Eksodas 37 - Pijin Bible

Besalel hemi wakem Tambu Boks long Spesol Agrimen blong Yawe

¹ Besalel hemi wakem wanfala boks long timba blong akesia tri. Longfala blong hem hemi kasem 115 sentemita, an waed blong hem hemi kasem 67 sentemita, an hae blong hem tu hemi kasem 67 sentemita.

² Hemi kavaremap evri pat insaet long hem an aotsaet long hem long barava nambawan gol. An hemi wakem tu wanfala smolfala strap long gol fo goraonem boks ya fo dekoretem.

³ Hemi wakem fofala ring long gol, an hemi hangem fofala ring ya long olketa fofala lek blong boks ya, tufala long wanfala saet, an nara tufala long narafala saet.

⁴ An hemi wakem tufala longfala stik fo karim long timba blong akesia tri, an hemi kavaremap tufala long gol.

⁵ Den hemi pusum go tufala stik ya insaet long olketa ring long tufala saet blong boks fo karim long hem.

⁶ Hemi wakem wanfala kava fo boks ya long nambawan gol. Longfala blong kava ya hemi kasem 115 sentemita, an waed blong hem hemi kasem 67 sentemita.

⁷ Hemi wakem tufala kaving blong enjel wea i garem wing long gol wea hemi hamarem. An hemi putum tufala enjel ya antap long tufala en blong kava,

⁸ wea tufala ya i barava pat long disfala kava nao. Wanfala hemi stanap long wanfala en, an narafala long narafala en.

⁹ An hemi mekem tu wea tufala enjel ya i gohed fo fesim tufala, an wea tufala luk godaon long kava ya. An hemi mekem wea wing blong tufala i spredaot go long tufala, mekem wing blong tufala ya i kavaremap antap long boks ya.

Olketa wakem Tebol fo Tambu Bred

¹⁰ Olketa wakem disfala Tebol fo Tambu Bred long timba blong akesia tri. Longfala blong hem hemi kasem 90 sentemita, an waed blong hem hemi kasem 45 sentemita, an hae blong hem hemi kasem 67 sentemita.

¹¹ Olketa kavaremap olketa timba long nambawan gol, an olketa wakem wanfala smolfala strap long gol fo goraonem tebol ya fo dekoretem.

¹² Olketa wakem wanfala reil fo hemi goraonem antap long tebol ya, wea hae blong reil ya hemi kasem 75 milimita. An olketa wakem narafala smol strap moa long gol fo goraonem disfala smolfala reil fo dekoretem.

¹³ Olketa wakem fofala ring long gol fo tebol ya, an olketa hangem long fofala kona, kolsap long olketa lek blong hem.

^14-15 Olketa ring ya i fo holem tufala stik fo karim tebol ya, an olketa hangem olketa kolsap long disfala smolfala reil ya. An olketa wakem tufala longfala stik fo karim tebol ya long timba blong akesia tri, an kavaremap long gol.

¹⁶ Olketa wakem evrisamting fo yusim long tebol ya, long barava nambawan gol. Hem nao olketa plet an besin, wetem olketa kap an botol fo putum waen wea olketa ofarem kam long Yawe.

Olketa wakem Spesol Frem fo putum Olketa Lam

¹⁷ Olketa wakem Spesol Frem fo putum sevenfala lam antap long hem, long barava nambawan gol. Olketa hamarem gol ya fo mekem botom an pos blong hem. Olketa kap fo putum oel lam antap long hem, olketa mekem olketa kap ya fo luk olsem flaoa, mekem evri pat long hem long wanfala pis gol nomoa.

¹⁸ Olketa mekem siksfala brans fo kamaot long disfala pos, wea trifala kamaot long wanfala saet an nara trifala kamaot long narafala saet.

¹⁹ Long olketa siksfala brans ya, olketa mekem trifala flaoa long gol wea i luk olsem flaoa blong amon tri.

²⁰ An long pos ya, olketa mekem fofala flaoa long gol wea i luk olsem flaoa blong amon tri.

²¹ Olketa putum wanfala flaoa long trifala ples wea olketa brans i joen long pos, an wanfala flaoa antap long pos ya.

²² Olketa hamarem Spesol Frem ya wetem olketa flaoa an olketa brans long wanfala pis gol nomoa.

²³ Olketa mekem sevenfala oel lam fo disfala Spesol Frem, an olketa sisis fo holem faea, an olketa plet long barava nambawan gol.

²⁴ Olketa yusim teti-foa kilo long nambawan gol fo wakem Spesol Frem fo putum Lam an evrisamting blong hem.

Olketa wakem Olta fo Bonem Insens

²⁵ Olketa yusim timba blong akesia tri fo wakem Olta fo Bonem Insens long hem. Disfala olta hemi skuea, wea longfala an waed blong hem hemi kasem 45 sentemita, an hae blong hem hemi kasem 90 sentemita. Antap long olketa fofala kona blong olta ya, hemi garem fofala samting olsem hon blong buluka, wea i pat blong olta nao.

²⁶ An olketa kavarem antap blong olta ya, an fofala saet blong hem, an fofala hon blong hem long nambawan gol. An olketa wakem wanfala strap long gol fo hemi goraonem hem fo dekoretem.

²⁷ An olketa wakem tu fofala ring long gol, an olketa hangem tufala long wanfala saet, an nara tufala long narafala saet, andanit long strap ya wea hemi goraon long olta ya. Fofala ring ya i fo holem tufala stik fo karim olta ya.

²⁸ An olketa wakem tufala stik ya long timba blong akesia tri, an olketa kavarem tufala ya long gol.

Olketa wakem tambu oel an insens

²⁹ Olketa barava wakem gudfala disfala tambu oel fo mektambu long olketa samting. An olketa barava wakem gudfala tu disfala tambu insens wea hemi garem gudfala smel.