2 Kronikols 9 - Pijin Bible

Kuin long Seba hemi kam lukim King Solomon

¹ Nao Kuin long Seba hemi herem nius abaotem King Solomon, so hemi kam fo lukim hem long Jerusalem. Hemi askem olketa had kuestin long king fo testem waes blong hem. Hemi tekem kam plande pipol wetem hem, an hemi putum plande samting long olketa kamel blong hem. Hemi garem olketa samting wea i smel naes fo wakem insens, an olketa ston wea hemi luknaes fogud, an plande gol tumas. Taem hemi kam lukim Solomon, hemi askem olketa kuestin long hem.

² Solomon hemi ansarem evri kuestin ya. No enisamting hemi had tumas long hem fo talemaot mining blong hem.

³ Nao kuin ya hemi luksave long waes blong hem, an hemi lukim bikfala haos blong hem wea hemi bildim.

⁴ An hemi lukim evri kaikai long tebol, an olketa bikman blong hem, an kaleko wea olketa wakaman i werem. Hemi lukim tu olketa wakaman wea i karim kam kaikai an waen long fist. An hemi lukim olketa sakrifaes wea hemi bin mekem long Tambuhaos blong Yawe. Nao evrisamting ya hemi mekem kuin fo barava sapraes tumas.

⁵ Den kuin hemi tok olsem long King Solomon, “Nius abaotem waka blong yu an waes blong yu wea mi herem taem mi stap long kantri blong mi, hemi barava tru tumas.

⁶ Bat mi no bilivim go-go mi kam lukim nao long ae blong mi. Yu waes tumas, an yu ris tumas winim wanem olketa pipol wea i kam talem long mi. Mi bin herem lelebet nomoa abaotem evrisamting ya.

⁷ Olketa bikman blong yu an olketa wakaman blong yu i save hapi tumas bikos olketa stap wetem yu olowe, an olketa garem gudfala sans fo herem olketa waes toktok blong yu.

⁸ !Mi preisim Yawe hu hemi God blong yu! Hemi mekem yu kamap king blong Israel, an hemi somaot dat hemi hapi tumas long yu. Bikos hemi tinghevi long yufala Israel olowe, hemi mekem yu fo kamap king wea hemi save falom wei wea hemi barava stret fogud, an jajem olketa pipol long stretfala wei.”

⁹ Den kuin hemi tekem kam olketa presen wea hemi karim kam, an givim go long king. Olketa presen ya hemi olsem, 4,000 kilo gol, an olketa samting wea i smel naes fo wakem insens, an olketa gudfala ston wea i luknaes fogud. Nao bihaen long taem ya, no eniwan hemi givim staka samting fo wakem insens winim wanem kuin long Seba hem givim.

¹⁰ (Olketa sip blong King Haeram i tekem kam gol from kantri long Ofia, an olketa tekem kam tu olketa nambawan ston wea i luknaes, an plande naesfala timba olketa kolem almug.

¹¹ King Solomon hemi yusim olketa almug timba fo mekem olketa step long lada long Tambuhaos blong Yawe, an long bikfala haos blong hem. An hemi yusim timba ya tu fo wakem olketa deferen kaen gita, mekem olketa ringim fo singsing long Tambuhaos. Kam kasem datfala taem, no eniwan bin tekem kam eni almug timba olsem long Israel.)

¹² Oraet, King Solomon hemi givim olketa evrisamting long Kuin long Seba wea hemi askem. So hemi givim samfala samting moa long hem winim wanem kuin hemi givim go long hem. Den kuin ya wetem olketa wakaman blong hem i gobaek long kantri blong hem.

King Solomon hemi ris tumas

¹³ King Solomon hemi save garem 23,000 kilo gol evri yia.

¹⁴ Hem nao antap long olketa seleni blong taks wea olketa bisnisman i gohed fo peim hem, an olketa seleni wea olketa bisnisman blong hem i winim, an olketa seleni wea olketa king blong Arebia i gohed fo peim hem, an olketa seleni wea olketa gavna blong olketa distrik blong Israel i gohed fo peim hem.

