Esikiel 41 - Pijin Bible

^1-2 Den man ya hemi tekem mi go insaet long disfala Tambu Rum, an hemi mesarem doa blong hem. Waed blong doa ya hemi faev mita, an hemi garem wol long tufala saet. Long wanfala saet hemi tu an haf mita waed, an long narasaet hemi semsem. An tik blong tufala wol wea doa ya hemi stap midol long tufala hemi tri mita. Hemi mesarem tu rum insaet, an waed blong hem hemi ten mita, an longfala blong hem hemi tuenti mita.

³ Nao man ya hemi go insaet long neks rum insaet long disfala haos, an hemi mesarem doa blong hem. Waed blong hem hemi kasem tri mita, an tik blong wol hemi wan mita, an waed blong wol long tufala saet blong doa ya hemi tri an haf mita.

⁴ Hemi mesarem tu disfala rum insaet. Rum ya hemi skuea, wea fofala saet blong hem hemi ten mita. Rum ya hemi bihaen long Tambu Rum, an man ya hemi tok olsem long mi, “Diswan nao hemi Barava Tambu Rum.”

Olketa rum saet long Tambuhaos blong Yawe

^5-7 Man ya hemi mesarem tik blong olketa wol long aotsaet blong Tambuhaos, an tik blong olketa hemi tri mita. Aotsaet long olketa wol blong Tambuhaos ya, narafala haf long haos ya moa hemi joen long wol ya, wea hemi garem tri stori long hem. Long trifala stori ya, hemi garem teti smolfala rum, wea evriwan long olketa hemi tu mita waed. Raonem Tambuhaos ya long saet long not, an long west, an long saot, hemi garem ples long wol wea olketa timba blong olketa rum aotsaet i save sidaon antap gudfala long pat long wol, mekem no eni timba hemi go insaet long wol blong Tambuhaos. Trifala stori ya i raonem Tambuhaos long trifala saet. Olketa rum long stori wea hemi antap i bikfala winim olketa rum long mektu stori. An rum long mektu stori i bikfala winim olketa rum long stori wea hemi long daon. Hem nao Tambuhaos ya hemi waed moa antap winim long daon.

⁸ Mi luk godaon, an mi lukim dat faondesin blong Tambuhaos ya an olketa rum aotsaet hemi stanap tri mita hae winim olketa graon raonem Tambuhaos.

^9-11 Aotsaet wol long olketa rum ya, tik blong hem hemi tu an haf mita. Eria fo wakabaot raonem olketa rum ya, waed blong hem hemi kasem tu an haf mita. An stat long aotsaet long wol ya go-go long aotsaet long disfala faondesin hemi kasem ten mita. An long disfala open eria, hemi garem doa fo go insaet long olketa rum ya long saet long not, an olketa garem doa tu fo go insaet long saet long saot.

Bikfala haos wea hemi stap long west saet

¹² Long en long open eria long west saet long Tambuhaos blong Yawe, wanfala bikfala haos hemi stap, wea longfala blong hem hemi foti-faev mita an waed blong hem hemi teti-faev mita. Tik blong olketa wol blong hem hemi tu an haf mita.

Ful mak long haos blong Yawe

¹³ Man ya hemi mesarem aotsaet long Tambuhaos ya blong Yawe, an longfala blong hem hemi fifti mita. Stat long bihaen blong Tambuhaos ya fo go akros long open eria ya, go-go kasem bihaen long narafala haos long west saet, hemi fifti mita.

¹⁴ An stat frant long Tambuhaos ya blong Yawe go kasem tufala en long tufala open eria long tufala saet blong hem, hemi fifti mita.

¹⁵ Hemi mesarem longfala blong haos ya long west saet wetem olketa rum long aotsaet blong hem, hem tu hemi fifti mita. Olketa wol insaet long Tambu Rum, an insaet long varanda long frant long Tambuhaos,

Olketa samting long haos blong Yawe

¹⁶ olketa kavarem long olketa pis timba. Olketa kavarem tu long olketa pis timba olketa pos blong olketa geit an olketa doa, an olketa frem blong olketa windo, wetem olketa floa. An olketa dekoretem olketa wol ya wetem olketa pis timba wea hemi raonem go rum ya.

^17-18 Olketa katemaot piksa blong olketa enjel an olketa pam tri falom olketa wol insaet long Tambuhaos ya an aotsaet long Tambuhaos, stat long botom go-go winim doa long antap. Olketa katem wanfala piksa blong pam tri, den olketa katem wanfala piksa blong enjel, den wanfala pam tri moa, den narafala enjel moa. Olketa du-duim olsem go-go olketa finisim evri wol blong olketa rum ya. Evri enjel ya i garem tufala fes.

¹⁹ Wanfala, hemi fes blong man wea hemi luk go long pam tri long wanfala saet, an narawan hemi fes blong laeon wea hemi luk go long narafala pam tri narasaet. Olketa piksa ya i raonem evri wol insaet long datfala haos.

²⁰ Hemi stat long floa goap go-go winim olketa doa long antap.

²¹ Olketa skuea pos nao i stap long doa blong disfala Tambu Rum, an pos blong doa blong Barava Tambu Rum tu i skuea.

²² Wanfala olta wea olketa mekem long timba, hemi stap long ples ya. Hae blong hem hemi wan an haf mita, an hemi skuea wea evri saet blong hem hemi kasem wan mita. Olketa mekem kona blong hem, an botom blong hem wetem olketa saet blong hem long timba. Man ya hemi tok olsem long mi, “Diswan nao hemi tebol wea oltaem hemi stanap frant long Yawe.”

Olketa doa long Tambuhaos blong Yawe

²³ Disfala Tambu Rum, an Barava Tambu Rum ya, tufala evriwan i garem dabol doa.

²⁴ Tufala doa ya evriwan i garem tufala pat long hem wea wanfala hemi open go long insaet long rum, an narawan hemi open go long aotsaet long rum.

²⁵ Hemi garem tu olketa piksa blong olketa pam tri an olketa enjel wea olketa katem long tufala doa blong Tambu Rum ya, olsem wea olketa katem falom olketa wol. An aotsaet long doa blong varanda ya, olketa wakem samting long timba wea hemi save blokem man fo luk go insaet long doa ya.

²⁶ Long olketa saet blong varanda ya, hemi garem olketa windo wea olketa katem piksa blong olketa pam tri long tufala saet blong hem. An olketa rum ya long olketa saet blong Tambuhaos ya i garem tu olketa samting long timba wea hemi save blokem man fo luk go insaet long hem.