Hibrus 8 - Pijin Bible

Niufala spesol agrimen

¹ Bikfala samting wea mifala gohed fo talem long yufala nao, hemi olsem. Yumi garem diskaen Haeprist ya hu hemi sidaon long heven long raetsaet blong God hu hemi garem evri paoa.

² Hemi waka olsem Haeprist long tambuples ya wea hemi insaet long disfala barava Tambu Haostent long heven wea pipol no wakem, bat God seleva nao hemi wakem.

³ Waka blong olketa nara haeprist hemi fo mekem olketa sakrifaes an fo givim olketa ofaring go long God. Dastawe nao, disfala Haeprist blong yumi hemi mas mekem wanfala sakrifaes tu.

⁴ Sapos hemi stap long wol ya, bae hemi no save waka olsem prist, bikos yumi garem plande prist finis hu i mekem olketa kaen sakrifaes long God, olsem Lo blong Mosis hemi talem.

⁵ Olketa duim waka blong olketa ya long tambuples wea hemi wanfala piksa nomoa long barava tambuples blong God long heven. Dastawe nao God hemi wonem Mosis, taem hemi laekem hem fo wakem disfala haostent blong hem, wea hemi sei, “An taem yu wakem olketa samting ya, yu mas barava falom disfala plan wea mi gohed fo talemaot long yu, antap long disfala maonten.”

⁶ Bat waka wea Jisas hemi duim, hemi bikfala moa winim waka blong olketa nara prist ya. An disfala niufala spesol agrimen blong God hem tu hemi bikfala moa winim olfala spesol agrimen ya, an Jisas nao hemi mekem diswan fo kamtru. Niufala spesol agrimen ya hemi bikfala moa bikos taem God hemi mekem disfala agrimen, olketa promis wea hemi mekem hemi bikfala moa winim promis wea hemi bin mekem taem hemi mekem olfala agrimen.

⁷ Sapos no enisamting hemi rong long disfala olfala spesol agrimen, bae olketa no nidim eni niufala spesol agrimen moa fo sensim faswan.

⁸ Bat God hemi luksave long rong blong olketa pipol ya, an dastawe nao hemi tok long olketa olsem, “Wanfala taem bae hemi kam wea bae mi mekem wanfala niufala spesol agrimen wetem olketa blong Israel an olketa blong Jiuda.

⁹ Disfala spesol agrimen bae hemi no olsem olfala spesol agrimen wea mi mekem wetem olketa grani blong olketa bifoa, long taem wea mi lidim olketa kamaot from Ijip. Olketa no falom datfala spesol agrimen, an mi tanem baeksaet blong mi long olketa, mekem olketa nidim wanfala niufala spesol agrimen moa.

¹⁰ Hem ya nao disfala niufala spesol agrimen wea bae mi mekem wetem olketa pipol blong Israel. Bae mi putum lo blong mi insaet long maen blong olketa, an bae mi raetemdaon long haat blong olketa. Bae mi nao God blong olketa, an bae olketa i kamap moa spesol pipol blong mi.

¹¹ No eniwan bae hemi tisim wantok blong hem o brata blong hem long wei wea hemi tok olsem, ‘Yufala mas save long Masta.’ Bikos long datfala taem, olketa evriwan bae i save finis long mi, nomata man hemi garem biknem o nomoa.

¹² Bae mi fogivim olketa from enikaen ravis samting wea olketa duim, an bae mi no tingim moa olketa sin blong olketa.”

¹³ Taem God hemi sei disfala spesol agrimen ya hemi niufala, hemi minim wea disfala spesol agrimen wea hemi mekem fastaem ya, hemi olo finis nao. An enisamting wea hemi olo finis olsem, no longtaem bae hemi lus nao.