Esra 5 - Pijin Bible

Olketa Jiu stat moa fo wakembaek Tambuhaos blong Yawe

¹ Long datfala taem, Profet Hagae, an Profet Sekaraea, hu hemi long laen blong Ido, wea tufala i profet long olketa Jiu long Jerusalem an olketa narafala pat blong Jiuda, tufala talemaot profesi long olketa long nem blong God blong Israel.

² Taem tufala Serababel, san blong Sealtiel, an Haeprist Jesua, san blong Jehosadak, i herem olketa profesi ya, tufala statem moa disfala waka long Tambuhaos ya blong God long Jerusalem. An tufala profet ya blong God i helpem olketa.

³ Bat long datfala taem tu, Tatenae, hu hemi gavna blong provins ya long west saet blong Yufretis Riva, an Seta-Bosenae wetem olketa narafala bikman blong provins ya, olketa kam long Jerusalem, an askem olketa olsem, “?Hu nao givim raet long yufala fo statem moa fo bildimbaek disfala Tambuhaos, an fo redim olketa ston an timba blong hem?”

⁴ Olketa askem tu olsem, “?Hu nao nem blong olketa man hu i lidim disfala waka long Tambuhaos ya?”

⁵ Bat God hemi lukaftarem olketa lida ya blong olketa Jiu. Olketa bikman blong provins ya i raetem wanfala leta go long King Darias fastaem, an olketa weit nao fo ansa long leta ya, mekem olketa no stopem waka ya.

⁶ Hem ya nao disfala leta wea Tatenae, hu hemi gavna blong provins ya long west saet blong Yufretis Riva, an Seta-Bosenae wetem olketa narafala bikman blong provins ya, olketa raetem go long King Darias.

⁷ Olketa sendem ripot wea hemi olsem, “King Darias. Mifala sendem nambawan griting go long yu.

⁸ “King. Mifala laekem fo talemaot long yu, wea mifala bin visitim distrik long Jiuda, an mifala lukim dat olketa pipol gohed fo wakem wanfala niufala Tambuhaos blong Bikfala God. Olketa yusim olketa bikfala ston wea olketa katem, an olketa putum olketa bikfala timba insaet long olketa wol blong hem. Olketa gohed fo wakahad tumas fo mekem evrisamting blong Tambuhaos ya hemi mas stret gudfala, an waka ya hemi gohed gud tumas.

⁹ “So, mifala askem olketa lida olsem, ‘?Hu nao givim raet long yufala fo statem moa fo bildimbaek disfala Tambuhaos, an fo redim olketa ston an timba blong hem?’

¹⁰ Mifala askem tu nem blong olketa, mekem mifala save putum insaet long disfala ripot long yu, hu nao olketa lida blong waka ya.

¹¹ “Hem ya nao ansa blong olketa. Olketa tok olsem, ‘God blong mifala nao, hemi God blong heven an disfala wol, an mifala i wakaman blong hem. Mifala gohed fo wakembaek moa disfala Tambuhaos wea wanfala strongfala king blong Israel nao hemi bin wakem longtaem bifoa.

¹² Bat bikos olketa grani blong mifala bifoa i mekem God ya blong heven hemi kros, hemi letem King Nebukadnesa blong Babilonia, hu hemi man blong Kaldia nao, fo winim mifala an tekova long lan blong mifala. Hemi brekemdaon Tambuhaos ya finis, an hemi fosim olketa olo blong mifala fo lusim lan, an fo go stap long Babilonia.

¹³ “ ‘Bihaen, long fas yia wea King Saeras hemi rul long Babilonia, king ya hemi givimaot strongfala toktok fo wakembaek moa disfala Tambuhaos blong God.

¹⁴ Hemi givim kambaek long mifala evri tambu samting fo wosip blong Tambuhaos ya, wea olketa bin wakem long gol an silva. King Nebukadnesa nao bin tekemaot olketa samting ya, an putum go long haos blong god blong hem long Babilon. Bat King Saeras hemi tekemaot olketa samting ya, an givim long Sesbasa, hu hemi gavna blong distrik long Jiuda.

¹⁵ King hemi talem hem fo tekem olketa samting ya gobaek long Jerusalem, an fo wakembaek moa Tambuhaos long sem ples wea hemi stap long hem bifoa, an fo putum olketa tambu samting insaet long Tambuhaos ya.

¹⁶ So Sesbasa hemi go, an hemi putum faondesin blong Tambuhaos ya. Stat long datfala taem ka-kam kasem tude, waka long disfala Tambuhaos hemi gohed, bat haos ya hemi no finis yet.’ Hem nao toktok blong olketa.

¹⁷ “King. Sapos yu fil hapi fo duim nomoa, bae yu talem olketa wakaman blong yu fo luklukgud long olketa rekod buk ya blong Babilon, fo faendemaot hemi tru wea King Saeras nao bin givimaot disfala strong toktok fo wakembaek moa Tambuhaos ya long Jerusalem, o nomoa. An taem olketa faendemaot wea hemi tru o nomoa, plis yu sendem mesij long mifala fo talem mifala wanem nao tingting blong yu long disfala bisnis.”