Hibrus 5 - Pijin Bible

¹ God hemi save siusim wanfala man long olketa pipol fo hemi waka olsem haeprist. Waka blong hem, hemi fo helpem olketa pipol fo givim olketa ofaring long God an fo mekem olketa sakrifaes fo tekemaot sin blong olketa.

² Samfala pipol duim olketa rong samting bikos olketa no luksave long wanem olketa save duim. Disfala haeprist hemi save helpem gud kaen pipol olsem, bikos hem seleva tu hemi save wik tumas.

³ An dastawe nao hemi mas mekem olketa sakrifaes, mekem God hemi tekemaot sin blong haeprist ya semtaem wea God hemi tekemaot sin blong olketa pipol tu.

⁴ No eniwan save haemapem hem seleva fo tekem disfala waka olsem haeprist. God nomoa hemi save siusim man fo haeprist, olsem hemi siusim Eron bifoa.

⁵ Long sem wei tu, Kraes hemi no haemapem hem seleva fo tekem disfala bik waka olsem Haeprist. Bat taem God hemi siusim hem, hemi tok olsem, “Yu nao San blong mi. Stat long tude, mi nao Dadi blong yu.”

⁶ An long nara ples long Buktambu hemi sei, “Bae yu nao yu prist olowe, olsem Melkisedek long bifoa.”

⁷ Taem Jisas hemi stap yet long wol ya, hemi kraeaot bikfala long prea blong hem. Hemi prea go long God hu hemi save helpem hem fo no dae. Nao God hemi herem prea blong Jisas, bikos Jisas hemi save falom God an tinghae tumas long hem.

⁸ Nomata Jisas hemi San Blong God, hemi safa tumas. An hemi lanem wei fo falom God from wei wea hemi safa.

⁹ An taem waka blong hem hemi finis nao, Jisas hemi sevem olketa pipol hu i falom hem, fo olketa laef olowe nao.

¹⁰ An God nao hemi siusim hem fo Haeprist olsem Melkisedek.

Woning fo no lusim biliv long Kraes

¹¹ Mifala garem plande samting moa fo talem go long yufala abaotem hao nao Jisas hemi kamap Haeprist olsem Melkisedek, bat hemi had tumas fo tisim yufala gud bikos yufala slou tumas fo lanem olketa samting ya.

¹² Yufala bin biliv longtaem finis, so hemi fitim fo yufala seleva i stap olsem tisa. Bat hemi luk olsem yufala nidim narafala man fo kam tisim yufala moa abaotem olketa fas samting wea yufala herem finis abaotem Kraes. Yufala olsem olketa pikinini hu i susu yet, wea yufala i no fit fo kaikaim strongfala kaikai.

¹³ Eniwan hu hemi susu, hemi bebi yet ya an hemi no luksave yet long olketa tising abaotem wanem hemi stret an wanem hemi rong.

¹⁴ Bat eniwan hu i kaikaim strongfala kaikai, hemi bikman finis. Man olsem ya, hemi save finis hao fo luksave long wanem hemi gudfala an wanem hemi ravis.