Eklesiastes 6 - Pijin Bible

¹ Mi lukim narafala samting wea hemi barava nogud tumas, an hemi gohed fo spoelem olketa pipol. Hemi olsem,

² God hemi mekem man fo kamap ris, an garem hae nem, an garem plande samting. Man olsem hemi garem evrisamting wea hemi laekem, bat bihaen, God no letem hem fo hapi long olketa samting ya. An wanfala strensa nomoa bae hemi kam an tekem evrisamting ya fo hapi long hem. Disfala samting hemi no fitim tingting blong yumi, an hemi barava nogud tumas.

³ Maet wanfala man hemi garem longfala laef, an hemi garem 100 pikinini. Nomata olsem hemi nating hapi nomoa long laef blong hem, an bihaen, olketa pikinini blong hem no berem hem long gudfala wei. Long tingting blong mi, disfala laef blong hem, hemi nogud tumas winim pikinini wea hemi dae finis bifoa hemi bon kam.

⁴ Kaen pikinini ya, hemi no fitim tingting blong yumi, bikos hemi lus nomoa long tudak, an no eniwan i tingim hem.

⁵ Hemi nating lukim nomoa delaet, an hemi nating save nomoa wanem nao laef. Wanfala samting nomoa, hemi garem plande taem fo res winim risman ya.

⁶ An nomata wanfala man hemi laef go-go kasem 2,000 yia, hemi nogud sapos hemi no hapi long olketa samting long laef blong hem. Yu save, long en blong laef, evriwan nomoa i go long sem ples.

⁷ Oltaem man hemi hadwaka fo kaikai nomoa, bat hemi nating garem inaf fitim wanem hemi laekem.

⁸ ?Watkaen gudfala samting nao hemi mekem laef blong waes man hemi moabeta winim laef blong krangge man? !Nating nao! ?Maet wanfala puaman hemi savegud long stretfala wei fo stap wetem olketa pipol, bat hao nao disfala save blong hem bae hemi helpem hem?

⁹ Hemi moabeta fo yumi hapi long olketa samting wea yumi garem finis, an no traehad fo garem narafala samting wea yumi laekem nomoa. Laef wea man hemi no save hapi long wanem hemi garem hemi no fitim tingting blong yumi. Kaen laef ya hemi olsem wea yumi aftarem nomoa win.

¹⁰ Evrisamting wea hemi stap distaem, God nao hemi givim olketa nem long olketa. An yumi save tu abaotem pipol seleva, olsem, yumi no save raoa wetem God hu hemi strong moa winim yumi.

¹¹ Taem man toktok tumas long raoa, mining blong toktok hemi no fitim tingting blong yumi, an no eni gudfala samting save kamap from disfala toktok.

¹² Laef blong man long disfala wol hemi sot tumas, an hemi no fitim tingting blong yumi. ?Hu nao hemi save luksave long nambawan wei fo falom long laef wea hemi olsem sado nomoa? ?An hu nao hemi save talem man abaotem olketa samting wea bae i kamap bihaen long taem wea hemi dae finis?