2 Samuel 8 - Pijin Bible

Olketa faet wea King Deved hemi winim

¹ Bihaen, King Deved hemi go faetem olketa blong Filistia, an hemi barava winim olketa, an hem tekembaek ples long Metegama from olketa ya.

² Nao Deved hemi go faetem pipol blong Moab, an hemi winim olketa. Den hemi tekem olketa soldia blong Moab, an hemi mekem olketa fo leidaon long graon. Hemi yusim wanfala rop fo makem hu nao long olketa hemi mas dae. Long evri trifala man, hemi kilim tufala man dae, an hemi letem wanfala laef. Bihaen long taem ya, olketa blong Moab i stap andanit long paoa blong hem, an olketa gohed fo peim taks long hem.

³ Taem Deved hemi go faetem olketa kolsap long Yufretis Riva fo mekem olketa kam andanit long paoa blong hem moa, hemi winim King Hadadesa, san blong Rehob, hu hemi king long Soba.

⁴ Ami blong Deved hemi kasholem 1,700 soldia wea i ran long hos, an 20,000 soldia, olketa evriwan i blong Hadadesa ya. An hemi holem 100 hos wea i fit fo pulum kaat fo faet. Bat olketa nara hos, hemi katem string blong lek blong olketa mekem olketa no save wakabaot.

⁵ Taem ami blong Aram long Damaskas i kam fo helpem King Hadadesa, ami blong King Deved hemi kilim dae 22,000 soldia blong olketa.

⁶ Den Deved hemi putum samfala seksin blong ami blong hem fo stap long Damaskas. So olketa long Aram i kam andanit long paoa blong hem, an olketa gohed fo peim taks long hem. Nao long evri ples wea Deved hemi go faet long hem, Yawe hemi mekem hem win.

⁷ Olketa sil fo stopem aro wea olketa komanda blong King Hadadesa i gohed fo karim, olketa wakem long gol. Deved hemi tekem kam olketa sil ya long Jerusalem.

⁸ An from tufala taon long Beta an Berotae, wea tufala i blong King Hadadesa, hemi tekem go plande bras tu.

⁹ Nao taem King Toi long Hamat hemi herem nius wea King Deved hemi winim ami blong King Hadadesa,

¹⁰ hemi sendem san blong hem Joram fo go tokhae long King Deved. An hemi talem tu hemi hapi tumas fo herem dat Deved hemi winim King Hadadesa, bikos Toi hemi bin faet agensim Hadadesa plande taem finis. Long taem ya, Joram hemi tekem kam samfala presen wea olketa wakem long gol, an silva, an bras. Den hemi givim long King Deved.

¹¹ King Deved hemi mektambu long olketa samting ya, mekem olketa i blong Yawe. Hem nao wanem hemi bin duim long olketa silva an gol wea hemi tekem taem hemi winim olketa pipol long olketa faet.

¹² Olketa pipol nao i pipol blong Idom, an pipol blong Moab, an pipol blong Amon, an pipol blong Filistia, an pipol blong Amalek. An hemi mektambu tu long olketa samting wea hemi tekem from King Hadadesa, san blong Rehob, hu hemi king long Soba.

¹³ Bihaen, Deved an ami blong hem i go faetem olketa blong Idom long vali wea nem blong hem “Vali fo Tekem Solt.” An olketa kilim dae 18,000 man blong Idom. Taem hemi kambaek, biknem blong hem hemi go raon long evri ples.

¹⁴ Hemi putum samfala seksin blong ami blong hem fo stap long plande ples long Idom, an evriwan long pipol blong Idom i stap andanit long paoa blong hem. Nao long evri ples wea Deved hemi go faet long hem, Yawe hemi mekem hem win.

Olketa Bikman blong King Deved

¹⁵ Deved hemi king ovarem evriwan long Israel. Oltaem hemi lukaftarem gudfala olketa pipol blong hem, long wei wea hemi gudfala an hemi stret.

¹⁶ Long taem ya, Joab, san blong Seruia, hemi komanda long ami. Jehosafat, san blong Ahilud, hemi kipim olketa rekod blong king.

¹⁷ Sadok, san blong Ahitub, an Ahimelek, san blong Abiata, tufala i prist. Seraea, hemi raetem olketa toktok blong king.

¹⁸ Benaea, san blong Jehoeada, hemi komanda long olketa sekiuriti hu i olketa man blong Keret an Pelet. An olketa san blong Deved i olketa prist.