Esta 7 - Pijin Bible

Haman hemi dae

¹ So, king wetem Haman i go nao fo kaikai moa wetem Esta.

² An taem trifala gohed fo dringim waen, king hemi askem hem olsem, “Kuin Esta, sapos yu talem mi wanem nao yu laekem, bae mi save givim long yu distaem. Nomata yu askem haf long olketa samting wea mi garem, bae mi save givim nomoa ya.”

³ Esta hemi tok olsem, “King. Sapos yu hapi nomoa fo givim mi wanem bae mi askem, plis mi laekem tumas fo yu sevem laef blong mi wetem laef blong olketa pipol blong mi.

⁴ Wanfala man bin peimaot finis olketa pipol blong mi mekem hemi save kilim mifala evriwan dae. Sapos hemi bin peimaot mifala fo waka olsem slev nomoa, bae mi save stap kuaet, an mi no save mekem trabol fo yu olsem. Bat hemi planem fo kilim mifala evriwan dae.”

⁵ So, king hemi askem Esta olsem, “?Hu nao hemi laek fo duim disfala samting? ?An wea nao hemi stap?”

⁶ Esta hemi tok olsem, “!Enemi ya hu hemi laek fo spoelem mifala, hem nao disfala nogud man Haman!” Taem Haman hemi herem diswan, hemi barava fraet tumas frant long king an kuin.

⁷ King hemi barava kros fogud, so hemi stanap an hemi go aotsaet. Haman hemi savegud nao dat bae king hemi kilim hem dae. So hemi stap baek insaet fo askem Esta, mekem hemi save sevem laef blong hem.

⁸ King hemi kam baek insaet long haos, barava long taem wea Haman hemi foldaon go antap long longfala sea wea Esta hemi leidaon long hem, an hemi krae go long Esta fo sore long hem. An taem king hemi lukim hem, hemi singaot olsem nao, “!Ei! ?Wanem nao disfala man hemi duim? ?Waswe, hemi trae fo fosim waef blong mi fo durong wetem hem insaet long haos blong mi, an long ae blong mi?” Taem king hemi toktok yet, seknomoa olketa wakaman blong hem i kam nao an kavaremap fes blong Haman.

⁹ An wanfala long olketa wea nem blong hem Habona, hemi tok olsem, “King. Man ya hemi mekem finis wanfala ples fo hangem man long hem, kolsap long haos blong hem, wea hae blong hem hemi kasem tuenti-faev mita. Hemi bin mekem fo hangem Modekae long hem. Bat Modekae nao bin sevem laef blong yu.” So, king hemi tok olsem, “!Oraet! !Yufala go an hangem Haman long hem!”

¹⁰ Olketa tekem go Haman, an hangem hem nao long ples wea hemi bin mekem fo hangem Modekae long hem. Bihaen, kros blong king hemi jes finis nao.