2 Kronikols 3 - Pijin Bible

King Solomon hemi wakem Tambuhaos

^1-2 Nao long mekfoa yia wea Solomon hemi king, long mektu mans blong hem, Solomon hemi stat fo bildim Tambuhaos blong Yawe. Hemi bildim long ples long Jerusalem wea dadi blong hem King Deved, hemi redim finis ples fo bildim Tambuhaos ya. Hem nao antap long maonten long Moraea, long ples fo klinim wit wea bifoa hemi blong Arauna, man long laen blong Jebus. Hem nao ples wea Yawe hemi bin som hem seleva long Deved.

³ Longfala blong faondesin blong Tambuhaos hemi tuenti-seven mita, an waed blong hem hemi naen mita.

⁴ Waed blong varanda long frant long Tambuhaos hemi naen mita, an hae blong hem hemi kasem naen mita. An wol long insaet long varanda ya, olketa kavarem hem long nambawan gol.

⁵ Bikfala rum blong Tambuhaos ya, olketa wakem olketa wol blong hem long timba blong paen tri, an olketa kavarem olketa timba ya wetem gudfala gol. An olketa dekoretem olketa wol ya. Olketa wakem olketa kaving long pam tri an long olketa sen.

⁶ Olketa dekoretem Tambuhaos ya wetem olketa nambawan spesol ston, an wetem gol wea hemi kam from ples long Pavaem.

⁷ Olketa putum gol long olketa wol, an long olketa rafta blong hem, an long olketa doa blong hem, an long olketa frem blong doa. An olketa mekem kaving long enjel long olketa wol.

⁸ Olketa wakem Barava Tambu Rum. Longfala blong rum ya hemi naen mita, an waed blong hem tu hemi naen mita. Saes blong hem hemi falom waed blong Tambuhaos ya. Olketa yusim gol fo kavarem olketa wol blong Barava Tambu Rum ya. Hevi blong gol ya, hemi 21,000 kilo.

⁹ An gol wea olketa yusim fo mekem olketa nila long hem, hemi hevi winim haf kilo. An olketa mekem olketa wol blong olketa rum antap tu long gol.

¹⁰ Olketa wakem tufala kaving blong enjel an kavarem tufala ya long gol. Olketa putum tufala kaving ya long Barava Tambu Rum.

^11-13 Olketa stanemap wanfala kaving blong enjel long wansaet an narawan long narasaet, an tufala fes kam long doa. Tufala enjel ya, i garem wing. Nao longfala blong wanfala wing hemi winim tufala mita, an taem hemi putum tufala long rum ya, wing blong tufala i open, an en blong wanfala wing hemi kasem en blong wing blong narawan long midol long rum. Longfala blong fofala wing blong tufala enjel, stat long en blong wanfala wing go kasem en blong wing blong nara enjel, hemi naen mita.

¹⁴ An kaleko wea olketa hangem fo satem rum ya, olketa wakem long nambawan waet kaleko, wetem blu koton, an red koton, an papol koton. Olketa yusim olketa koton ya fo somapem olketa piksa blong enjel long hem.

Tufala bikfala pos wea olketa wakem long bras

¹⁵ Long frant long Tambuhaos olketa wakem tufala bikfala pos. Hae blong tufala pos ya hemi sikstin mita. An olketa wakem tufala hed long tufala pos ya. Hae blong tufala hed ya i winim tu mita.

¹⁶ Olketa dekoretem tufala hed ya wetem bras sen wea olketa mekem hem fo luk olsem net wea hemi goraonem. An olketa dekoretem hem wetem 100 kaving blong frut blong pomegranet.

¹⁷ Olketa stanemap tufala bikfala pos ya long frant long varanda blong Tambuhaos. Wanfala long saet long saot, Solomon hemi kolem hem Jakin. An narawan long saet long not, hemi kolem hem Boas.