Esta 10 - Pijin Bible

King Sekses hemi barava mekhae long Modekae

¹ King Sekses hemi mekem wanfala lo fo fosim evri pipol long evri ples insaet long kingdom blong hem wea hemi go-go kasem long saet si, mekem olketa evriwan i mas waka had fo peim taks.

² Olketa raetemdaon evri bikfala samting wea king bin duim an abaotem hao hemi mekem Modekae fo kamap bikman insaet long kingdom blong hem. Olketa raetem olketa stori ya insaet long ripot buk blong olketa king blong Pesia an Media. Olketa raetem tu ripot abaotem bikfala paoa blong King Sekses.

³ Modekae ya blong Jiu hemi kamap nambawan man blong King Sekses. An oltaem, olketa Jiu i tinghae fogud long hem, bikos hemi wakahad tumas fo mekem olketa pipol blong hem an olketa wea bae i bon kam bihaen fo stap gudfala.