2 Kronikols 21 - Pijin Bible

¹ King Jehosafat hemi dae, an olketa berem hem long beregraon blong olketa king long Biktaon blong King Deved. Den san blong hem, Jehoram, hemi sensim hem fo kamap king.

King Jehoram blong Jiuda

² King Jehoram hemi garem siksfala brata olsem: Asaraea, an Jehiel, an Sekaraea, an Asaraeahu, an Mikael, an Sefataea. Olketa evriwan ya i san blong King Jehosafat blong Israel.

³ Bifoa, Jehosafat hemi bin givim plande gol, an silva, an olketa narafala nambawan samting long olketa san blong hem. An hemi putum olketa evriwan long olketa taon long Jiuda wea i garem wolston raonem, mekem olketa lukaftarem. Bat hemi talemaot dat Jehoram nao bae hemi save sensim hem fo kamap king bikos hemi fasbon.

⁴ Nao taem King Jehoram hemi rul strong ovam Jiuda, hemi kilim dae olketa brata blong hem, an hemi kilim dae tu samfala bikman blong Jiuda.

⁵ Long taem Jehoram hem kamap king hemi kasem teti-tu yia, an hemi king long Jerusalem fo eitfala yia.

⁶ Bat hemi falom olketa ravis wei blong King Ehab wetem olketa narafala king blong Israel bifoa, bikos hemi maritim wanfala dota blong King Ehab. Nao hemi gohed fo sin agensim Yawe.

⁷ Bat Yawe hemi no spoelem laen blong King Deved, bikos bifoa hemi bin mekem wanfala promis long King Deved. Hemi bin promis dat samwan long laen blong Deved hemi king olowe long Jiuda, olsem wanfala laet wea hemi saen olowe.

⁸ Long taem Jehoram hemi king, olketa pipol blong Idom i les fo king blong Jiuda hemi ovam olketa, so olketa siusim wanfala king blong olketa seleva.

⁹ Den King Jehoram an olketa komanda blong hem i tekem olketa kaat fo faet blong olketa, an go faetem pipol blong Idom. Olketa soldia blong Idom i kam hipap raonem olketa. Bat long naet, king an olketa soldia blong hem, olketa go faet go-go olketa ranawe.

¹⁰ Stat long datfala taem, pipol blong Idom i agensim pipol blong Jiuda, an olketa stap olsem kam kasem tude. An long semtaem, olketa pipol blong taon long Libna tu i no laekem king blong Jiuda fo rul ovam olketa, so olketa agensim pipol blong Jiuda. Olketa samting ya i kamap olsem bikos Jehoram hemi lusim Yawe hu hemi God blong olketa olfala grani blong hem.

¹¹ Hemi gohed fo wakem olketa tambuples fo wosipim olketa narafala god antap long olketa hil long Jiuda, so hemi mekem pipol blong Jerusalem fo aftarem olketa narafala god, an hemi lidim olketa narafala pipol blong Jiuda fo lusim stretfala wei.

¹² Profet Elaeja hemi sendem wanfala leta go long King Jehoram. Hemi sei olsem, “Yawe hu hemi God blong olfala grani blong yu Deved, hemi tok olsem long yu, ‘Dadi blong yu King Jehosafat, an grani blong yu King Asa, tufala falom olketa gudfala wei, bat yu no falom wei blong tufala.

¹³ Yu falom nomoa olketa ravis wei blong olketa king blong Israel. An yu lidim olketa pipol blong Jerusalem an olketa narafala pipol blong Jiuda fo aftarem olketa narafala god, olsem King Ehab an laen blong hem i duim long Israel. An yu bin kilim dae olketa brata blong yu tu. Olketa nao i blong laen blong dadi blong yu, an olketa ya i gudfala winim yu.

¹⁴ So bae mi Yawe mi panisim olketa pipol blong yu, an olketa san blong yu, an olketa waef blong yu. Ya, bae mi barava spoelem evrisamting blong yu.

¹⁵ An bae mi mekem yu fo garem wanfala sik long bele blong yu. Insaet long bele blong yu bae hemi barava nogud, an evri de bae hemi kamap wos moa go-go bele blong yu hemi kamaot.’ ”

¹⁶ Nao Yawe hemi mekem samfala enemi fo kam an faetem King Jehoram. Olketa enemi ya nao i ami blong Filistia, an ami blong olketa Arab wea i stap kolsap long olketa pipol blong Kus.

¹⁷ Olketa kam faet long Jiuda. Olketa go olowe insaet long haos blong king, an tekem evrisamting blong hem, an olketa san blong hem, an olketa waef blong hem. Bat lasbon san blong Jehoram wea nem blong hem hemi Ahasaea, hem nomoa olketa no tekem.

¹⁸ Bihaen, Yawe hemi mekem King Jehoram fo garem sik long bele blong hem wea no eniwan save kiurim.

¹⁹ An sik hemi bikfala olsem fo kolsap tufala yia, den bele blong hem hemi kamaot. King ya hemi safa tumas go-go hemi dae. Olketa pipol blong hem i no mekem eni bikfala faea fo somaot dat olketa i tinghae long hem, olsem olketa bin duim long olketa olfala grani blong hem.

²⁰ Long taem Jehoram hem kamap king, hemi kasem teti-tu yia, an hemi king long Jerusalem fo eitfala yia. Taem hemi dae, no eniwan hemi sore long hem. Olketa berem hem long Biktaon blong King Deved, bat i no long beregraon blong olketa king.