Eksodas 27 - Pijin Bible

Olta fo Bonem Sakrifaes

¹ Yawe hemi gohed fo tok olsem long Mosis, “Bae yu mas wakem wanfala olta long timba blong akesia tri. Olta ya hemi mas skuea, wea longfala an waed blong hem mas kasem 225 sentemita, an hae blong hem mas kasem 135 sentemita.

² An yu mas wakem fofala samting olsem hon blong buluka wea i stanap long olketa fofala kona blong olta ya, an olketa ya i barava pat long disfala olta nao. An yu mas kavarem olta ya long bras.

³ Yu mas wakem olketa baket fo holem asis. An yu mas wakem olketa smolfala savol, an olketa besin, an olketa fok, an olketa baket fo karim hot sakol o asis blong faea wea hemi laet yet. Yu mas wakem evrisamting ya long bras.

^4-5 Yu mas wakem wanfala bikfala netwaea basket long bras. Yu mas putum go netwaea basket ya andanit long wanfala reil wea hemi antap, mekem basket ya hemi go daon insaet long olta ya fo kasem hafwe long daon. An yu mas wakem tu fofala ring long bras fo joen go long fofala kona blong netwaea basket ya.

⁶ Yu mas wakem tufala stik fo karim olta ya long timba blong akesia tri, an kavarem long bras.

⁷ Nao taem yu laek fo karim, yu mas pusum go tufala stik ya insaet long olketa ring long tufala saet blong olta ya fo karim.

⁸ Yu mas wakem olta ya long timba, an hemi mas open olsem boks barava falom disfala plan wea mi gohed fo talemaot long yu, antap long disfala maonten.”

Open eria raonem Tambu Haostent

⁹ Yawe hemi gohed fo tok olsem, “Bae yu mas wakem fens fo mekem wanfala open eria raonem Tambu Haostent. Yu mas somap wanfala longfala kaleko long nambawan waet kaleko, fo hangem long disfala fens raonem open eria ya. Long saot saet blong fens ya, longfala blong kaleko ya mas kasem 45 mita.

¹⁰ An hemi mas garem tuentifala pos wetem tuentifala spesol bras botom fo olketa stanap long hem. Yu mas yusim silva fo wakem olketa huk an olketa reil wea longfala kaleko ya hemi hang long olketa.

¹¹ An long not saet blong hem, evrisamting mas semsem nomoa.

¹² Long west saet blong fens ya, longfala blong kaleko mas kasem 22 mita 50 sentemita. An hemi mas garem tenfala pos wetem tenfala spesol botom fo olketa stanap long hem.

¹³ An long ist saet blong fens ya, wea hemi garem doa long hem, longfala blong hem tu mas kasem 22 mita 50 sentemita.

^14-15 Yu mas wakem tufala bikfala kaleko fo tufala saet long doa ya. Longfala blong wanfala kaleko mas kasem 6 mita 75 sentemita, mekem hemi stat long doa go kasem kona. An hemi mas garem trifala pos wetem trifala spesol botom fo olketa stanap long hem. Long narasaet long doa, evrisamting mas semsem nomoa.

¹⁶ “An yu mas wakem wanfala kaleko wea longfala blong hem hemi kasem 9 mita fo satem disfala doa ya. Yu mas wakem long nambawan waet kaleko, an somap olketa piksa long hem long blu koton, an papol koton, an red koton. An hemi mas garem fofala pos wetem fofala spesol botom fo olketa stanap long hem.

^17-18 Yu mas yusim silva fo wakem olketa reil fo holem olketa pos long fens ya. An yu mas yusim silva fo wakem olketa huk fo hangem longfala kaleko ya. An yu mas wakem olketa spesol botom ya long bras. Longfala blong open ples ya mas kasem 45 mita, an waed blong hem mas kasem 22 mita 50 sentemita. An hae blong fens raonem mas kasem 2 mita 25 sentemita. Yu mas yusim barava nambawan waet kaleko fo disfala fens.

¹⁹ Yu mas yusim bras fo wakem evrisamting wea bae yu yusim insaet long Tambu Haostent blong mi. An yu mas yusim bras tu fo wakem olketa samting wea yu hamarem go insaet long graon fo taengem olketa rop blong Tambu Haostent an olketa rop blong fens long hem.”

Wei fo lukaftarem olketa lam long Spesol Frem fo putum Olketa Lam

²⁰ Yawe hemi gohed fo tok olsem, “Yu mas talem olketa pipol blong Israel fo tekem kam nambawan oliv oel an givim long yu fo putum long Spesol Frem fo putum Lam wea hemi mas laet evri naet.

²¹ Insaet long Tambu Haostent fo Mitim God, disfala Spesol Frem fo putum Lam hemi mas stap saet kam long disfala bikfala kaleko wea hemi satem Barava Tambu Rum wea Tambu Boks ya long Spesol Agrimen hemi stap. Eron wetem olketa san blong hem nao mas redim olketa lam long frem ya mekem olketa gohed fo laet evri naet frant long Yawe, stat long ivining go-go kasem moning. Yufala evriwan blong Israel mas falom disfala rul olowe nao.”