Eksodas 40 - Pijin Bible

Olketa stanemap Tambu Haostent ya an mektambu long hem

¹ Yawe hemi tok olsem long Mosis,

² “Long fas de, long fas mans blong neks yia, bae yu mas stanemap Tambu Haostent fo Mitim mi.

³ Yu mas tekem Tambu Boks long Spesol Agrimen, wea Tenkomanmen long tufala flat ston i stap insaet, nao yu putum go insaet long Tambu Haostent ya, an hangem go disfala kaleko fo divaedem rum ya long tufala haf, fo satem go disfala rum wea Tambu Boks ya hemi stap long hem.

⁴ Yu mas tekem Tebol fo Tambu Bred, an putum saet kam long kaleko ya, an putum olketa samting blong hem long hem. An yu mas tekem kam Spesol Frem fo putum Lam, an putum olketa lam antap long hem.

⁵ Yu mas tekem kam Olta fo Bonem Insens wea olketa bin kavarem hem long gol, an putum kolsap long bikfala kaleko wea hemi satem go Tambu Boks long Spesol Agrimen. An yu mas tekem narafala kaleko ya fo satem doa blong Tambu Haostent an hangem go long doa ya.

⁶ An bae yu mas tekem Olta fo Bonem Sakrifaes, an putum go frant long doa blong Tambu Haostent fo Mitim mi.

⁷ An yu mas tekem kam Bras Besin, an putum long midol long Olta fo Bonem Sakrifaes an Tambu Haostent, an fulumapem long wata.

⁸ An yu mas stanemap fens wetem longfala kaleko blong hem, raonem open eria blong Tambu Haostent, an hangemap bikfala kaleko fo satem long doa ya.

⁹ “Bae yu mas tekem tambu oel ya, an kapsaetem go lelebet long Tambu Haostent ya wetem evrisamting blong hem, fo mektambu long olketa samting fo mi, nao bae hemi kamap tambu.

¹⁰ An yu mas kapsaetem go lelebet tambu oel long Olta fo Bonem Sakrifaes, wetem evrisamting blong hem, fo mektambu long olketa fo mi, nao bae olta ya hemi kamap barava tambu.

¹¹ An yu mas kapsaetem go tu lelebet long Bras Besin ya wetem botom blong hem, fo mektambu long hem fo mi.

¹² “Bae yu mas tekem kam Eron wetem olketa san blong hem long doa blong Tambu Haostent ya, an wasim olketa long wata, mekem olketa klin long ae blong mi.

¹³ Nao bae yu mas tekem olketa spesol kaleko blong Eron, mekem hemi werem. An yu mas tekem tambu oel an kapsaetem go lelebet long hem, fo mektambu long hem, mekem hemi kamap prist fo duim waka fo mi.

¹⁴ An yu mas tekem kam tu olketa san blong hem, mekem olketa werem olketa spesol kaleko blong olketa.

¹⁵ Oraet, yu mas tekem tambu oel ya moa, an kapsaetem go lelebet long olketa olsem yu duim long dadi blong olketa, fo mektambu long olketa tu fo kamap prist, mekem olketa duim waka fo mi. Disfala wei fo mektambu long olketa prist nao, bae olketa mas yusim olowe nao fo mekem olketa ya an olketa hu bae i bon kam bihaen long olketa, fo kamap prist fo duim waka fo mi.”

¹⁶ An Mosis hemi duim evrisamting ya barava olsem wea Yawe bin talem hem.

¹⁷ Long mektu yia bihaen long taem wea olketa pipol blong Israel i lusim Ijip, long fas de blong fas mans blong datfala yia, Mosis an olketa i stanemap nao Tambu Haostent ya.

¹⁸ Long datfala taem, olketa putum olketa spesol botom ya long ples blong olketa, an olketa stanemap olketa frem, an putumap olketa reil fo holemtaet olketa, an stanemap olketa pos blong hem.

¹⁹ Nao olketa putumap bikfala kaleko ya antap long olketa frem ya, an putumap go narafala kava antap long hem moa, barava olsem wea Yawe bin talem long Mosis.

