Habakuk 3 - Pijin Bible

Prea blong Profet Habakuk

¹ Profet Habakuk hemi prea olsem:

² Lod Yawe. Mi herem finis nius abaotem olketa samting wea yu bin duim. So, mi barava tinghae long yu. Plis yu duim moa distaem olketa semkaen samting wea yu bin duim bifoa. Nomata yu kros long mifala, plis yu sore kam nomoa long mifala.

³ Holi God hemi kam from Idom, an from olketa hil long Paran. Saen long bikfala paoa blong hem hemi kavarem skae. An evri pipol long disfala wol i gohed fo mekhae long hem.

⁴ Taem hemi kam, hemi gohed fo saen olsem san. Laetning hemi flas kam from han blong hem, fo somaot dat hemi garem evri paoa.

⁵ Hemi sendem bikfala sik fo go fastaem long hem, an tokstrong long dae fo kam bihaen.

⁶ Taem hemi stop, graon hemi seksek. Taem hemi luk go long olketa kantri, evri pipol i fraet an seksek fogud. Olketa bikfala maonten an hil i brek long pisis an singdaon nao. Long wei ya, God bin wakabaot long disfala wol longtaem bifoa.

⁷ Mi lukim dat olketa blong Kusan i fraet, an olketa blong Midian i seksek fogud.

⁸ Lod Yawe. ?Taem yu bin stopem olketa riva an divaedem si, waswe, yu bin kros long olketa ya? !Nomoa nao! Bat yu bin kam olsem soldia long kaat blong hem fo faet, fo helpem olketa pipol blong yu fo win.

⁹ Yu bin redi fo pulum bou blong yu, an redim olketa aro fo obeim yu. Yu bin mekem olketa riva fo ran bikfala wea olketa brekem graon.

¹⁰ Taem olketa maonten bin lukim yu, olketa seksek fogud. Long datfala taem, bikfala ren bin kamdaon, an dipsi bin meknoes tumas, an bikfala wev bin kamap hae.

¹¹ Taem yu bin sut long aro an spia, wea i saen olsem laetning, san an mun i no muv.

¹² Taem yu barava kros, yu bin maas go akros long disfala wol, an step long olketa pipol.

¹³ Yu bin kam fo sevem olketa pipol blong yu, an fo sevem king wea yu bin siusim. Yu bin step long lida blong olketa ravis pipol, an spoelem finis olketa pipol blong hem.

¹⁴ Taem ami blong hem bin kam olsem saekloun fo spoelem mifala, olketa bin gohed fo hapi olsem man hu hemi laekem fo mekem olketa pua pipol safa. Bat long datfala taem, yu bin sutim disfala lida long olketa aro blong hem seleva.

¹⁵ Yu bin step long si long olketa hos blong yu, mekem solwata hemi kamap raf fogud.

¹⁶ Taem mi herem evrisamting ya, mi fraet fogud. Bodi blong mi hemi seksek fogud, an lek blong mi hemi wik tumas, an mi no save wakabaot stret nao. Bat bae mi gohed fo stap kuaet, an weit nomoa fo datfala taem wea bae God hemi panisim olketa hu i kam fo faet agensim yumi.

¹⁷ Nomata sapos yumi stap long taem blong trabol, olsem wea olketa fig tri no garem frut fo kaikaim, an olketa grep tri no garem frut fo mekem waen, an olketa oliv tri no garem frut fo mekem oel, an olketa gaden no garem kaikai, an olketa sipsip an buluka i dae evriwan,

¹⁸ bat bae mi gohed nomoa fo hapi, bikos Yawe hemi God blong mi, an hem nao hemi sevem mi.

¹⁹ Lod Yawe nao hemi mekem mi strong. An hemi kipim mi sef, mekem mi no save foldaon, olsem wea dia save ran long raf ples saet long maonten.