2 Korin 7 - Pijin Bible

¹ Olketa gudfala fren, hem nao olketa promis wea God hemi givim fo yumi. Dastawe yumi mas mekem yumi seleva fo klin long evrisamting wea hemi save mekem bodi o tingting blong yumi fo no klin. An bikos yumi tinghae tumas long God, yumi mas falom wei wea hemi barava holi.

Hapi blong Pol

² Yufala mas somaot dat yufala lavem mifala. Mifala no duim enisamting rong long eniwan. Mifala no spoelem eniwan, an mifala no ravem eniwan.

³ Mi no talem diswan fo tok agensim wei blong yufala. Nomoa. Mi bin talem yufala finis, mifala lavem yufala tumas, an nomata yumi laef o yumi dae bae yumi joen tugeta olowe.

⁴ Mi barava trastem yufala, an mi praod tumas long yufala. Nomata enikaen trabol hemi kasem mifala, yufala mekem tingting blong mi i strong an mi barava hapi fogud.

⁵ Long bifoa, taem mifala go kasem Masedonia, mifala nating res. Enikaen trabol nomoa i gohed long taem ya. Olketa pipol i raoa wetem mifala an mifala wari fogud.

⁶ Bat nomata olsem, God hu hemi save strongim tingting blong olketa hu i sore, hemi mekem mifala fo hapi moa taem Taetas hemi kam.

⁷ Mifala no hapi nomoa bikos Taetas hemi kam, bat mifala hapi tu long nius wea hemi talem kam, dat yufala bin mekem hem filhapi. Hemi talem mifala dat yufala barava laekem tumas fo lukim mi moa, an yufala filsore tumas, an yufala tinghevi tumas long mi distaem. So mi barava filhapi tumas.

⁸ Nomata mi mekem yufala filnogud long disfala leta wea mi raetem bifoa, mi no filsore long diswan. Fastaem mi filsore taem mi herem dat hemi bin mekem yufala filnogud fo lelebet taem.

⁹ Bat distaem mi hapi nao. I no bikos mi bin mekem yufala filnogud, bat bikos hemi bin mekem yufala fo sensim olketa wei blong yufala. Yufala filnogud long wei wea hemi mekem yufala sens olsem God laekem, so leta blong mifala i no spoelem yufala.

¹⁰ Taem man hemi filnogud long wei wea hemi mekem hem sens olsem God laekem, hemi save sensim tingting blong hem, mekem God hemi sevem hem. So yumi no save sore long diskaen wei. Bat taem man hemi filnogud long wei blong man nomoa, hemi save mekem hem fo dae.

¹¹ Yufala lukim nao wanem hemi hapen from yufala filnogud long wei wea God hemi laekem. Yufala tinghevi long stretfala wei long disfala trabol, an yufala traehad fo somaot dat yufala no rong. Yufala somaot kros long man hu hemi mekem trabol, an yufala fraetem God tu. Yufala laekem tumas fo lukim mi moa. Yufala tingting strong long God, an wiling fo panisim eniwan hu hemi rong. Long evrisamting yufala duim, yufala somaot finis dat yufala no rong long disfala trabol.

¹² Nomata mi raetem leta ya lastaem, mi no raetem bikos mi tingim nomoa disfala man hu hemi duim disfala rong samting agensim narafala man. An hemi no bikos mi tingim nomoa disfala narafala man tu. Mi bin raet go bikos mi wande mekem klia long yufala seleva, long ae blong God, wea yufala garem strongfala tingting fo obeim mifala.

¹³ From disfala wei blong yufala nao mifala hapi tumas. Mifala filgud long yufala, an mifala hapi tumas tu long Taetas hu hemi hapi bikos yufala mekem maen blong hem fo filgud moa.

¹⁴ Mi bin tokpraod abaotem yufala long Taetas, an yufala no mekem mi filsem long hem. Evrisamting mifala talem yufala hemi tru, an long sem wei tu, yufala bin somaot dat disfala tokpraod blong mifala abaotem yufala hemi tru.

¹⁵ Taetas hemi lavem yufala tumas bikos hemi tingabaotem hao yufala evriwan bin wiling fo obeim hem an fraetem hem an tinghae long hem an yufala bin lukaftarem hem gud tumas.

¹⁶ !Mi hapi tumas bikos mi barava save trastem yufala!