Efesas 2 - Pijin Bible

Laef wetem Kraes

¹ Long bifoa, yufala bin stap dae nomoa bikos yufala no obeim God an yufala gohed fo sin.

² Long taem ya, yufala falom nomoa ravis wei blong disfala wol. Yufala obeim nomoa Seitan hu hemi bos blong olketa devol long skae, an wea hem nao hemi save bosim olketa pipol hu i no obei long God.

³ Bifoa, yumi evriwan stap olsem olketa pipol ya tu. Yumi falom nomoa disfala wei blong sin blong yumi, wea yumi duim wanem bodi an tingting blong yumi hemi laekem. Bikos yumi olsem nomoa, hemi fitim fo God hemi panisim yumi olsem hemi save duim long evriwan.

⁴ Bat God hemi sore an kaen tumas long yumi, an lav blong hem fo yumi hemi bikfala tumas.

⁵ Bat nomata yumi stap dae from sin blong yumi, God hemi mekem yumi laefbaek moa taem hemi mekem Kraes fo laefbaek moa from dae. !Olketa! !Kaenfala lav blong God nao hemi sevem yufala!

⁶ Bikos yumi stap joen wetem Jisas Kraes, God hemi mekem yumi fo garem laef wetem Kraes, an hemi mekem yumi fo rul wetem hem long heven.

⁷ God hemi duim olsem, mekem evri pipol hu olketa kam bihaen, bae olketa luksave long barava kaenfala lav blong hem wea hemi bikfala moa winim evri narafala lav, long wei wea hemi bin somaot lav blong hem fo yumi long Jisas Kraes.

^8-9 Bikos taem yufala biliv, kaenfala lav blong God nao hemi sevem yufala. Diswan hemi no hapen bikos eniwan long yufala hemi duim gudfala waka fo hem. Nomoa ya. God seleva nomoa hemi duim fri fo sevem yufala, mekem no eniwan hemi save tokpraod long hem.

¹⁰ God nao hemi sevem yumi olsem, an bikos yumi stap joen wetem Jisas Kraes, hemi mekem yumi fo duim evri gudfala waka wea hemi mekredi long hem finis.

Evri pipol kamap wanfala long Kraes

¹¹ Yufala save dat long han blong olketa seleva, olketa Jiu gohed fo mekem olketa boe blong olketa fo kate. An olketa bin kolem yufala “pipol hu i no kate”, bikos yufala i no bon kam olsem Jiu.

¹² Long bifoa, yufala barava farawe from Kraes, an yufala i no pat blong pipol blong Israel wea God hemi siusim olsem spesol pipol blong hem. Long taem ya, yufala i stap aotsaet long olketa spesol agrimen wea God hemi mekem wetem olketa pipol blong hem nomoa. An yufala stap long disfala wol bat yufala no garem eni promis fo weitem, an yufala no save long God.

¹³ Fastaem, yufala stap farawe long God, bat distaem nao, yufala joen wetem Jisas Kraes. An bikos Kraes hemi givim blad blong hem fo yufala olsem wanfala sakrifaes, God hemi tekem yufala kam kolsap long hem nao.

¹⁴ Kraes nao hemi mekem yumi fo stap long piis. Bikos long laef blong hem long disfala wol, hemi joenem laen blong olketa Jiu wetem laen blong olketa hu i no Jiu. Hemi tekemaot disfala wei blong olketa fo stap enemi, wea hemi bin divaedem olketa oltaem.

¹⁵ Long dae blong hem, hemi bin finisim disfala Lo blong olketa Jiu wetem enikaen rul blong hem ya, mekem no eniwan hemi nid fo falom moa. An long wei ya nao, hemi mekem tufala kaen pipol fo kamap wanfala niu kaen pipol wea hemi joen wetem hem seleva, mekem tufala fo stap long piis.

¹⁶ Taem Kraes hemi dae long kros, hemi kilim dae disfala wei blong olketa fo stap enemi olowe. Hemi joenem tufala kaen pipol long wanfala bodi nomoa an hemi tekem olketa kambaek long God.

¹⁷ So Kraes hemi kam finis fo talemaot Gudnius abaotem piis fo evriwan, long yufala olketa hu i bin stap farawe long God, an long olketa Jiu hu i bin stap kolsap long hem tu.

¹⁸ An bikos yumi stap joen wetem Kraes, mifala Jiu tugeta wetem yufala hu i no Jiu, yumi save kam long Dadi blong yumi long paoa blong wanfala Spirit nomoa.

¹⁹ So from diswan nao, yufala hu i no Jiu, yufala i no olsem strensa moa ya. Nomoa. Yufala kamap barava pat long olketa pipol blong God distaem, an yufala olketa memba long famili blong hem finis.

²⁰ An disfala famili hemi olsem haos wea God hemi wakem, wea olketa aposol an olketa profet olketa olsem faondesin blong hem, an Jisas Kraes nao hemi disfala barava nambawan ston fo sapotem haos ya.

²¹ An Kraes nao hemi mekem evri pat long haos ya fo stap strong tugeta, an hemi mekem haos ya fo kamap bikfala moa an fo stap olsem Tambuhaos blong Masta.

²² Bikos yufala stap joen wetem Kraes, long paoa blong Holi Spirit, God hemi mekem yufala tu fo joen tugeta wetem olketa pipol blong God long disfala haos blong hem.