2 Kronikols 27 - Pijin Bible

King Jotam blong Jiuda

¹ Jotam hemi kamap king long Jiuda taem hemi kasem tuenti-faev yia. An hemi king long Jerusalem fo sikstin yia. Mami blong hem hemi Jerusa hu hemi dota blong Sadok.

² King Jotam hemi gohed fo duim olketa samting wea i stret long ae blong Yawe barava olsem wea dadi blong hem hemi bin duim, bat hemi no go insaet long Tambuhaos blong Yawe olsem dadi blong hem hemi bin duim. Nao olketa pipol blong hem i gohed fo mekem sin olsem bifoa.

³ Hemi wakembaek gudfala disfala geit long saet long not long open eria blong Tambuhaos blong Yawe, an hemi duim plande waka moa long bikfala wolston blong Jerusalem long ples olketa kolem Ofel.

⁴ An long olketa hil blong Jiuda, hemi bildim olketa taon, an hemi wakem olketa gadhaos an olketa strong sefples fo haed long bus.

⁵ Jotam hemi go faetem king blong Amon, an hemi winim ami blong hem. So long trifala yia, hemi fosim olketa fo peim taks long hem. Evri yia olketa givim plande samting long hem olsem: 3,400 kilo silva, an 72,500 bikfala baeg wit, an 72,500 bikfala baeg bali.

⁶ Jotam hemi kamap strong, bikos hemi tinghevi fo falom wei blong Yawe hu hemi God blong hem.

⁷ Olketa narafala samting wea i hapen taem Jotam hemi king, an olketa faet wea hemi mekem, an olketa samting hemi duim, olketa raetemdaon long Buk Abaotem Olketa Samting Olketa King blong Israel an Jiuda i Duim.

⁸ Long taem hemi kamap king, hemi kasem tuenti-faev yia, an hemi king long Jerusalem fo sikstin yia.

⁹ Taem hemi dae, olketa berem hem long beregraon blong olketa king long Biktaon blong King Deved. An san blong hem Ehas, hemi sensim hem fo kamap king.