Eksodas 25 - Pijin Bible

Olketa ofaring fo wakem Tambu Haostent blong Yawe

¹ Yawe hemi tok olsem long Mosis,

² “Bae yu talem olketa pipol blong Israel, fo givim kam ofaring long mi. An yu mas tekem wanem olketa wande ofarem.

³ Bae olketa mas ofarem nomoa olketa samting olsem: gol, silva, an bras,

⁴ nambawan waet kaleko, an koton wea hemi blu, o papol, o red, kaleko wea olketa wakem long hea blong nanigot,

⁵ skin blong man sipsip wea olketa mekem red, skin blong jiukong, timba blong akesia tri,

⁶ oliv oel fo laet, olketa lif ya wea hemi garem gudfala smel fo putum go long insens, an fo putum long tambu oel ya fo mektambu long olketa man an olketa samting,

⁷ gudfala red ston ya wea olketa kolem soham, wetem olketa narafala naesfala ston moa fo putum go long longfala kaleko blong hae prist wea olketa kolem efod, an long spesol paos ya wea hemi hangem long sest blong hem.

⁸ “Bae yu talem olketa pipol fo wakem wanfala tambu ples fo mi, an bae mi stap long midol long olketa.

⁹ An yufala mas wakem disfala Tambu Haostent an evrisamting insaet long hem, barava falom plan wea bae mi som long yu.”

Tambu Boks long Spesol Agrimen blong Yawe

¹⁰ Yawe hemi gohed fo tok olsem, “Bae yu mas wakem wanfala boks long timba blong akesia tri. Longfala blong hem mas kasem 115 sentemita, an waed blong hem mas kasem 67 sentemita, an hae blong hem tu mas kasem 67 sentemita.

¹¹ Bae yu mas kavaremap evri pat insaet long hem an aotsaet long hem long barava nambawan gol. An bae yu mas wakem wanfala smolfala strap long gol fo goraonem boks ya fo dekoretem.

¹² Bae yu mas wakem fofala ring long gol, an yu mas hangem fofala ring ya long olketa fofala lek blong boks ya, tufala long wanfala saet, an nara tufala long narafala saet.

¹³ An bae yu mas wakem tufala longfala stik fo karim long timba blong akesia tri, an yu mas kavaremap tufala long gol.

¹⁴ Den yu mas pusum go tufala stik ya insaet long olketa ring long tufala saet blong boks fo karim long hem.

¹⁵ An bae yu mas letem tufala stik ya fo stap olowe long olketa ring, an yu mas no tekemaot moa.

¹⁶ An tufala flat ston wea mi bin raetem Spesol Agrimen blong mi long tufala, an wea bae mi givim go long yu, yu mas putum tufala ya insaet long boks.

¹⁷ “Bae yu mas wakem wanfala kava fo boks ya long nambawan gol. Longfala blong hem mas kasem 115 sentemita, an waed blong hem mas kasem 67 sentemita.

¹⁸ Bae yu mas wakem tufala kaving blong enjel wea i garem wing long gol wea yu hamarem. An yu mas putum tufala enjel ya antap long tufala en blong kava,

¹⁹ wea tufala ya i barava pat long disfala kava nao. Wanfala mas stanap long wanfala en, an narafala long narafala en.

²⁰ Bae yu mas mekem wea tufala enjel ya i gohed fo fesim tufala, an wea tufala lukluk godaon long kava ya. An yu mas mekem wea wing blong tufala i spredaot fo go long tufala, mekem wing blong tufala i kavaremap antap long boks ya.

²¹ Bae yu mas tekem tufala flat ston ya wea bae mi givim long yu, an putum go insaet, nao yu tekem kava blong hem an satem.

²² Antap long kava blong boks ya, long midol long tufala enjel, bae mi kam long ples ya fo mitim yu, an bae mi givim olketa lo blong mi long yu, wea bae yufala pipol blong Israel mas falom.”

Tebol fo Tambu Bred

²³ Yawe hemi gohed fo tok olsem, “Bae yu mas wakem wanfala tebol long timba blong akesia tri. Longfala blong hem mas kasem 90 sentemita, an waed blong hem mas kasem 45 sentemita, an hae blong hem mas kasem 67 sentemita.

²⁴ Yu mas kavaremap olketa timba long nambawan gol, an yu mas wakem wanfala smolfala strap long gol fo goraonem tebol ya fo dekoretem.

²⁵ Long antap blong tebol ya, yu mas wakem wanfala reil fo hemi goraonem hem, an hae blong reil ya mas kasem 75 milimita. An yu mas wakem narafala smol strap moa long gol fo goraonem disfala smolfala reil fo dekoretem.

²⁶ Yu mas wakem fofala ring long gol fo tebol ya, an yu mas hangem long fofala kona, kolsap long olketa lek blong hem.

^27-28 Olketa ring ya i fo holem tufala stik wea yu mas yusim fo karim tebol ya, an olketa mas stap kolsap long disfala smolfala reil. An yu mas wakem tufala longfala stik fo karim tebol ya long timba blong akesia tri, an kavaremap long gol.

²⁹ An yu mas wakem evrisamting fo yusim long tebol ya long barava nambawan gol. Hem nao olketa plet an besin, wetem olketa kap an botol wea bae yu yusim fo putum waen wea yu ofarem kam long mi.

³⁰ An yu mas putum long tebol ya, disfala Tambu Bred wea hemi somaot dat mi stap wetem yufala, mekem bred ya bae hemi stap oltaem frant long ples wea mi stap.”

Spesol Frem fo putum Olketa Lam

³¹ Yawe hemi gohed fo tok olsem, “Bae yu mas yusim nambawan gol fo wakem wanfala spesol frem fo putum olketa lam. An yu mas hamarem gol ya fo mekem botom an pos blong hem. Olketa kap fo putum oel lam antap long hem, yu mas mekem olketa kap ya fo luk olsem flaoa, mekem evri pat long hem long wanfala pis gol nomoa.

³² Yu mas mekem siksfala brans fo kamaot long disfala pos, wea trifala kamaot long wanfala saet an nara trifala kamaot long narafala saet.

³³ Long olketa siksfala brans ya, yu mas mekem trifala flaoa long gol wea i luk olsem flaoa blong amon tri.

³⁴ An long pos ya, yu mas mekem fofala flaoa long gol wea i luk olsem flaoa blong amon tri.

³⁵ Yu mas putum wanfala flaoa long trifala ples wea olketa brans i joen long pos, an wanfala flaoa antap long pos ya.

³⁶ Yu mas hamarem disfala Spesol Frem fo putum Lam wetem olketa flaoa an olketa brans long wanfala pis gol nomoa.

³⁷ Yu mas mekem sevenfala oel lam fo disfala frem ya, an putum antap long hem mekem hemi saen go frant long hem.

³⁸ Yu mas mekem olketa sisis fo holem faea an olketa plet long nambawan gol.

³⁹ Yu mas yusim teti-foa kilo long nambawan gol fo wakem disfala Spesol Frem fo putum Lam an evrisamting blong hem.

⁴⁰ An taem yu wakem samting ya, yu mas barava falom disfala plan wea mi gohed fo talemaot long yu, antap long disfala maonten.”