2 Korin 3 - Pijin Bible

Niufala spesol agrimen winim olwan

¹ ?Waswe, yufala tingse mifala trae fo haemapem mifala seleva moa? Nomoa. Mifala no olsem samfala pipol wea olketa mas garem leta fo talemaot dat olketa nao barava wakaman blong God. Mifala no nidim eni leta from yufala o from eniwan.

² Yufala seleva nao olsem leta fo tokabaotem mifala, wea olketa toktok insaet long leta ya, hemi stap long laef blong yufala. Evriwan save ridim disfala leta an garem save long hem.

³ An hemi klia dat Kraes nao hemi raetem disfala leta wea hemi kamaot long waka blong mifala. Disfala leta, Kraes hemi no raetem wetem ingk, bat hemi raetem wetem Spirit blong God hu hemi laef. An hemi no raetem antap long flat ston, bat hemi raetem insaet long haat blong yufala.

⁴ Mifala talem diswan, bikos Kraes nao hemi mekem mifala biliv strong long God.

⁵ Mifala no garem enisamting long mifala seleva, mekem mifala sei mifala nao fit fo duim disfala waka. God nomoa hemi mekem mifala fit fo duim disfala waka.

⁶ Hem nao hemi mekem mifala fit fo waka andanit long disfala niu spesol agrimen. An spesol agrimen ya, hemi no samting blong Lo wea olketa bin raetemdaon, bat hemi blong Holi Spirit. Bikos disfala Lo hemi mekem pipol dae, bat Holi Spirit hemi givim laef.

⁷ Waka blong Lo wea olketa raetemdaon long tufala ston, hemi mekem pipol fo dae. An disfala Lo hemi kam wetem saen blong bikfala paoa blong God, wea hemi saen kam long fes blong Mosis. An nomata disfala saen long fes blong hem hemi go-go fo lus, olketa pipol olketa no save luk go long fes blong hem.

⁸ Bat disfala saen blong bikfala paoa blong God wea hemi kam wetem waka blong Holi Spirit, hem nao hemi bikfala moa winim narawan bifoa.

⁹ Olfala spesol agrimen hemi bin garem saen blong bikfala paoa blong God, nomata Lo ya hemi save jajem pipol fo dae. !So disfala niufala spesol agrimen wea hemi mekem pipol fo stret, hemi garem saen blong bikfala paoa blong God wea hemi nambawan tumas winim faswan!

¹⁰ So disfala saen wea olketa lukim bifoa, hemi no nambawan nao, bikos disfala niufala saen blong paoa blong God hemi barava bik tumas moa.

¹¹ An disfala olfala spesol agrimen hemi no save stap longtaem, bat nomata olsem hemi bin garem saen blong bikfala paoa blong God. !Bat disfala niufala spesol agrimen wea bae hemi stap olowe, hemi garem saen blong bikfala paoa blong God wea hemi barava ovarem moa faswan ya!

¹² Nao bikos mifala trastem disfala niufala spesol agrimen, mifala nating fraet.

¹³ Mifala no olsem Mosis wea hemi kavarem fes blong hem, mekem olketa Israel i no save lukim dat saen blong God hemi go-go fo lus from fes blong hem.

¹⁴ So tingting blong olketa hemi barava sat. An nomata distaem, taem olketa ridim olketa buk abaotem olfala spesol agrimen ya, wanfala samting olsem kaleko hemi satem tingting blong olketa yet. Disfala samting hemi save aot nomoa taem olketa joen wetem Kraes.

¹⁵ Ya, evritaem olketa ridim Lo blong Mosis, disfala samting hemi gohed yet fo satem tingting blong olketa.

¹⁶ Bat taem eniwan hemi tane go long Masta, samting wea hemi satem tingting blong hem, Masta hemi tekemaot nao.

¹⁷ Masta ya, hemi minim Holi Spirit, an taem Spirit blong Masta hemi stap long pipol, olketa fri nao.

¹⁸ Yumi evriwan hu i no garem enisamting wea hemi kavarem fes blong yumi, yumi somaot disfala saen blong bikfala paoa blong Masta. An oltaem nomoa, disfala saen blong paoa blong Masta hu hemi Holi Spirit, hemi grou bikfala moa, an hemi mekem yumi sens go-go yumi kamap olsem hem.