Esikiel 10 - Pijin Bible

Saen long bikfala paoa blong Yawe hemi lusim Tambuhaos

¹ Insaet long spesol drim ya, mi luk goap an mi lukim wanfala samting olsem bikfala sea blong king wea olketa wakem long disfala barava spesol ston olketa kolem sapia, an sea ya hemi stap antap long disfala ruf wea hemi stap ovam hed blong olketa enjel ya.

² Yawe hemi tok olsem long man ya hu hemi werem barava nambawan kaleko, “Yu go long midol long olketa wil ya wea hemi stap andanit long olketa enjel ya, an tekem samfala hot sakol long faea an torowem go olobaot antap long taon ya.” An taem mi gohed fo lukluk, hemi wakabaot go long midol long olketa wil ya.

³ Taem hemi go long midol long olketa wil, olketa enjel ya i gohed fo stanap nomoa long smolfala open eria long saot saet long Tambuhaos ya. Nao wanfala klaod hemi kamdaon an kavaremap eria ya nao.

⁴ Den saen long bikfala paoa blong Yawe, hemi muv goap from olketa enjel ya, an hemi muv go nao long doa blong Tambuhaos ya. Klaod ya hemi fulumap Tambuhaos nao, an bikfala paoa blong Yawe hemi saen bikfala fogud insaet long eria ya.

⁵ Noes long wing blong olketa enjel ya hemi bikfala tumas, mekem man save herem nomata hemi stanap farawe kam narasaet long bikfala open eria blong Tambuhaos. Noes ya hemi bikfala olsem voes blong Yawe hu hemi garem evri paoa taem hemi gohed fo tok.

⁶ Taem Yawe hemi talem long man ya hu hemi werem barava nambawan kaleko fo go tekem faea wea hemi stap long midol long olketa wil ya andanit long olketa enjel, hemi go an stanap nomoa saet long wanfala long olketa wil ya.

^7-8 Andanit long olketa wing, olketa enjel ya i garem samting wea hemi luk olsem han blong man. Nao wanfala long olketa enjel hemi stretem go han ya blong hem long faea wea hemi stap long midol long olketa. Hemi tekem samfala hot sakol long faea ya an putum insaet long han blong man ya hu hemi werem barava nambawan kaleko. Den hemi tekem faea ya an goaot nao.

⁹ Nao mi lukim fofala wil nao hemi stap, wanfala long saet long fofala enjel ya evriwan. Olketa wil ya i saen fogud olsem barava spesol ston olketa kolem tasis.

¹⁰ Evriwan long fofala wil ya i luk semsem nomoa, an evriwan garem narafala wil insaet long hem.

¹¹ Taem olketa wil ya i muv, olketa save muv go long eni saet wea fofala enjel ya i muv long hem, an no eniwan long olketa hemi tane taem olketa go long wanfala saet o long narafala saet. An olketa enjel i muv long eni saet wea hed ya hemi luk go long hem.

¹² Raonem ful bodi blong olketa, olsem long baeksaet, an long han, an long wing, an evri narafala pat moa, an long olketa wil tu, olketa ae nomoa hemi stap long hem.

¹³ An mi herem dat nem blong olketa wil ya nao, “Tan-tane.”

¹⁴ Olketa enjel ya evriwan i garem fofala fes. Wanfala hemi olsem fes blong enjel, an mektu hemi olsem fes blong man, an mektri hemi olsem fes blong laeon, an mekfoa hemi olsem fes blong igol.

¹⁵ Olketa enjel ya i sem nomoa olsem olketa laef samting wea mi bin lukim olketa saet long Keba Riva. Olketa muv goap,

¹⁶ an taem olketa goap, evri wil ya i goap wetem olketa tu. An taem olketa stretem wing blong olketa fo flae, olketa wil ya i gohed fo stap saet long olketa.

¹⁷ Taem olketa enjel i stap kuaet, olketa wil i stap kuaet tu, an taem olketa flae goap, olketa wil i goap wetem olketa tu, bikos paoa blong olketa laef samting ya hemi stap long olketa wil ya.

¹⁸ Nao saen long bikfala paoa blong Yawe, hemi lusim doa blong Tambuhaos ya, an hemi muv go antap long olketa enjel ya.

¹⁹ An taem mi gohed fo lukluk yet, olketa enjel ya i stretem olketa wing blong olketa an flae go antap nao wetem olketa wil ya. Olketa stop frant long geit long ist saet long Tambuhaos, an saen long bikfala paoa blong God blong Israel hemi saen antap long olketa.

²⁰ Mi luksave dat olketa enjel ya i sem nomoa olsem olketa laef samting wea mi bin lukim olketa saet long Keba Riva. Olketa nao bin stap andanit long God blong Israel.

²¹ Olketa evriwan i garem fofala fes, an fofala wing, an andanit long olketa wing ya olketa garem samting wea hemi luk olsem han blong man.

²² Fes blong olketa hemi luk semsem olsem mi bin lukim bifoa long Keba Riva. An olketa evriwan i gohed fo muv stret long saet wea hemi fesim go.