Esikiel 40 - Pijin Bible

Niufala Tambuhaos blong Yawe ( 40:1—48:35 ) Yawe hemi tekem Esikiel go long Jerusalem

¹ Long mekten de long fas mans long mektuenti-faev yia from taem wea olketa bin fosim mifala fo kam stap long Babilonia, Yawe hemi tasim mi long paoa blong hem, an hemi tekem mi go long Jerusalem. Hem nao mekfotin yia bihaen long taem wea olketa enemi i spoelem taon ya.

² Insaet long wanfala spesol drim, mi lukim dat Yawe hemi tekem mi go long Israel, an hemi putum mi antap long wanfala hae maonten. Taem mi luk go long saot, mi lukim plande haos wea i stap tugeta olsem wanfala bik taon.

³ Hemi tekem mi go kolsap moa, an mi lukim wanfala man wea bodi blong hem hemi saen fogud olsem bras. Hemi stanap long geit blong taon ya, an hemi holem wanfala longfala rula an wanfala teip fo mesarem wea i wakem long nambawan waet kaleko.

⁴ Man ya hemi tok olsem long mi, “Man blong graon. Yu mas lukluk gud, an lisin kam gudfala, an tingting gudfala long olketa samting wea bae mi som long yu distaem, bikos mi tekem yu kam long hia fo talemaot long olketa blong Israel, evrisamting ya wea yu lukim.”

Geit blong Tambuhaos wea hemi stap long ist saet

⁵ Taem mi luk go, mi lukim wanfala wolston wea hemi barava raonem open eria blong Tambuhaos ya. Disfala rula wea man ya hemi holem, longfala blong hem hemi kasem tri mita. An man ya hemi mesarem disfala wolston, an hae blong hem hemi kasem tri mita, an tik blong hem hemi kasem tri mita.

⁶ Bihaen, hemi go long geit wea hemi fesim go long ist. Hemi goap long olketa step an hemi mesarem tik blong wol long saet blong geit ya wea hemi tri mita, stat long aotsaet go-go kasem insaet.

⁷ Olketa rum blong olketa sekiuriti hemi tri mita long an tri mita waed. An olketa wol wea hemi stap midol long olketa rum ya, hemi tu an haf mita tik. Long en long rod long midol long olketa rum blong sekiuriti, mi lukim wanfala varanda wea hemi fesim kam long Tambuhaos. Waed blong geit wea hemi goaot long varanda ya hemi kasem tri mita.

⁸ Den hemi mesarem varanda ya,

⁹ wea hemi kasem foa mita. An tik blong wol long tufala saet long geit hemi kasem wan mita. Varanda ya hemi stap long en blong rod fo go long Tambuhaos ya.

¹⁰ Trifala rum blong olketa sekiuriti stap long wanfala saet blong rod ya, an trifala rum i stap long narasaet long rod, an saes blong olketa evriwan hemi semsem nomoa. An olketa wol long midol long olketa, tik blong olketa evriwan hemi semsem nomoa.

¹¹ Bihaen, datfala man hemi mesarem rod wea hemi gotru long geit ya, an waed blong hem hemi kasem faev mita. Hemi mesarem waed blong rod wea hemi pas tru midol long siksfala rum ya blong olketa sekiuriti wea hemi siks an haf mita.

¹² Frant long evri rum blong olketa sekiuriti, hemi garem wanfala wol wea hae blong hem hemi kasem fifti sentemita nomoa, an tik blong hem tu hemi kasem fifti sentemita. Evri rum ya hemi skuea, an evri saet hemi kasem tri mita.

¹³ Man ya hemi joenem mak blong tufala rum ya stat long wol long baek blong wanfala rum, wetem waed blong rod wea hemi pas tru midol long siksfala rum ya, go-go kasem wol long baek blong rum wea hemi stap narasaet long hem, hemi kasem tuel an haf mita.

