3 Jon 1 - Pijin Bible

¹ Mi lida long sios, mi raet go long yu Gaeas. Yu ya, yu gudfala fren blong mi wea mi barava lavem tumas.

² Gudfala fren blong mi, mi save finis dat Kristin laef blong yu hemi gohed gudfala olowe. An mi prea fo yu mekem evri narasamting hemi gohed gud an mekem no eni siknis hemi kasem yu.

³ Mi barava hapi fogud taem samfala Kristin fren i kam fo lukim mi an olketa talemaot dat yu holestrong long disfala tru toktok an yu falom hem olowe.

⁴ Taem mi herem dat olketa pikinini blong mi i gohed fo falom tru toktok, mi barava hapi tumas. No enisamting moa save mekem mi hapi winim diswan.

Gaeas duim gudfala waka

⁵ Gudfala fren blong mi, hemi gud tumas wea yu barava gohed olowe fo helpem olketa Kristin fren hu i kam long yufala, nomata yu no savegud long olketa.

⁶ Taem olketa kam long hia, olketa bin talem evriwan long sios hao yu lavem olketa. So enitaem olketa kasem yu, yu mas helpem olketa long wei wea God hemi hapi long hem, mekem olketa save gohed long gogo blong olketa moa.

⁷ Bikos olketa ya i goaot fo duim waka blong Kraes, an olketa no save tekem enisamting from olketa hu i no biliv long God.

⁸ So hemi fitim fo yumi lukaftarem olketa man olsem, mekem yumi evriwan save waka tugeta fo talemaot disfala tru toktok.

Daeotrefis an Demitrias

⁹ Mi raetem finis wanfala sot leta go long olketa pipol long sios, bat Daeotrefis hemi wande haemapem hem seleva olowe an hemi nating laek fo herem toktok blong mi.

¹⁰ So taem mi kam fo lukim yu, bae mi talemaot olketa ravis samting wea hemi save duim, olsem olketa ravis samting wea hemi talem agensim mifala. An narasamting moa, hemi nating laek fo lukaftarem olketa Kristin fren taem olketa kasem sios ya. An sapos olketa narawan i wande helpem olketa ya, Daeotrefis hemi stopem olketa fo no duim diswan an hemi raosim olketa from sios ya tu.

¹¹ Gudfala fren blong mi, yu no falom olketa ravis wei olsem bat yu mas falom olketa gudfala wei nomoa. Eniwan hu hemi duim gudfala samting, hemi blong God nao. Bat eniwan hu hemi duim olketa ravis samting, hemi no luksave long God.

¹² Olketa pipol sei Demitrias nao hemi wanfala gudfala man, an tru toktok hemi somaot diswan tu. An mifala talemaot tu dat hemi gudfala man, an yufala save finis nao dat wanem mifala talemaot hemi barava tru.

Las Toktok

¹³ Mi garem plande samting fo talem go long yu, bat mi no laek fo raetem long disfala leta.

¹⁴ Mi laekem tumas fo kam kuiktaem, mekem yumitufala save stori gud.

¹⁵ Letem God hemi givim piis long yu. Olketa fren blong yumi long hia i talem go halo long yu. An yu mas sei halo long olketa fren blong mifala.