²⁰ Mosis hemi tekem tufala flat ston wea Tenkomanmen i stap long tufala, an hemi putum go insaet long Tambu Boks long Spesol Agrimen blong Yawe. An hemi tekem tufala spesol stik fo karim Tambu Boks, hemi pusum go long olketa ring blong hem, an hemi putum go kava long Boks ya.

²¹ Den hemi tekem Tambu Boks an putum go insaet long Tambu Haostent, an hemi tekem bikfala kaleko ya fo divaedem rum long tufala haf, an hangem go fo satem ples wea Tambu Boks hemi stap long hem, barava olsem wea Yawe bin talem.

²² An hemi tekem Tebol fo Tambu Bred, an hemi putum go insaet long Tambu Haostent, long not saet, long saet kam long bikfala kaleko ya.

²³ An antap long Tebol ya, hemi putum tambu bred frant long ples wea bae Yawe hemi stap, barava olsem wea Yawe bin talem.

²⁴ Hemi tekem Spesol Frem fo putum Lam an putum go insaet long Tambu Haostent, long saot saet long rum wea Tebol ya hemi long not saet.

²⁵ Hemi putum olketa lam antap long Spesol Frem ya, frant long ples wea bae Yawe hemi stap, barava olsem wea Yawe bin talem.

²⁶ An hemi tekem Olta fo Bonem Insens wea olketa kavarem long gol, an putum go insaet long Tambu Haostent, kolsap long kaleko wea hemi satem go Tambu Boks long Spesol Agrimen.

²⁷ Nao hemi tekem tambu insens wea hemi garem gudfala smel, an bonem antap long olta ya barava olsem wea Yawe bin talem.

²⁸ Hemi tekem bikfala kaleko fo satem doa blong Tambu Haostent an hangemap go long doa ya.

²⁹ Hemi tekem Olta fo Bonem Sakrifaes an putum go aotsaet long frant long doa blong Tambu Haostent. An hemi bonem wanfala animol wea hemi sakrifaesim an hemi bonem tu disfala flaoa wea hemi miks wetem oel, barava olsem wea Yawe bin talem.

³⁰ An hemi tekem Bras Besin ya an putum long midol long Olta an Tambu Haostent, an hemi fulumapem long wata.

³¹ Nao Mosis an Eron, wetem olketa san blong Eron i yusim hem fo wasim han an lek blong olketa.

³² An evritaem eniwan long olketa hemi wande go insaet long Tambu Haostent o hemi wande go kolsap long Olta, oltaem hemi mas wasim han an lek blong hem long wata ya, barava olsem wea Yawe bin talem.

³³ Hemi stanemap fens ya wetem longfala kaleko blong hem, raonem open eria blong Tambu Haostent wetem olta ya, an hemi hangemap bikfala kaleko fo satem long doa ya. Long wei ya nao, Mosis hemi finisim evri waka long Tambu Haostent ya.

Bikfala klaod blong Yawe hemi kavaremap Tambu Haostent

³⁴ Nao bikfala klaod blong Yawe hemi kavaremap Tambu Haostent fo Mitim God, an saen long bikfala paoa blong Yawe hemi fulumapem Tambu Haostent ya.

³⁵ An from samting ya nao, Mosis hemi no save go insaet long Tambu Haostent ya.

³⁶ Long taem wea olketa pipol blong Israel i gohed fo muv olobaot long drae eria, hemi olsem: taem disfala klaod hemi goap from Tambu Haostent, olketa muvum ples blong olketa fo go long narafala ples,

³⁷ bat sapos klaod hemi gohed fo kavaremap Tambu Haostent, olketa stap long ples ya nomoa kasem taem wea klaod hemi goap moa.

³⁸ An long datfala taem wea olketa gohed fo muv olobaot long drae eria, oltaem olketa save lukim bikfala klaod ya blong Yawe wea hemi gohed fo kavaremap Tambu Haostent ya long de. An oltaem long naet, olketa save lukim wanfala faea wea hemi gohed fo laet insaet long datfala klaod.