¹⁴ Den man ya hemi mesarem hae blong tufala saet blong geit wea hemi stap midol long disfala varanda an open eria ya frant long Tambuhaos. Hemi kasem teti mita. An disfala haos blong geit wetem olketa rum blong sekiuriti an varanda, hemi stap insaet long open eria frant long Tambuhaos, mekem open eria ya hemi raonem haos ya long trifala saet long hem.

¹⁵ Longfala blong disfala rod wea hemi stat long geit an hemi go pas long varanda ya, go-go kasem open eria ya insaet, hemi kasem tuenti-faev mita.

¹⁶ Evri rum ya i garem olketa smolfala windo, an olketa wol nao hemi divaedem olketa rum ya. Olketa windo ya, i smol long aotsaet, bat hemi open bikfala long insaet. Olketa piksa long olketa pam tri nao olketa katem falom olketa wol midol long olketa rum ya.

Bikfala open eria long Tambuhaos

¹⁷ Den man ya hemi tekem mi go insaet long bikfala open eria aotsaet long Tambuhaos. Olketa mekem tetifala rum insaet, bihaen long bikfala wol wea hemi stap raonem datfala bikfala open eria. Frant long olketa rum ya an raonem disfala bikfala open eria, olketa putum olketa flat ston fo mekem floa wea pipol save wakabaot long hem.

¹⁸ Long tufala saet long haos blong geit, disfala floa hemi falom go wol raonem bikfala open eria ya. An waed blong disfala floa hemi semsem olsem longfala blong haos blong geit wea hemi kamaot long open eria ya. Stat long floa ya fo wakabaot, man mas goap lelebet fo kasem smolfala open eria kolsap long Tambuhaos.

¹⁹ Den stat long disfala geit go kasem wol wea hemi raonem smolfala open eria kolsap long Tambuhaos ya, hemi mesarem longfala blong hem wea hemi kasem fifti mita. Bihaen hemi mesarem finis disfala geit long ist saet, man ya hemi tekem mi go moa long geit long not saet.

Geit blong Tambuhaos wea hemi stap long not saet

²⁰ Hemi mesarem longfala an waed blong disfala geit long not, fo go insaet long bikfala open eria ya.

²¹ Tufala saet blong datfala rod wea hemi pas gotru long geit ya, hemi garem siksfala rum fo olketa sekiuriti, trifala long wanfala saet an trifala long narasaet, an wol nao hemi divaedem olketa. Olketa rum wetem varanda ya long geit, an olketa wol wea hemi divaedem olketa, mak blong olketa evriwan hemi semsem nomoa olsem geit long ist saet. Longfala blong haos blong geit ya hemi kasem tuenti-faev mita, an waed blong hem hemi kasem tuel an haf mita.

²² Varanda long geit, an olketa windo, an olketa piksa blong olketa pam tri wea olketa katem long wol, evriwan i semsem nomoa olsem olketa long geit ya long ist saet. Sevenfala step nao hemi goap long lada wea hemi go fo geit ya long aotsaet. Long narafala en blong disfala haos blong geit ya, hemi garem varanda wea hemi fesim go bikfala open eria ya.

²³ Wanfala geit hemi stap long narasaet long bikfala open eria ya, an hemi fes go long not, barava olsem tu narawan long narasaet wea hemi fes go long ist. Datfala man hemi mesarem bikfala open eria ya, stat long geit fo go aotsaet, go-go kasem geit fo go insaet long smolfala open eria ya insaet, hemi kasem fifti mita.

Geit blong Tambuhaos wea hemi stap long saot saet

²⁴ Den disfala man hemi tekem mi go long saot saet, an mi lukim wanfala geit moa wea hemi stap long saot saet. Hemi mesarem tik blong wol long tufala saet long geit wetem varanda insaet long bikfala open eria ya, an olketa sem nomoa olsem olketa narawan.

