Aesaea 34 - Pijin Bible

Bae Yawe hemi panisim olketa enemi blong hem

¹ (Profet) !Yufala evri pipol blong olketa narafala kantri! !Yufala kam kolsap an lisin gudfala! Ya, evri pipol an evrisamting long disfala wol mas lisin kam.

² Yawe hemi kros tumas long evri kantri long disfala wol wetem evri ami blong olketa. Hemi bin jajem olketa finis, an bae hemi kilim dae olketa evriwan.

³ Ya, bodi blong olketa ya hemi staka fogud, an hemi no fitim nao fo berem olketa evriwan. Bae blad blong olketa hemi ran kamdaon falom maonten, an olketa bodi ya bae hemi roten an smel nogud long ples ya.

⁴ Evrisamting wea hemi stap long skae bae hemi lus finis, an skae bae hemi kamap olsem wanfala pis pepa wea olketa rolemap. An olketa sta bae i foldaon kam olsem olketa drae lif blong grep o fig tri.

⁵ Yawe hemi redim finis naef fo faet blong hem long heven, an bae hemi yusim naef fo faet ya fo kilim dae evri pipol blong Idom bikos hemi jajem olketa finis.

⁶ Bae blad an gris blong olketa hemi stap long naef ya, olsem blad an gris blong sipsip o nanigot wea prist hemi kilim dae fo sakrifaesim. Ya, bae Yawe hemi kilim dae olketa long bikfala taon long Bosra olsem wanfala sakrifaes. An bae hemi kilim dae tu plande moa long olketa narafala pipol long kantri blong Idom.

⁷ Olketa bikman blong Idom i olsem wael buluka. Ya, olketa i strong olsem man buluka. Bat nomata olsem, bae olketa ya i foldaon tu olsem evri narafala man long ples ya. Blad an gris blong olketa bae hemi fulap long graon olsem mad.

⁸ Long taem ya nao, bae Yawe hemi sevem olketa pipol blong Saeon, an bae hemi sensimbaek olketa samting wea olketa enemi ya i duim long olketa pipol blong hem.

⁹ Long taem ya, bae olketa riva long Idom i kamap hot olsem hot ta, an graon blong lan ya bae hemi barava bone long faea wea hemi barava hot fogud.

¹⁰ Bae faea ya hemi no save dae an smok blong hem bae hemi gohed olowe nao evri de an evri naet. Nomata plande pipol bae i bon kam bihaen, bat no eniwan long olketa bae hemi wakabaot moa long disfala lan. Ya, lan ya bae hemi stap olsem fo evritaem olowe nao, bikos hemi barava kamap nogud tumas.

¹¹ Bae olketa wael bed olsem olketa deferen kaen aol an olketa blak reven tu i stap long ples ya, an bae ples ya hemi kamap ples blong olketa nao. Bae Yawe hemi spoelem Idom finis fo hemi olsem taem wea hemi no wakem yet disfala wol.

¹² Bae no eniwan long laen blong king hemi stap, an no eni bikman long disfala kantri nao hemi stap fo siusim king.

¹³ Olketa nilagras an ropnila nomoa bae hemi grou insaet long haos blong king an insaet long olketa strongfala sefples. Olketa wael dog an olketa aol nomoa bae i kam fo stap insaet long olketa taon ya.

¹⁴ Olketa wael animol long drae eria olsem olketa wael nanigot bae i wakabaot olobaot long ples ya an kraeaot bikfala. An olketa wael animol blong naet bae i kam long ples ya fo lukaotem ples fo stap long hem.

¹⁵ Bae olketa aol i wakem nest blong olketa long ples ya, an bae olketa bonem eg an sidaon antap long hem go-go olketa smolfala aol i kamaot. Ya, bae hemi lukaftarem olketa gudfala andanit long wing blong hem. An bae olketa bikfala igol tu i kam fo stap long ples ya, an bae evriwan i garem merewan fo stap wetem hem.

¹⁶ Yufala luk insaet long disfala buk blong Yawe an ridim toktok blong hem. Evri animol an bed wea mi bin talem bae hemi stap long Idom olsem wea Yawe bin talem finis an hem nao bae hemi mekem olketa fo kam tugeta.

¹⁷ Hem nao hemi divaedem olketa graon long ples ya fo olketa evriwan. Bae olketa stap olowe long ples ya, an olketa pikinini wea i bon kam bihaen long olketa bae i stap olowe nao long kantri ya.