2 Samuel 9 - Pijin Bible

King Deved hemi kaen long Mefiboset

¹ Oraet, wanfala de, King Deved hemi askem olketa man blong hem olsem, “?Waswe, eni pikinini long laen blong King Sol i stap yet? Sapos eniwan hemi stap, mi laek fo kaen long hem, bikos Jonatan hemi gudfala fren blong mi bifoa.”

² Nao wanfala man hemi stap wea nem blong hem Siba. Bifoa, hemi wakaman blong King Sol. Olketa talem hem fo go lukim king. Taem hemi kam, king hemi askem hem olsem, “?Yu nao yu Siba?” An hemi tok olsem, “Ya, an mi wakaman blong yu.”

³ Den king hemi askem hem olsem, “?Waswe, eni pikinini long laen blong King Sol hemi stap yet? Mi laek fo kaen tumas long hem olsem God hemi laekem.” Hemi ansa olsem, “Wanfala san blong Jonatan hemi stap yet, bat lek blong hem hemi nogud, hemi no save wakabaot.”

^4-5 So king hemi askem olsem, “?Hemi stap long wea?” An hemi ansa olsem, “Hemi stap long Lo-Deba, long haos blong Makia, san blong Amiel.” So king hemi mekem hemi kam lukim hem.

⁶ Man ya hemi Mefiboset, san blong Jonatan, san blong King Sol. Taem hemi kam, hemi baodaon frant long King Deved fo mekhae long hem. Den Deved hemi askem hem olsem, “?Yu nao yu Mefiboset?” An hemi ansa olsem, “Ya, an mi wakaman blong yu.”

⁷ Oraet, Deved hemi tok olsem, “Yu no fraet. Bae mi laek fo kaen long yu bikos dadi blong yu, Jonatan, hemi gudfala fren blong mi. Evri lan blong grani blong yu, King Sol, bae mi givim gobaek long yu, an mi laekem yu fo kam kaikai wetem mi olowe long tebol blong mi.”

⁸ Nao Mefiboset hemi baodaon moa, an hemi tok olsem, “!King, mi barava nogud olsem wanfala dog wea hemi dae finis! ?Waswe nao yu laek fo kaen long mi?”

⁹ Den king ya hemi kolem kam Siba, an hemi tok olsem long hem, “Evrisamting wea hemi blong King Sol an famili blong hem bifoa, distaem mi givim go long Mefiboset, grani blong hem.

¹⁰ An yu wetem olketa pikinini blong yu an olketa wakaman blong yu, yufala mas wakem gaden fo hem, an tekemaot kaikai long gaden fo hem. Long wei olsem, grani blong masta blong yu bae hemi garem evrisamting wea hemi nidim. Bat Mefiboset ya, bae hemi save kaikai wetem mi olowe long tebol blong mi.” (Yu save, Siba hemi garem fiftin pikinini boe, an tuenti wakaman.)

¹¹ Den Siba hemi ansa olsem, “King, bae mi duim evrisamting wea yu talem.” Nao Mefiboset hemi gohed fo kaikai wetem king olowe, olsem wea hemi barava pikinini blong hem nomoa.

¹² Mefiboset hemi garem wanfala smol pikinini boe wea nem blong hem Mika, an evriwan long famili blong Siba i kamap wakaman blong Mefiboset.

¹³ An tufala lek blong hem i barava nogud, bat hemi stap kam long Jerusalem bikos hemi gohed fo kaikai long tebol blong king olowe.