²⁵ An hemi garem olketa windo long varanda long geit an long olketa rum insaet long rod ya, olsem olketa narawan ya nomoa. Longfala blong haos blong geit ya hemi tuenti-faev mita, an waed blong hem hemi tuel an haf mita.

²⁶ Sevenfala step nao hemi stap long lada wea hemi goap fo geit ya, an varanda nao hemi stap insaet wea hemi fesim go bikfala open eria ya insaet. Piksa blong tufala pam tri nao olketa katem insaet long tufala saet blong geit ya.

²⁷ Wanfala geit hemi stap long narasaet long bikfala open eria ya, an hemi fes go long saot. Man ya hemi mesarem bikfala open eria ya, stat long geit fo go aotsaet, go-go kasem geit fo go insaet long smolfala open eria ya, hemi kasem fifti mita.

Smolfala open eria ya long insaet an geit wea hemi fesim saot

²⁸ Man ya hemi tekem mi long disfala haos blong geit long saot saet, wea hemi go insaet long datfala smolfala open eria wea hemi stap kolsap long Tambuhaos. Hemi mesarem disfala geit ya, an hemi semsem nomoa olsem olketa narafala geit.

²⁹ Olketa rum blong olketa sekiuriti, an olketa wol saet long rod ya, an varanda, evriwan i semsem nomoa olsem olketa narafala geit. Disfala varanda an olketa rum ya i garem olketa windo tu. Longfala blong disfala haos blong geit tu hemi tuenti-faev mita, an waed blong hem hemi tuel an haf mita.

³⁰ Raonem smolfala open eria hemi garem olketa varanda wea longfala blong olketa hemi tuel an haf mita, an waed blong olketa hemi tu an haf mita.

³¹ Varanda hemi fesim go bikfala open eria ya, an hemi garem piksa long pam tri wea olketa katem long wol blong tufala saet long datfala geit, an hemi garem eitfala step long lada wea hemi goap fo geit ya.

Smolfala open eria ya long insaet an geit wea hemi fesim ist

³² Den man ya hemi tekem mi long disfala haos blong geit long ist saet, wea hemi go insaet long datfala smolfala open eria wea hemi stap kolsap long Tambuhaos. Hemi mesarem disfala geit ya, an hemi semsem nomoa olsem olketa narafala geit.

³³ Olketa rum blong olketa sekiuriti, an olketa wol saet long rod ya, an varanda, evriwan i semsem nomoa olsem olketa narafala geit. Disfala varanda an olketa rum ya i garem olketa windo tu. Longfala blong disfala haos blong geit tu hemi tuenti-faev mita, an waed blong hem hemi tuel an haf mita.

³⁴ Varanda hemi fesim go bikfala open eria ya, an hemi garem piksa long pam tri wea olketa katem long wol blong tufala saet long datfala geit, an hemi garem eitfala step long lada wea hemi goap fo geit ya.

Smolfala open eria ya long insaet an geit wea hemi fesim not

³⁵ Man ya hemi tekem mi go long geit wea hemi fesim not. Hemi mesarem disfala geit ya, an hemi semsem nomoa olsem olketa narafala geit.

³⁶ Olketa rum blong olketa sekiuriti, an olketa wol saet long rod ya, an varanda, evriwan i semsem nomoa olsem olketa narafala geit. Disfala varanda an olketa rum ya i garem olketa windo tu. Longfala blong disfala haos blong geit tu hemi tuenti-faev mita, an waed blong hem hemi tuel an haf mita.

³⁷ Varanda hemi fesim go bikfala open eria ya, an hemi garem piksa long pam tri wea olketa katem long wol blong tufala saet long datfala geit, an hemi garem eitfala step long lada wea hemi goap fo geit ya.

Olketa rum fo redim olketa sakrifaes

³⁸ Kolsap long haos blong geit long not saet long bikfala open eria, mi lukim wanfala rum wea hemi barava kolsap long geit ya. Disfala rum hemi garem wanfala doa. Trifala haos blong geit ya evriwan hemi garem wanfala rum olsem. Hem nao ples wea olketa wasim olketa animol wea olketa kilim dae fo mekem sakrifaes wea hemi barava bone.

