Esta 8 - Pijin Bible

King hemi mekem Modekae fo kamap praeminista

¹ Long sem de, king hemi givim Esta evrisamting blong Haman, disfala enemi blong olketa Jiu. An Esta hemi talem king wea hemi kasin sista blong Modekae. So king hemi letem Modekae fo kam insaet long haos blong hem.

² King hemi mekem Modekae fo kamap praeminista blong hem. An hemi tekemaot ring blong hem ya wea hemi garem spesol mak long hem, wea hemi bin tekem baek from Haman, an givim go long Modekae fo hemi yusim. An Esta hemi mekem Modekae fo lukaftarem olketa samting wea Haman hemi onam fastaem.

King hemi letem olketa Jiu fo redim olketa seleva fo faetem olketa enemi blong olketa

³ Esta hemi lukim dat disfala plan blong Haman fo kilim dae olketa Jiu, hemi stap yet, so hemi nildaon frant long king, an hemi gohed fo krae, an askem hem moa fo duim samting fo stopem ravis plan ya.

⁴ Nao king hemi holem wokingstik blong hem ya, wea olketa wakem long gol, an poentem go long Esta. So, Esta hemi stanap, an hemi tok olsem,

⁵ “King, sapos plan wea bae mi talem hemi oraet nomoa long yu, plis mi laekem yu fo mekem wanfala strongfala toktok fo stopem datfala toktok blong Haman, an yu sendem go long olketa man blong yu. Datfala plan blong Haman fo kilim dae mifala olketa Jiu, hemi stap yet.

⁶ King, sapos datfala plan hemi gohed, bae mi sore tumas, bikos bae olketa kilim dae olketa pipol blong mi an olketa laen blong mi. Hemi moabeta fo mi mas dae wetem olketa tu.”

⁷ Long datfala taem, Modekae blong Jiu hemi stap tu, an king hemi tok olsem long tufala, “Yutufala save. Mi bin letem fo olketa hangem Haman from plan wea hemi mekem agensim olketa pipol blong yutufala, an mi givim finis evrisamting blong hem long yu Esta.

⁸ Bat toktok blong mi wea olketa raetemdaon wetem mak blong mi long hem, hemi stap nao an no eniwan save sensim moa. Bat yutufala save raetem wanfala niufala toktok fo helpem olketa Jiu. Bae yutufala raetem wanem nao hemi gud long maen blong yutufala, an yusim ring blong mi fo putum mak blong mi long hem, an yutufala sendem go long nem blong mi.”

⁹ Long mektuenti-tri de blong mektri mans ya, wea nem blong hem nao Sivan, Modekae hemi kolem kam olketa sekretri blong king, an olketa raetemdaon wanfala toktok long nem blong king. Toktok ya hemi go fo olketa Jiu, wetem olketa minista blong king, an olketa gavna an olketa bikman blong 127 provins insaet long kingdom ya, stat long kantri blong India long ist, go kasem kantri blong Kus long west. Hemi gohed fo toktok, an olketa gohed fo raetemdaon olketa toktok blong hem. An olketa tanem toktok ya go long olketa langguis blong evri provins, an olketa tanem go tu long Hibru langguis wea hemi langguis blong olketa Jiu.

¹⁰ An Modekae hemi talem olketa fo raetem olketa toktok ya long nem blong King Sekses, an hemi yusim ring blong king fo putum mak long hem. An olketa man fo karim mesij i tekem olketa nambawan hos blong king wea i save ran kuiktaem tumas, an tekem olketa toktok ya go long evri ples.

^11-12 Toktok ya hemi talem dat olketa Jiu hu i stap long evri taon olsem, bae olketa evriwan mas kam tugeta long de ya wea Haman hemi putum fo olketa man fo kam an kilim dae olketa Jiu. So, olketa mas redim olketa seleva long datfala de fo faet fo sevem laef blong olketa. Leta ya hemi tok olsem, “Long mektetin de blong mektuel mans ya long datfala yia, bae yufala mas redi fo faet. Nomata yufala stap long olketa provins insaet long kingdom blong mi, sapos eniwan hemi tekem kam olketa samting fo faet, an kam fo kilim yufala dae wetem olketa pikinini an olketa waef blong yufala, bae yufala mas faetem olketa. Long datfala de, bae yufala garem raet fo kilim dae olketa pipol hu i kam fo faetem yufala, an bae yufala save tekem evrisamting wea olketa bin onam. Hem nao toktok blong mi fo yufala evriwan, long olketa provins insaet long kingdom blong mi.”

¹³ Olketa bikman blong king mas talemaot toktok ya fo kamap olsem lo fo evri pipol long evri provins, mekem evri Jiu mas redim olketa seleva fo faetem olketa enemi blong olketa long datfala de.

¹⁴ So, olketa man fo karim mesij i tekem olketa toktok ya, an resis go fo givimaot nao olsem wea king bin talem fo olketa. An olketa talemaot tu olketa toktok ya long Susa, mekem evriwan save herem.

¹⁵ Modekae hemi goaot from ples blong king, an hemi werem olketa spesol blu an waet kaleko blong king, an hemi werem tu wanfala longfala kaleko wea hemi papol, an hemi werem wanfala nambawan gol kraon. Nao evri pipol long evri ples insaet long Susa i gohed fo singaot bikfala, bikos olketa barava hapi tumas.

¹⁶ Olketa Jiu i barava hapi tumas, bikos olketa save dat olketa i win finis.

¹⁷ An long evri taon long evri provins wea olketa talemaot disfala toktok blong king, olketa Jiu i holide an i gohed fo mekem fist bikos olketa hapi tumas. An taem samting ya hemi hapen, plande long olketa narafala pipol i talem dat olketa tu i blong Jiu, bikos olketa fraetem olketa Jiu.