ples.

⁸ Go-go hemi lusim Betlehem fo faendem narafala ples fo stap long hem. Taem hemi wakabaot go, hemi kasem ples blong Maeka long olketa maonten long lan blong Efrem.

⁹ Den Maeka hemi askem hem olsem, “?Yu blong wea?” An hemi tok olsem, “Mi wanfala Livaet an mi kam from Betlehem long Jiuda. Mi lukaotem eni ples fo stap long hem.”

¹⁰ So Maeka hemi tok olsem long hem, “Yu kam stap nomoa wetem mi. Bae yu kamap prist blong mi, an yu nao bae talem mifala wanem God hemi laekem mifala fo duim. Bae mi givim tenfala silva seleni long yu fo wanfala yia, an bae mi givim kaleko an kaikai long yu tu.”

¹¹ So man ya hemi agri fo stap long ples ya. Oraet, Maeka hemi gohed fo lukaftarem hem olsem wanfala pikinini blong hem.

¹² So Maeka hemi mektambu long disfala yangman fo kamap prist, an oltaem hemi stap nomoa long haos blong Maeka.

¹³ An Maeka hemi tok olsem, “Distaem mi save dat Yawe bae hemi blesim mi, bikos wanfala Livaet hemi kamap prist blong mi.”