2 Korin 10 - Pijin Bible

Pol hemi barava aposol

¹ Samfala man sei mi hambol tumas taem mi stap wetem yufala an mi save raf nomoa taem mi stap farawe from yufala. Nao Kraes hemi kaen an hemi no raf,

² an long sem wei, mi askem strong long yufala olsem, yufala mas no mekem mi fo raf long yufala taem mi kam kasem yufala. Bat bae mi raf long olketa hu i sei mifala duim nomoa olketa samting falom tingting blong wol.

³ Mifala stap long disfala wol, bat mifala no falom tingting blong wol long faet blong mifala.

⁴ Olketa wepon wea mifala yusim, hemi no blong disfala wol. Nomoa. Bat mifala yusim olketa wepon wea i garem paoa blong God fo spoelem olketa strong ples blong enemi.

⁵ So mifala save spoelem enikaen tingting wea hemi no tru. An mifala save brekemdaon enikaen praod tingting wea i agensim disfala tru save abaotem God. An hemi olsem mifala kasholem evri tingting blong pipol, an helpem olketa fo falom tingting blong Kraes.

⁶ An taem yufala somaot dat yufala barava obeim hem, bae mifala redi fo panisim eniwan hu hemi no laek fo obei.

⁷ Yufala ya, yufala lukim wanem hemi lukgud long aotsaet nomoa. Eniwan hu hemi talemaot dat hem nao hemi man blong Kraes, hemi mas tingting gud moa bikos mifala tu blong Kraes olsem disfala man.

⁸ Masta hemi givim mifala paoa fo strongim biliv blong yufala, an hemi no fo daonem yufala. An nomata mi tokpraod lelebet abaotem disfala paoa, mi no save filsem long diswan.

⁹ Nao mi no laekem yufala fo tingse mi trae fo mekem yufala fraet taem yufala ridim olketa leta blong mi.

¹⁰ Maet wanfala man hemi sei, “Pol ya, olketa leta blong hem olketa garem strongfala toktok tumas ya. Bat taem hemi stap wetem yumi, hemi barava wik nomoa an olketa toktok blong hem samting nating nomoa.”

¹¹ Man hemi tok olsem, hemi mas savegud dat wanem mifala raetem long olketa leta ya taem mifala stap farawe, an wanem mifala duim taem mifala stap wetem yufala, tufala semsem nomoa.

¹² Nao olketa pipol hu i tinghae tumas long olketa seleva, mifala no laek fo sei mifala wankaen wetem olketa o mifala gudfala winim olketa. Nomoa. Bat olketa falom tingting blong olketa seleva taem olketa skelem wei blong olketa seleva. !Olketa krangge tumas ya!

¹³ Bat mifala tokpraod nomoa long olketa samting wea hemi fit. Mifala tokpraod long waka wea God hemi givim long mifala, an waka ya hemi fo yufala tu.

¹⁴ Sapos mifala no bin kasem yufala, hemi minim mifala tokpraod tumas nao. Bat nomoa. Mifala barava go kasem ples blong yufala wetem disfala Gudnius abaotem Kraes.

¹⁵ An i no wei blong mifala fo tokpraod abaotem waka wea olketa nara pipol nao bin duim. Nomoa. Mifala barava laekem biliv blong yufala fo hemi grou, mekem waka blong mifala long yufala hemi bikfala moa.

¹⁶ An bihaen long diswan, bae mifala save go talemaot Gudnius long olketa kantri narasaet go long yufala. Long disfala wei, bae mifala no wari fo tokpraod abaotem waka wea olketa nara pipol bin duim long eria blong olketa.

¹⁷ Buktambu hemi sei, “Man hu hemi praod, hemi mas praod nomoa long wanem Masta hemi duim.”

¹⁸ Man wea Masta hemi tinghae long hem, hem nao God hemi laekem, i no man wea hemi tinghae long hem seleva.