2 Korin 12 - Pijin Bible

Samfala samting God som long Pol

¹ Mi mas tokpraod moa, nomata hemi no save helpem yumi. Bae mi tokabaotem olketa spesol drim an olketa samting hemi staphaed wea Masta hemi somaot long mi nomoa.

² Mi save long wanfala man blong Kraes, wea God hemi tekem hem goap long heven wea hemi antap tumas. An distaem hemi mekfotin yia nao bihaen long diswan. Mi no barava save sapos diswan hemi barava hapen o hemi drim nomoa, God nomoa hemi save.

^3-4 An disfala man ya, God hemi tekem hem goap long barava paradaes nao, wea hemi herem olketa samting wea hemi no fit fo talem an hemi tambu tumas tu fo man hemi stori abaotem. Bat mi no barava save sapos diswan hemi hapen o hemi drim nomoa, God nomoa hemi save.

⁵ So bae mi tokpraod long wanem hemi hapen long disfala man. Bat long wei blong mi seleva, bae mi tokpraod nomoa long olketa samting wea hemi somaot dat mi wikfala man nomoa.

⁶ Nomata mi tokpraod moa abaotem olketa drim, mi no krangge man ya, bikos bae mi save talem olketa tru samting nomoa. Bat bae mi no duim, bikos mi no laekem eniwan fo tinghae tumas long mi. Hemi fitim fo yufala tingabaotem mi nomoa, falom wanem mi bin talemaot an wanem mi bin duim.

⁷ Nao wanfala samting hemi kasem mi wea hemi olsem wanfala nogud nila long bodi blong mi. Diswan hemi mekem mi no kamap praod tumas from olketa bikfala samting wea hemi staphaed dat God hemi somaot long mi. An diswan hemi olsem wanfala enjel blong Seitan hemi mekem mi safa.

⁸ Trifala taem nao mi bin prea long Masta fo tekemaot disfala nogud samting from mi.

⁹ Bat Masta hemi sei, “Kaenfala lav blong mi nomoa, hem nao samting yu mas garem. Bikos paoa blong mi hemi save soaot strong taem yu stap wik nomoa.” So mi hapi tumas fo tokpraod long olketa samting wea hemi somaot dat mi wikfala man, mekem paoa blong Kraes hemi stap wetem mi.

¹⁰ So long disfala waka blong Kraes, nomata mi stap wik an pipol toknogud long mi an olketa hadtaem kasem mi an olketa pipol mekem mi safa, mi save hapi nomoa long diswan. Bikos taem mi wik tumas, long taem ya nao mi barava garem paoa.

Pol hemi wari long olketa long Korin

¹¹ Mi tok olsem wanfala krangge man nao, bat yufala stap kuaet nomoa, so mi seleva mi mas tok olsem. Hemi fitim fo yufala nao tokabaotem gudfala waka blong mi. Bikos mi no tingim dat mi samting nating an olketa wea yufala kolem olketa nambawan aposol i gudfala winim mi.

¹² Mi gohed fo waka nomoa wetem yufala taem mi mekem olketa saen an olketa mirakol fo somaot dat mi barava aposol.

¹³ Mi bin helpem yufala barava olsem mi helpem olketa nara sios. Bat wanfala samting nomoa mi no duim long yufala, mi no bin talem yufala fo helpem mi long seleni. Sapos yufala tingse mi bin duim rong samting long diswan, yufala mas fogivim mi.

¹⁴ Distaem mi redi fo go kasem yufala long mektri taem nao, bat mi no askem enisamting from yufala. Yufala seleva nao mi laekem, mi no laekem enisamting wea yufala garem. Yufala save, olketa pikinini olketa no save lukaftarem mami an dadi, bat mami an dadi nao save lukaftarem olketa pikinini.

¹⁵ Mi hapi tumas fo yusim evrisamting mi garem fo helpem yufala. Nomata laef blong mi tu, mi letem fo helpem yufala. ?So waswe, bikos mi lavem yufala bik tumas, bae yufala lavem mi lelebet nomoa?

¹⁶ Ating yufala save nomoa dat mi no bin tekem enisamting from yufala. Bat maet samwan hemi sei mi laea an mi trikim yufala nomoa.

¹⁷ ?Hao nao ya? ?Yufala tingse mi bin ravem yufala long olketa man wea mi bin sendem go long yufala?

¹⁸ Mi bin askem Taetas fo hemi go long yufala, an mi bin sendem go nara Kristin brata tu wetem hem. ?Waswe, yufala tingse Taetas nao hemi ravem yufala? !Yufala mas save, mitufala Taetas garem wanfala tingting nomoa an mitufala falom semkaen wei long waka nomoa!

¹⁹ Maet yufala tingse mifala raetem olketa samting ya fo somaot dat mifala no duim enisamting rong. !Nomoa ya! Mifala talem olketa samting long wei wea Kraes hemi laekem mifala fo duim long ae blong God. Olketa fren, evrisamting wea mifala bin raetem, mifala raetem fo strongim biliv blong yufala.

²⁰ Mi wari fo go kasem yufala, nogud laef blong yufala i deferen from wanem mi laek lukim long yufala. Sapos olsem, bae mi tu mi deferen from wanem yufala laekem. Mi fraet, nogud yufala gohed fo raoa an joles an kros kuiktaem an tingting long yufala seleva nomoa. An nogud yufala suea long nara man an stori nogud abaotem nara pipol, an nogud yufala praod an evrisamting hemi olobaot nomoa.

²¹ Taem bae mi kasem yufala, mi fraet, nogud God blong mi hemi mekem mi filsem long wanem yufala duim. Nogud plande pipol hu i bin stap long wei blong sin, olketa no laek fo sensim yet doti wei blong olketa wea olketa olobaot tumas an durong wetem eniwan. Sapos olsem, bae mi sore an krae long olketa ya.