Jajis 12 - Pijin Bible

Traeb blong Efrem i kros long Jefta

¹ Nao ami blong Efrem i hipap tugeta an go akros long Jodan Riva an olketa kam long taon long Safon. Oraet, olketa tok olsem long Jefta, “?Waswe nao yufala no kam kolem mifala fo joenem yufala taem yufala go faetem laen blong Amon? Distaem, bae mifala bonem yu wetem haos blong yu.”

² Bat Jefta hemi tok olsem long olketa, “Mi wetem olketa pipol blong mi i garem bikfala raoa wetem laen blong Amon ya. An mi kolem yufala, bat yufala nating kam fo sevem mifala.

³ Nao taem mi lukim dat yufala no kam fo helpem mifala, nomata mi fraet mi tekem olketa man blong mi an go faetem olketa. An Yawe nao hemi mekem mifala winim olketa. ?So waswe nao yufala wande kam fo faetem mifala distaem?”

⁴ So Jefta hemi kolem olketa man blong hem fo kam tugeta, nao olketa faetem traeb blong Efrem an kilim olketa. Hemi duim olsem bikos traeb blong Efrem i bin tokspoelem olketa olsem, “Yufala long laen blong Gilead i ravis tumas an stap nating long ples blong Efrem an Manase.”

⁵ Nao ami blong Gilead i go gadem olketa ples wea man i save go akros long Jodan Riva, mekem traeb blong Efrem i no save ranawe fo go akros long ples ya. Taem eni man long traeb blong Efrem hemi kam ask fo krosim riva, olketa gad i askem hem olsem, “?Yu traeb blong Efrem?” An sapos hemi sei, “Nomoa”,

⁶ oraet olketa talem hem fo sei “Jibolet”. Bat sapos hemi tok olsem, “Sibolet” olketa holem an kilim hem dae. Olketa duim olsem bikos olketa save dat traeb blong Efrem i no save talem stret, “Jibolet”. An long datfala taem, olketa kilim dae 42,000 man long traeb blong Efrem.

⁷ Jefta hemi sif long Israel fo siksfala yia, an hemi dae, an olketa berem hem long ples blong hem long Gilead.

Trifala sif long Israel, Ibsan, an Elon, an Abdon

⁸ Nao bihaen long Jefta, Ibsan hemi kamap sif long Israel, an hemi wanfala man blong Betlehem.

⁹ Hemi garem siksti pikinini wea tetifala i boe, an nara tetifala i gele. Hemi letem olketa dota blong hem fo marit long olketa narafala famili wea i no long laen blong hem. An hemi tekem olketa gele blong narafala famili wea i no long laen blong hem fo kam maritim olketa boe blong hem. Hemi lidim pipol blong Israel fo sevenfala yia,

¹⁰ an hemi dae, an olketa berem hem long Betlehem.

¹¹ Bihaen Ibsan hemi dae, Elon hu hemi long traeb blong Sebulun, hemi kamap sif long Israel. Hemi lidim olketa fo tenfala yia,

¹² an hemi dae, an olketa berem hem long taon long Aejalon wea hemi long lan blong Sebulun.

¹³ Bihaen Elon hemi dae, Abdon, san blong Hilel, hemi kamap sif long Israel. Hemi man blong Piraton,

¹⁴ an hemi garem fotifala san, an tetifala grani. An bikos olketa i lida, evriwan long olketa i raedem dongki. Abdon, hemi lidim pipol blong Israel fo eitfala yia,

¹⁵ an hemi dae, an olketa berem hem long Piraton, long olketa maonten long lan blong Efrem wea bifoa i blong laen blong Amalek.