2 Samuel 10 - Pijin Bible

King Deved hemi winim ami blong Amon an ami blong Aram

¹ Bihaen, King Nahas blong Amon hemi dae. Den san blong hem, Hanun, hemi kamap king.

² An King Deved hemi tingting olsem, “Mi mas fren gudfala wetem King Hanun ya, olsem wea dadi blong hem King Nahas hemi bin fren gudfala wetem mi.” So hemi sendem samfala man fo talem toksore long King Hanun. Taem olketa man ya i kasem eria blong Amon,

³ olketa bikman blong Amon i tok olsem long Hanun, lida blong olketa, “?Waswe, yu tingse King Deved hemi mekhae long dadi blong yu taem hemi sendem olketa man fo toksore? Nomoa. Hemi sendem kam olketa nomoa fo luksave long olketa samting long disfala taon, mekem hemi kam spoelem hem.”

⁴ So King Hanun hemi holem olketa man blong King Deved. An olketa man blong hem i resarem wan saet long biad blong olketa ya, an katemaot kaleko blong olketa mekem pipol lukim as blong olketa, den hemi raosim olketa.

⁵ Bat olketa filsem tumas fo go hom, an taem King Deved hemi herem nius abaotem samting ya, hemi sendem mesij go long olketa olsem, “Hemi gud nomoa yufala stap fastaem long Jeriko, go-go kasem taem wea biad blong yufala grou moa, den yufala save kambaek.”

⁶ Taem olketa blong Amon i save dat olketa mekem King Deved barava kros fogud long olketa, olketa haerem samfala ami blong Aram. Olketa kolem kam 20,000 soldia blong Aram wea olketa stap long Bet-Rehob an long Soba, an 12,000 man blong taon long Tob, an olketa kolem king blong Maaka tu wetem 1,000 man blong hem. Olketa evriwan i kam joenem olketa fo faet.

⁷ An taem King Deved hemi herem samting ya, hemi sendem Joab wetem evri soldia long ami blong hem fo go faetem olketa.

⁸ Den olketa soldia blong Amon i go stanap aotsaet long geit blong taon long Raba, an olketa redi fo faet long dea. An olketa soldia blong Aram wetem olketa soldia blong Tob, an olketa soldia blong Maaka, olketa stap redi fo faet aotsaet long taon ya, long open ples.

⁹ Oraet, Joab hemi luksave dat olketa soldia blong enemi i kam long frant an long bihaen long hem fo faetem hem. So hemi siusim olketa nambawan soldia blong hem, an putum olketa long ples wea olketa fesim olketa soldia blong Aram.

¹⁰ An olketa narafala soldia, hemi mekem brata blong hem, Abisae, fo hemi komanda long olketa. Abisae hemi putum olketa soldia long ples wea olketa fesim olketa soldia blong Amon.

¹¹ Den Joab hemi tok olsem long brata blong hem, “Sapos yu lukim dat ami blong Aram i winim mi, bae yu kam helpem mi, an sapos mi lukim dat ami blong Amon i winim yu, bae mi kam helpem yu.

¹² !Yu mas no fraet! Yumi mas faet strong fo sevem olketa pipol blong yumi, an olketa taon blong God. An mi save, Yawe bae hemi duim wanem hemi laekem.”

¹³ Den Joab wetem olketa soldia blong hem i muv go fo faetem olketa soldia blong Aram, bat olketa soldia blong Aram i ranawe nomoa.

¹⁴ An taem olketa soldia blong Amon i lukim dat olketa soldia blong Aram i gohed fo ranawe, olketa tu i ranawe from Abisae, an olketa go insaet long taon blong olketa moa. Bihaen, Joab hemi no faetem moa ami blong Amon, hemi gobaek long Jerusalem.

¹⁵ Taem ami blong Aram i lukim dat ami blong Israel i winim olketa, olketa kolem olketa soldia blong olketa fo kam tugeta.

¹⁶ An King Hadadesa hemi sendem toktok go fo kolem kam olketa soldia blong Aram wea olketa stap long narasaet long Yufretis Riva. So olketa kam long ples long Helam. Sobak, komanda blong olketa soldia blong King Hadadesa, hemi gohed fo lidim olketa.

¹⁷ Taem King Deved hemi herem nius abaotem samting ya, hemi kolem olketa soldia blong hem fo kam tugeta moa. Den hemi lidim olketa fo go akros long Jodan Riva, an go long Helam. Long ples ya, ami blong Aram hemi stanbae finis, an olketa kam fo faet agensim ami blong Deved.

¹⁸ Bat ami blong Israel i ronem olketa gobaek. Long datfala taem, ami blong King Deved i kilim dae 700 soldia blong kaat fo faet blong Aram, an 40,000 soldia blong olketa. An hemi kilim Sobak, komanda blong ami blong Aram, an hemi dae long dea.

¹⁹ Taem olketa king wea i stap andanit long paoa blong King Hadadesa i save dat ami blong Israel i winim hem, olketa kam fo mekem piis wetem olketa blong Israel. Den olketa ya i stap andanit long paoa blong King Deved an pipol blong Israel. An olketa blong Aram i fraet fo helpem moa pipol blong Amon.