2 Kronikols 4 - Pijin Bible

Olketa samting long Tambuhaos blong Yawe

¹ Olketa wakem wanfala skuea olta long bras. Longfala blong olketa fofala saet blong olta ya, hemi naen mita. An hae blong hem hemi foa an haf mita.

² Olketa wakem wanfala bikfala raon tangk long bras. Hae blong hem hemi winim tu mita, an insaet long hem, stat long wanfala saet go kasem nara saet, hemi kolsap foa an haf mita, an saes blong hem fo goraonem aotsaet blong hem hemi tetin an haf mita.

³ Long aotsaet blong tangk ya, andanit long mamana blong hem, hemi garem olketa kaving blong man buluka long tufala laen wea i goraonem hem. Olketa kaving ya i barava joen olsem wan pis wetem tangk, an olketa wakem levenfala kaving blong buluka long evri haf mita.

⁴ An olketa wakem tuelfala kaving long man buluka. Olketa mekem tuelfala fo stanap tugeta. Nao trifala fes go long ist, trifala fes go long saot, trifala fes go long west, an trifala fes go long not. Tangk ya hemi sidaon antap long baeksaet blong tuelfala ya.

⁵ Tik blong wol blong tangk ya hemi kolsap eit sentemita. An antap long mamana blong hem hemi open olsem wanfala kap wea hemi ben go aotsaet olsem flaoa blong lili. Tangk ya hemi save holem 66,000 lita wata.

⁶ An olketa wakem tenfala bikfala besin, an olketa putum faefala long saot saet long Tambuhaos, an nara faefala long saet long not. Olketa besin ya i fo olketa prist i yusim fo wasim olketa mit blong sakrifaes wea i bone. An wata wea hemi stap insaet long bikfala tangk ya hemi fo olketa prist i yusim fo suim.

^7-8 Olketa wakem tenfala spesol frem blong lam falom plan blong olketa. An olketa wakem tenfala tebol. Nao olketa putum tenfala ya insaet long Tambuhaos ya. Olketa putum faefala spesol frem blong lam an faefala tebol long saet long saot, an faefala spesol frem blong lam an faefala tebol long saet long not. An olketa wakem 100 smolfala besin long gol.

⁹ An olketa wakem wanfala open eria wea i garem wolston aotsaet long Tambuhaos. Open eria ya hemi fo olketa prist nomoa. An olketa wakem wanfala wolston raonem bikfala open eria aotsaet long Tambuhaos. Olketa geit fo go long tufala open eria ya, olketa kavarem long bras.

¹⁰ An olketa putum bikfala tangk ya kolsap long kona blong Tambuhaos long saot ist.

¹¹ An olketa wakem finis tu olketa baket fo holem asis, an olketa savol, an olketa besin. So Huram hemi finisim evri waka wea King Solomon hemi kolem hem kam fo duim long Tambuhaos blong God.

¹² Olketa samting wea hemi wakem long bras hemi olsem: Tufala bikfala pos. Tufala spesol hed wea i luk olsem baol fo stap antap long tufala pos ya. Tufala samting olsem net fo dekoretem tufala hed ya.

¹³ 400 kaving long frut blong pomegranet, 200 long wanfala net long wanfala hed, an 200 fo net long narafala hed.

¹⁴ Tenfala kaat fo karim wata, wetem tenfala bikfala besin blong wata.

¹⁵ Wan bikfala tangk, wetem tuelfala kaving long man buluka wea tangk ya hemi sidaon antap long tuelfala.

¹⁶ Olketa baket fo holem asis, an olketa savol, an olketa fok blong mit. Hem nao evrisamting blong Tambuhaos wea Huram hemi wakem long bras fo King Solomon.

¹⁷ King hemi talem hem fo mekem olketa samting ya long flat eria kolsap long Jodan Riva, long midol long tufala taon long Sukot an Saretan. Long dea nao, olketa poarem go bras wea olketa meltem, fo mekem olketa samting ya.

¹⁸ Bat king hemi no mekem olketa skelem evrisamting ya, bikos hemi barava plande tumas, so olketa no wari fo faendemaot hevi blong olketa.

¹⁹ An Solomon hemi talem olketa wakaman fo mekem olketa samting fo putum insaet long Tambuhaos. Olketa samting wea olketa wakem long nambawan gol hemi olsem: Olta fo Bonem Insens. Olketa Tebol fo Tambu Bred.

²⁰ Tenfala spesol frem blong olketa lam, wetem olketa lam, olketa putum long frant long Barava Tambu Rum olsem Lo hemi talem.

²¹ Olketa kaving long olketa flaoa, an olketa lam, an olketa sisis fo holem faea. Olketa sisis ya i gol nomoa.

²² An olketa samting fo kilim lam, an olketa dis fo karim insens, an olketa savol fo karim asis wea hemi gohed fo laet. An olketa gol wea i kavarem tufala doa blong Barava Tambu Rum, an tufala doa blong bikfala rum blong Tambuhaos.