2 Korin 2 - Pijin Bible

¹ From diswan nao mi tingim strong dat mi no save go long yufala moa, nogud mi mekem yufala filnogud.

² ?Sapos mi mekem yufala filnogud, bae hu nao mekem mi hapi moa? Bikos yufala nomoa save mekem mi hapi.

³ Dastawe mi raetem nara leta ya long yufala, bikos mi no wande lukim yufala long datfala taem. Nogud yufala hu i save mekem mi hapi, bae yufala mekem mi filnogud. Mi biliv dat sapos mi hapi, bae yufala evriwan hapi tu.

⁴ Taem mi raetem leta ya, mi filnogud tumas an mi sore tumas go-go mi krae nao. An mi no raetem leta ya fo mekem yufala filnogud, bat fo mekem yufala save dat mi lavem yufala evriwan tumas.

Pol fogivim wanfala man

⁵ Nao disfala man hu hemi bin mekem yufala ya fo filnogud tumas, hemi no mekem mi filnogud tumas. Bat mi no laek fo talem plande samting wea hemi spoelem man ya.

⁶ Hemi naf nao bikos plande long yufala panisim hem finis.

⁷ Distaem, hemi moabeta fo yufala fogivim hem an strongim tingting blong hem. Nogud biliv blong hem dae long sore.

⁸ So mi askem strong long yufala fo mekem hem save dat yufala barava lavem hem.

⁹ Mi raetem leta ya long yufala lastaem bikos mi wande testem yufala an lukim sapos yufala wiling olowe fo duim wanem mi talem.

¹⁰ Eniwan wea yufala fogivim hem, mi tu mi fogivim hem. An sapos hemi duim samting wea mi save fogivim hem, oraet mi fogivim hem long ae blong Kraes, bikos mi laek fo helpem yufala.

¹¹ Long wei ya, Seitan bae hemi no save garem paoa ovarem yumi, bikos yumi save finis long olketa nogud plan blong hem.

Waka long Troas

¹² Taem mi bin kasem Troas fo talemaot Gudnius abaotem Kraes, Masta hemi helpem mifala fo duim plande gudfala waka.

¹³ Bat mi barava wari fogud, bikos mi no faendem fren blong mi Taetas. So mi gudbae long olketa pipol ya, an mi go olowe long Masedonia nao.

Kraes hemi win finis

¹⁴ !Bat mifala talem tengkiu tumas long God! Bikos hemi olsem hem nao lidim mifala long maas blong King wea Kraes nao winim faet. God hemi yusim mifala fo mekem disfala save abaotem Kraes fo go kasem evri ples, olsem insens wea hemi smel naes tumas.

¹⁵ Mifala olsem insens wea Kraes hemi bonem fo mekhae long God. An disfala smel hemi go kasem evriwan wea God hemi gohed fo sevem olketa, an evriwan wea olketa gohed fo lus from God.

¹⁶ Long olketa hu i gohed fo lus, disfala smel hemi smel nogud tumas an hemi tekem kam dae long olketa. Bat long olketa hu God hemi gohed fo sevem olketa, hemi smel naes tumas an hemi tekem kam laef long olketa. ?So watkaen man nao hemi fitim diskaen waka?

¹⁷ Mifala no olsem plande nara pipol wea olketa talemaot toktok blong God bikos olketa laek fo winim seleni. Nomoa. God nao hemi siusim mifala, an mifala toktru olowe long ae blong hem. Bikos mifala stap joen wetem Kraes, mifala talemaot toktok blong hem olsem wakaman blong God.