2 Kronikols 22 - Pijin Bible

King Ahasaea blong Jiuda

¹ Ahasaea hemi lasbon blong King Jehoram. Olketa pipol blong Jerusalem i mekem hem sensim dadi blong hem fo kamap king bikos olketa soldia blong Arab i bin kam kilim dae olketa narafala san blong Jehoram ya. So Ahasaea, san blong King Jehoram, hemi kamap king long Jiuda.

² Long datfala taem, hemi kasem tuenti-tu yia, an hemi king long Jerusalem fo wanfala yia nomoa. Mami blong hem, hemi Atalaea, dota blong King Ehab, an grandota blong King Omri wea hemi king long Israel bifoa.

³ Ahasaea hemi falom olketa ravis wei blong laen blong King Ehab bikos mami blong hem, Kuin Atalaea, hemi gohed fo pusum hem fo falom olketa ravis wei ya.

⁴ Hemi gohed fo sin agensim Yawe bikos taem dadi blong hem dae, olketa man long laen blong King Ehab nao i givim advaes long hem, an olketa lidim hem fo gorong.

⁵ Nao bikos hemi falom advaes blong olketa, hemi go wetem King Joram blong Israel, hu hemi san blong King Ehab, fo faetem King Hasael blong Siria. Olketa faet kolsap long taon long Ramot-Gilead. Long disfala faet, King Joram hemi garekil.

⁶ So hemi taneraon, an gobaek long taon long Jesreel. An hemi stap kuaet long ples ya mekem hemi kamap oraet moa. Bihaen, King Ahasaea blong Jiuda hemi kam visitim King Joram blong Israel bikos hemi garekil.

⁷ Long taem King Ahasaea hemi visitim King Joram, Yawe hemi mekem trabol fo spoelem hem. Nao Yawe hemi bin siusimaot Jehu, san blong Nimsi, fo hemi kilim dae olketa man long laen blong King Ehab. Taem King Ahasaea hemi stap wetem King Joram, tufala king ya goaot fo mitim Jehu.

⁸ Oraet, taem Jehu hemi gohed fo panisim laen blong King Ehab, hemi faendem samfala bikman blong Jiuda wetem olketa san blong olketa wantok blong King Ahasaea. Olketa bin kam wetem King Ahasaea taem hemi visitim King Joram. Den Jehu ya hemi kilim dae olketa evriwan.

⁹ Nao hemi lukaotem King Ahasaea, go-go olketa man blong Jehu i faendem hem long Samaria. Olketa kasholem hem, an tekem hem kam long Jehu. Den olketa kilim hem dae. Bat olketa berem hem long gudfala wei, bikos olketa tinghae long olfala grani blong hem King Jehosafat hu hemi bin traehad tumas fo duim wanem Yawe hemi laekem. So no eniwan long laen blong King Ahasaea hu hemi laef yet hemi garem strong fo kamap king.

Kuin Atalaea long Jiuda

¹⁰ Taem Kuin Atalaea, mami blong King Ahasaea long Jiuda hemi lukim dat san blong hem hemi dae, hemi stat fo kilim dae evriwan long laen blong king blong Jiuda.

¹¹ Bat wanfala nomoa hemi mistim, hem nao hemi san blong king ya, an nem blong hem Joas. Kolsap nomoa olketa kilim hem dae wetem olketa narafala pikinini blong king, bat wanfala anti blong hem, Jehoseba, hemi sevem hem. Woman ya, hemi dota blong King Jehoram, an hemi sista blong King Ahasaea, an hemi waef blong Prist Jehoeada. Hemi go tekem Joas ya wetem woman hu hemi givim susu long hem, an hemi go haedem tufala long wanfala bedrum. So kuin ya hemi no kilim Joas dae.

¹² Nao Joas hemi gohed fo haed wetem olketa long Tambuhaos ya fo siksfala yia long taem Kuin Atalaea hemi gohed fo rul ovam Jiuda.