³⁹ Fofala tebol nao i stap long varanda ya long geit. Tufala long olketa tebol ya i stap long wanfala saet long geit, an tufala tebol long narafala saet. Olketa tebol ya nao, man hemi kilim dae olketa animol antap long olketa fo sakrifaesim. Hem nao olketa sakrifaes wea hemi barava bone, an olketa sakrifaes fo mekem man stret moa long ae blong Yawe, an olketa sakrifaes fo mekem kompensesin.

⁴⁰ Fofala tebol tu i stap aotsaet long varanda long geit long not saet, kolsap long lada wea hemi goap fo disfala geit. Tufala long olketa tebol ya i stap long wanfala saet long geit, an tufala tebol long narafala saet.

⁴¹ Fofala tebol nao i stap insaet long varanda, an fofala stap aotsaet long varanda, saet long bikfala open eria ya. So, eitfala tebol nao i stap, fo kilim dae olketa animol antap long olketa fo sakrifaesim.

⁴² Narafala fofala tebol moa wea olketa katem long ston i stap fo putum olketa naef an olketa narafala tul fo redim mit long hem fo mekem olketa sakrifaes wea hemi barava bone an olketa narafala sakrifaes tu. Evri tebol ya i garem sem saes nomoa. Hae blong olketa hemi fifti sentemita, an olketa evriwan i skuea, wea fofala saet blong evriwan hemi seventi-faev sentemita.

⁴³ Olketa hangem evri huk goraon falom wol blong rum ya. An longfala blong olketa huk ya hemi ten sentemita. Olketa putum evri mit fo sakrifaes antap long olketa ston tebol ya.

Olketa rum fo olketa prist

⁴⁴ Oraet, mi gotru long haos blong geit fo go insaet long smolfala open eria wea hemi stap kolsap long Tambuhaos, an mi lukim tufala rum nao hemi stap wea doa blong tufala hemi fesim go disfala smolfala open eria. Wanfala rum hemi stap kolsap long haos blong geit long not saet, an hemi fes go long saot, an narawan wea hemi stap kolsap long haos blong geit long ist saet, an hemi fes go long not.

⁴⁵ Man ya hemi tok olsem long mi, “Disfala rum wea hemi fes go long saot, hemi fo olketa prist hu i lukaftarem olketa waka insaet long Tambuhaos.

⁴⁶ An disfala rum wea hemi fes go long not, hemi fo olketa prist hu i lukaftarem olketa waka long olta. Tufala grup evriwan i olketa prist long laen blong Sadok, disfala Haeprist blong bifoa. Olketa long disfala traeb blong Livae nomoa, i garem raet fo kam kolsap long Yawe fo duim waka blong hem.”

Smolfala open eria ya an Tambuhaos blong Yawe

⁴⁷ Man ya hemi mesarem nao disfala smolfala open eria wea hemi stap kolsap long Tambuhaos. Hemi skuea, wea evri saet blong hem hemi fifti mita. Olta hemi stap midol long hem, barava frant long Tambuhaos ya blong Yawe wea hemi fes go long ist.

^48-49 Den hemi tekem mi go insaet long varanda long frant blong Tambuhaos. Wanfala lada hemi kamap fo geit blong haos ya, an tufala bikfala pos nao hemi stanap kolsap long disfala geit. Wanfala pos hemi stanap long wansaet, an narawan hemi stanap long narasaet. Man ya hemi mesarem geit, an waed blong hem hemi seven mita, an tik blong wol ya blong hem hemi tu an haf mita. An hemi mesarem tufala wol long saet blong geit ya wea long an tik blong tufala ya hemi wan an haf mita. Hemi mesarem tu varanda insaet, an longfala blong hem hemi ten mita, an waed blong hem hemi siks mita.