Aesaea 13 - Pijin Bible

Bae Yawe hemi panisim olketa nogud pipol long Babilon

¹ Hem ya profesi abaotem Babilon wea Yawe hemi talemaot long mi, Aesaea, san blong Amoj.

² Yawe hemi tok olsem, “Yufala putumap flag wea hemi saen blong faet, antap long hil wea hemi no garem eni tri long hem. Yufala mas singaot go long olketa soldia blong yufala, an givim saen long olketa fo kam an faetem olketa bikman.

³ Bikos mi kros tumas long olketa ya, hem nao mi tokstrong long olketa strongfala soldia wea mi bin makem olketa fo faet, an olketa hapi tumas long biknem blong mi.”

⁴ (Profet) !Lisin kam long bikfala noes ya antap long olketa maonten! Hemi olsem bikfala noes wea plande pipol an staka soldia blong olketa kantri i mekem taem olketa hipap tugeta. Ya, Yawe hu hemi garem evri paoa, hemi redim finis ami blong hem fo faet.

⁵ Olketa soldia ya i kam from wanfala kantri wea hemi stap farawe tumas. An bikos hemi kros tumas, bae hemi letem olketa fo kam an barava spoelem disfala kantri blong yufala.

⁶ !Yufala krae! Bikos bikfala De blong Yawe fo jaj hemi kolsap kam nao. An Man ya hu hemi garem evri paoa, bae hemi spoelem evrisamting.

⁷ From disfala samting nao, bae pipol i kamap wik long fraet, an strongfala tingting blong olketa bae hemi lus finis.

⁸ Bae olketa evriwan i fraet fogud an bae olketa filpein tumas, olsem woman wea hemi redi fo bonem pikinini. Taem olketa fraet tumas, bae olketa luk long olketa seleva, an fes blong olketa hemi red fogud olsem faea.

⁹ Disfala De blong Yawe hemi kam nao. Long disfala De, God hemi kros tumas an hemi letem hadtaem fo kam. An bae hemi spoelem finis lan blong olketa wetem evri pipol long hem hu i sin tumas.

¹⁰ Olketa sta wetem mun, bae i no saen long naet. An nomata san hemi kamap long moning, bat bae hemi no saen nao.

¹¹ Yawe nao hemi tok olsem, “Bae mi panisim wol ya bikos hemi barava nogud tumas nao. An bae mi panisim olketa nogud pipol bikos olketa sin. Bae mi daonem olketa praod pipol, an bae mi spoelem finis evri praod wei blong olketa wea olketa save spoelem long olketa narafala pipol.

¹² Olketa hu i laef yet, bae i no plande nao. An bae hemi had tumas fo faendem olketa, winim wea hemi had tumas fo faendem nambawan gol.

¹³ Mi Yawe hu mi garem evri paoa nao mi kros tumas, an bae mi som paoa blong mi. Long datfala taem, bae mi mekem skae fo seksek, an graon fo muv from ples blong hem.

¹⁴ “Long datfala taem tu, olketa pipol blong olketa narafala kantri hu i stap long taon long Babilon, bae i gobaek long ples blong olketa. Ya, bae olketa ran go, olsem olketa wael animol long bus taem olketa man fo handing i aftarem olketa. Bae olketa ran olobaot, olsem olketa sipsip wea no eniwan hemi lukaftarem olketa.

^15-16 Sapos olketa enemi i kasholem eniwan long olketa, bae olketa spoelem olketa pikinini blong hem fo dae, an tekem evrisamting blong hem, an fosim waef blong hem fo slip wetem olketa. Long taem ya, bae hemi stanap nomoa fo lukluk long olketa. An bae olketa kilim man ya dae tu wetem naef fo faet.

¹⁷ “!Olketa! Bae mi mekem ami blong Media fo faetem olketa long Babilonia. Olketa soldia ya i nating wari nomoa long silva o gol, an olketa nating intres nomoa long olketa samting ya.

¹⁸ Bae olketa soldia i kilim dae olketa yang boe long ples ya wetem bou blong olketa, an bae olketa kilim dae olketa pikinini an olketa bebi tu. Ya, olketa nating sore nomoa long olketa ya.

¹⁹ Taon ya long Babilon, hemi luknaes tumas winim olketa narafala kapitol long wol, an olketa pipol blong ples ya i praod tumas long hem. Bat Yawe bae hemi barava spoelem taon ya, olsem wea hemi bin spoelem Sodom an Gomora bifoa.

²⁰ Bae no eniwan hemi stap moa long ples ya. Nomata olketa blong Arab i nating save putumap haostent long dea nao. An bae olketa pipol fo lukaftarem sipsip i no save tekem moa olketa sipsip blong olketa long dea.

²¹ Taon ya long Babilon bae hemi kamap olsem ples blong olketa animol long drae eria. Bae hemi kamap nest blong olketa aol, an olketa bikfala bed tu. Bae olketa wael dog i mekem hom blong olketa long ples ya, an olketa wael nanigot bae i klaem olobaot long olketa olfala haos long ples ya.

²² Olketa hae haos blong taon ya wea i strong fogud, wetem olketa haos blong olketa bikman, bae i fulap long noes blong olketa wael dog wea i gohed fo meknoes bikfala insaet. !Ya, de wea Babilon bae hemi nogud tumas, hemi kam kolsap nao! !An taem blong hem hemi kolsap finis nao!”