Aesaea 26 - Pijin Bible

Singsing fo preisim Yawe

¹ (Profet) Long taem ya, yumi evriwan long Jiuda bae i singim disfala singsing wea hemi olsem: !Yumi garem strongfala taon! An wei wea God hemi sevem yumi, hemi olsem wanfala bikfala wolston wea hemi raonem yumi fo gadem yumi.

² !Openem olketa bikfala geit long taon ya, mekem olketa pipol hu i falom stretfala wei save go insaet!

³ Yawe. Pipol hu i tinghevi long yu olowe, bae yu mekem olketa fo stap long barava piis bikos olketa gohed fo trastem yu.

⁴ Yumi mas trastem Yawe olowe, bikos Yawe nao hemi strongfala Rok wea hemi sefples blong yumi, an bae hemi stap fo evritaem olowe.

⁵ Hemi save mekem eniwan hu hemi haemapem hem seleva fo kamdaon lou. Strongfala taon wea hemi stap hae fogud hemi save brekemdaon nomoa, mekem hemi olsem dast long graon.

⁶ An olketa pipol wea narafala pipol i mekem olketa safa, an olketa hu i pua, bae i step long taon ya.

⁷ Yawe, yu nao yu stret fogud. An oltaem yu gohed fo stretem wei blong olketa pipol blong yu, an yu gohed fo mekem laef blong olketa hemi smut olowe tu.

⁸ Ya, mifala barava trastem stretfala wei wea yu jajem long olketa pipol. Nambawan samting wea mifala laekem nao, fo evri pipol mas onarem nem blong yu.

⁹ Oltaem long naet, mi laekem yu tumas, an long eli moning, spirit blong mi hemi laekem tumas fo stap wetem yu. Taem yu jajem pipol long disfala wol, bae olketa lanem stretfala wei blong yu.

¹⁰ Nomata yu kaen long olketa nogud pipol, bae olketa no save lanem nomoa, hao fo falom stretfala wei blong yu. An nomata olketa stap long midol long olketa stretfala pipol, bae olketa gohed nomoa fo falom olketa nogud wei, an olketa nating luksave dat yu nao King hu hemi hae tumas.

¹¹ !O Yawe! Yu liftimap finis han blong yu fo panisim olketa, bat olketa nating luksave nomoa. Plis yu som olketa disfala wei wea yu garem strongfala tingting fo pipol blong yu, mekem olketa wea i falom olketa nogud wei olsem i save sem. An yu mas bonem olketa long faea wea yu redim finis fo olketa enemi blong yu.

¹² Yawe. Yu mekem mifala fo stap gudfala long piis, bikos paoa blong yu nao hemi mekem mifala save duim evri gudfala waka.

¹³ !O Yawe! Yu nao yu God blong mifala. Samfala taem olketa narafala masta nao i rul ovarem mifala, bat mifala mekhae nomoa long nem blong yu.

¹⁴ Olketa narafala masta ya i dae finis, an olketa no save laefbaek moa. Yu bin panisim olketa an spoelem olketa finis an no eniwan hemi tingim olketa moa.

¹⁵ Yawe. Yu bin mekem kantri blong mifala ya fo bikfala moa, an yu muvum spialaen blong evri saet long lan ya fo go farawe moa. Dastawe nao mifala mekhae long nem blong yu.

¹⁶ !O Yawe! Taem yu panisim mifala olketa pipol blong yu, mifala i ting kambaek long yu an prea go long yu.

¹⁷ Yu mekem mifala fo singaot bikfala, olsem woman wea hemi filpein an krae taem hemi redi fo bonem pikinini.

¹⁸ Hemi olsem mifala i kamap babule an mifala gohed fo tane olobaot from pein ya, bat mifala nating bonem nomoa enisamting. Mifala nating save sevem nao lan blong mifala. Ya, mifala no save winim olketa enemi.

¹⁹ !Olketa pipol blong mi! Olketa blong yumi hu i dae finis, bae i laefbaek moa from dae. Yufala hu i leidaon insaet long grev, bae yufala wekap an hapi. Olsem wata blong naet wea hemi foldaon kam fo mekem graon hemi sof an kamap niu moa, long sem wei ya tu, bae Yawe hemi mekem olketa ya fo laefbaek moa.

Bae Yawe hemi jajem evri pipol long wol

²⁰ (Profet) !Olketa pipol blong mi! !Yufala go insaet long haos blong yufala an satem doa! Yufala go an haed fo lelebet taem go-go kros blong Yawe hemi finis.

²¹ Bae hemi kamdaon from heven fo panisim olketa pipol long wol ya from evri sin blong olketa. Wei wea olketa kilim pipol dae an haedem, bae hemi kamaot klia, an graon bae hemi somaot blad blong pipol ya hu i dae.