2 Kronikols 8 - Pijin Bible

Olketa waka wea King Solomon hemi duim

¹ King Solomon hemi wakem Tambuhaos blong Yawe an bikfala haos blong hem fo tuenti yia.

² An hemi bildim moa olketa taon wea King Haeram blong Taea hemi bin givim long hem, an hemi mekem olketa traeb blong Israel fo stap long olketa.

³ King Solomon hemi go faetem olketa long Hamat-Soba long not. Hemi winim olketa an hemi tekova long taon ya.

⁴ An hemi mekem olketa bildim wolston raonem taon long Tadmoa long drae eria. An hemi mekem olketa fo bildim olketa taon long Hamat fo kipim olketa kaikai an olketa samting fo faet long hem.

⁵ An King Solomon hemi mekem olketa bildim moa Bet-Horon wea hemi antap long maonten, an Bet-Horon wea hemi long daon long maonten. Hemi mekem tufala taon ya i garem bikfala wolston raonem, wetem geit wea olketa save lokem long longfala aean.

⁶ An olketa wakem tu taon long Baalat, an olketa taon fo putum kaikai, an olketa taon fo kipim olketa kaat fo faet an olketa hos blong hem. An olketa bildim olketa narafala samting wea hemi wande bildim long Jerusalem, an long Lebanon, an long olketa narafala ples long eria wea hemi king ovam.

^7-10 Long taem wea pipol blong Israel bin tekova long kantri ya, olketa no save kilim dae evri pipol wea i stap long lan ya. Olketa ya i long laen blong Het, an blong Amoa, an blong Peris, an blong Hivi, an blong Jebus. So olketa long olketa laen ya hu i no blong pipol blong Israel i stap yet long lan blong Israel. Nao King Solomon hemi fosim olketa ya fo waka olsem slev, an olketa waka olsem slev olowe long Israel. Hemi putum 250 man blong Israel fo bos long olketa slev ya. Bat hemi no mekem olketa pipol blong Israel fo waka olsem slev. Hemi mekem olketa fo kamap soldia blong hem, an komanda blong ami. An samfala moa i bos long olketa kaat fo faet, an long olketa soldia hu i raedem hos.

¹¹ An taem king hemi finisim bikfala haos blong waef blong hem wea hemi dota blong king blong Ijip, Solomon hemi tekem hem goaot long Biktaon blong Deved, fo go stap long haos blong hem. Hemi tok olsem, “Hemi no stret fo waef blong mi fo stap long bikfala haos blong dadi blong mi, bikos olketa ples wea Tambu Boks blong Yawe hemi bin stap long hem i holi.”

¹² Oltaem, Solomon hemi bonem olketa sakrifaes go long Yawe. Hemi bonem olketa ya antap long olta hemi bin wakem long eria long frant long Tambuhaos.

¹³ Hemi gohed fo mekem olketa sakrifaes blong olketa tambu de olsem wea Lo blong Mosis hemi talem. Hem nao long Sabat de, an long Fist blong Niumun, an long trifala fist olketa mekem evri yia olsem Bikde blong Bred wea hemi No Garem Yist, an Bikde blong Sevenfala Wik, an Bikde fo Stap long Smolfala Lif Haos.

¹⁴ Hemi makem olketa seksin blong olketa prist fo duim waka wea olketa mas duim evri de falom rul wea dadi blong hem i bin mekem. An hemi makem olketa Livaet fo helpem olketa prist, an fo singsing an preisim God. Hemi divaedem olketa gad blong Tambuhaos long olketa seksin, an hemi mekem olketa fo gadem olketa geit blong Tambuhaos falom wei wea Deved hu hemi man blong God hemi bin talem bifoa.

¹⁵ Olketa prist an olketa Livaet i barava falom olketa strong toktok blong king long evrisamting, nomata long wei fo lukaftarem olketa stoarum tu.

¹⁶ So evri waka wea Solomon hemi duim hemi finisim nao. Olketa waka long Tambuhaos blong Yawe hemi gohed gudfala, stat long taem olketa mekem faondesin blong hem, kam kasem taem wea hem finisim olketa waka long hem.

¹⁷ King hemi go long tufala taon long Esion-Geba an Elat long saetsi long Idom.

¹⁸ Long datfala taem, King Haeram blong Taea hemi sendem samfala sip go long hem. Olketa sip ya i garem olketa kapten an kru blong olketa wea i save gudfala long hao fo waka long sip. Olketa joen wetem olketa man blong King Solomon. Olketa go long kantri long Ofia, an olketa karim kambaek 16,000 kilo gol, an givim long King Solomon.