Esta 2 - Pijin Bible

Esta hemi kamap kuin

¹ Bihaen, taem kros blong King Sekses hemi finis, bat hemi gohed fo tingim nomoa samting ya wea Kuin Vasti bin duim long hem, wetem niu lo ya wea hemi bin talemaot agensim hem.

² An from diswan nao, samfala long olketa advaesa blong hem hu i stap kolsap long hem oltaem, i kam an tok olsem long hem, “King, hemi gud tumas sapos yu sendem olketa man blong yu fo go lukaotem samfala yang gele hu i luknaes tumas, an no eniwan bin slip wetem hem yet.

³ So, yu mas siusim samfala bikman long evri provins long disfala kingdom, fo lukaotem kam samfala yang gele, an tekem kam long taon long Susa, fo stap long haos blong olketa waef blong yu. An wakaman blong yu Hagae hu hemi gohed fo lukaftarem olketa namba tu waef blong yu, hem nao bae hemi gohed fo lukaftarem olketa. Bae hemi gohed fo givim gudfala oel long olketa fo rabem long bodi blong olketa mekem olketa luknaes moa.

⁴ Bihaen, sapos yu lukim eniwan long olketa wea yu laekem tumas, bae yu save mekem hemi kamap kuin, fo sensim Kuin Vasti.” Taem king hemi herem disfala advaes wea hemi gud tumas, hemi falom nao.

⁵ Oraet, wanfala man blong Jiuda hemi stap long Susa, wea nem blong hem nao Modekae. Hemi san blong Jaea, an Jaea hemi san blong Simei, wea grani blong hem nao Kis hu hemi wanfala long traeb blong Benjamin bifoa.

⁶ Long taem wea King Nebukadnesa blong Babilon hemi winim King Jehoeakin blong Jiuda long Jerusalem, hemi fosim King Jehoeakin wetem olketa pipol blong hem fo lusim lan blong olketa an go long ples blong hem. Wanfala long olketa pipol ya nao hemi wanfala long olketa olo grani blong Modekae.

⁷ Modekae hemi garem wanfala kasin sista wea nem blong hem nao Esta, bat long langguis blong olketa Jiu, olketa kolem hem Hadasa. An hemi wanfala gele hu hemi barava luknaes fogud. An taem dadi an mami blong hem i dae, Modekae nao hemi adoptem hem. Dadi ya blong Esta, nem blong hem nao Abihael. Hemi wanfala angkol blong Modekae.

⁸ Bihaen wea olketa bikman blong king i talemaot toktok ya long evri provins, olketa tekem kam nao plande gele long Susa, fo stap long haos blong king. An olketa tekem tu Esta wetem olketa ya. Hagae nao hemi lukaftarem haos blong olketa woman blong king.

⁹ Hemi hapi tumas long Esta. So, kuiktaem nomoa hemi tekem kam olketa gudfala oel, an givim long hem mekem hemi rabem long bodi blong hem, an hemi givim tu olketa spesol kaikai long hem. Hemi mekem hem fo stap insaet long wanfala nambawan rum long haos ya blong olketa gele, an hemi siusim tu sevenfala wakagele long haos blong king, fo waka fo hem.

¹⁰ Esta hemi nating talemaot dat hemi wanfala Jiu, bikos Modekae hemi advaesim hem finis fo no talemaot.

¹¹ An evri de nomoa, Modekae save wakabaot frant long haos ya, mekem hemi save dat Esta hemi stap gudfala o nomoa, an fo save long wanem nao bae hemi hapen long hem.

¹² An olketa gele ya i gohed fo wanfala yia, fo mekem bodi blong olketa hemi luknaes. Long fas siks mans, olketa gohed fo rabem gudfala oel wea hemi smel naes tumas long bodi blong olketa, an long mektu siks mans, olketa gohed fo rabem narakaen gudfala oel moa wea hemi smel naes tumas. Bihaen, Hagae hemi tekem olketa gele ya, wanfala long wanfala taem fo go stap wetem king.

¹³ Taem wanfala gele hemi redi fo lusim haos blong olketa fo go stap wetem king, hemi save tekem enisamting wea hemi laekem long olketa nambawan kaleko an olketa narafala samting moa wea hemi barava luk spesol fogud.

¹⁴ Hemi go stap wetem king fo wanfala naet, an long moning, olketa tekem hem go fo stap wetem olketa namba tu waef blong king long haos blong olketa, wea Saasgas hu hemi wakaman blong king nao hemi lukaftarem. Gele ya save gobaek nomoa fo lukim moa king, sapos king hemi laekem hem tumas, an hemi talem kam nem blong hem.

^15-18 Long mekten mans, wea nem blong hem nao Tebet, long mekseven yia wea King Sekses hemi rul, hemi kasem taem nao fo olketa tekem go Esta fo go an stap wetem king. Gele ya hemi barava luknaes fogud, an olketa pipol hu i lukim hem, i hapi tumas long hem. Long taem ya, hemi werem nomoa olketa kaleko wea Hagae hemi talem long hem fo werem. Esta hemi go lukim king nao, an king hemi barava laekem hem tumas winim evri narafala gele ya. So, hemi putum spesol kraon blong kuin long hed blong hem, an hemi mekem hem fo sensim Kuin Vasti. Bihaen, king hemi mekem wanfala bikfala fist fo mekhae long niu waef blong hem, Kuin Esta, an hemi kolem olketa minista wetem olketa narafala bikman blong hem fo kam long fist ya. An hemi givim olketa gudfala presen wea king save givim go long olketa pipol blong hem, an hemi talemaot dat evri pipol insaet long kingdom ya, bae i garem holide.

Modekae hemi sevem laef blong King Sekses

¹⁹ Long mektu taem wea olketa gele ya i kam tugeta, king hemi mekem Modekae fo kamap wanfala minista blong hem.

²⁰ Esta hemi nating talemaot yet wea hemi wanfala Jiu, bikos Modekae hemi talem hem finis fo no talemaot long eniwan. Hemi gohed yet fo obeim Modekae, barava olsem wea hemi bin gohed fo duim bifoa, long taem wea hemi smolfala gele yet, an Modekae bin gohed fo lukaftarem hem.

²¹ Long taem wea Modekae hemi waka olsem minista long haos blong king, Biktana an Teres, tufala wakaman hu i gadem geit long haos blong king, tufala kros long king, an mekem plan fo kilim hem dae.

²² Bat Modekae hemi faendemaot plan ya, an hemi talem Kuin Esta abaotem datfala samting. Bihaen, Esta hemi sendem go mesij long king.

²³ Taem olketa man blong king i faendemaot gudfala moa abaotem nius ya, olketa jes save dat samting ya hemi tru nao. So, olketa kasholem tufala, an hangem tufala dae. Nao king hemi talem olketa man blong hem fo raetemdaon ripot abaotem samting ya insaet long buk long olketa ripot blong evri impoten samting wea hemi hapen insaet long kingdom blong hem.