¹⁵ Hemi yusim gol fo wakem 200 bikfala sil fo stopem aro. Hevi blong gol fo wanfala sil ya hemi kolsap kasem seven kilo.

¹⁶ An hemi yusim gol fo wakem 300 smolfala sil. Hevi blong wanfala hemi kolsap kasem tu kilo. Hemi putum olketa sil ya insaet long Haos long Olketa Tri blong Lebanon.

¹⁷ An king hemi wakem wanfala bikfala tron blong hem tu. Hemi dekoretem hem wetem bikfala tit blong elifan, an nambawan gol.

^18-19 Tron ya hemi garem siksfala step fo goap long hem, an hemi garem tuelfala kaving blong laeon wea evriwan hemi stanap seleva long tufala en blong siksfala step ya. Hemi garem lou samting long frant long hem fo king hemi save putum lek blong hem long hem. Olketa wakem samting ya long gol. Tron ya hemi garem tu ples fo putum han, an hemi garem tufala kaving blong laeon hemi stanap, wanfala hemi stap long wan saet, an narawan hemi stap long nara saet. No eni narafala king long wol hemi mekem eni bikfala tron olsem diswan blong Solomon.

²⁰ An evri kap blong King Solomon, olketa wakem long gol. An evri narafala samting wea olketa yusim long disfala Haos long Olketa Tri blong Lebanon, olketa wakem long gol nomoa. Olketa no yusim silva fo wakem olketa samting ya bikos long taem blong Solomon, olketa tingse silva hemi samting nating nomoa.

²¹ An King Solomon hemi garem plande bikfala kago sip wea kru blong olketa i olketa man blong King Haeram. Nao evri trifala yia, olketa sip ya i kambaek wetem gol, an silva, an bikfala tit blong elifan, an olketa animol olsem enikaen mangki.

²² Long taem ya, King Solomon hemi ris tumas winim olketa narafala king long wol, an hemi waes tumas winim olketa tu.

²³ Nao plande king long wol i laek fo kam an herem olketa waes tingting wea God hemi givim long hem.

²⁴ Evri yia nomoa olketa evriwan i gohed fo givim olketa presen long hem. Olketa presen ya i olsem: olketa samting long silva an long gol, an olketa nambawan kaleko, an olketa wepon, an olketa lif fo wakem insens, an olketa hos, an olketa dongki.

²⁵ Solomon hemi garem 4,000 ples fo putum olketa kaat fo faet wetem olketa hos blong olketa, an hemi garem 12,000 hos. Hemi kipim samfala long Jerusalem, an hemi putum olketa narafala long samfala spesol taon long Israel.

²⁶ Solomon hemi wanfala bikfala king wea hemi rul ovam olketa narafala king long ples ya, stat long Yufretis Riva long not, go kasem Filistia long west, an hemi go kasem spialaen blong Ijip long saot.

²⁷ Solomon hemi mekem silva fo kamap plande fogud long Jerusalem olsem ston nating nomoa. An hemi mekem timba blong sida tri hemi kamap plande fogud olsem enikaen timba wea hemi grou olobaot nomoa long olketa hil.

²⁸ Olketa bisnisman blong Solomon i baem olketa hos blong hem from Musri an olketa narafala kantri.

King Solomon hemi dae

²⁹ Olketa narafala samting wea King Solomon hemi duim, from taem wea hemi stat fo rul kam kasem en blong hem, olketa raetemdaon long trifala buk wea olketa kolem, Rekod blong Profet Natan, an Olketa Toktok blong Profet Ahaeja hu hemi man blong Saelo, an Olketa Spesol drim blong Profet Ido abaotem King Jeroboam long Israel.

³⁰ Solomon hemi king long Jerusalem, an hemi ovarem evri traeb blong Israel fo fotifala yia.

³¹ Taem hemi dae, olketa berem hem long beregraon blong olketa olo long Biktaon blong King Deved. Den san blong hem, Rehoboam, hemi kamap king.