2 Kings 24 - Pijin Bible

¹ Long taem wea Jehoeakim hemi king yet long Jiuda, King Nebukadnesa blong Babilonia hemi kam faet fo tekova long Jiuda. Den King Nebukadnesa hemi fosim Jehoeakim fo kamap olsem wakaman blong hem. Bat bihaen long mektri yia, King Jehoeakim hemi agensim Nebukadnesa.

² Nao Yawe hemi sendem ami blong Babilonia, an ami blong Siria, an ami blong Moab, an ami blong Amon fo go faetem King Jehoeakim. Olketa ami ya i kam fo spoelem Jiuda falom Mesij blong Yawe wea olketa profet blong hem i bin talem bifoa.

³ Olketa samting i kamap long pipol blong Jiuda falom toktok blong Yawe. Hemi mekem olketa goawe from hem, bikos King Manase hemi bin duim olketa ravis samting bifoa.

⁴ Hemi bin kilim dae plande pipol wea i no duim eni rong samting. Hemi bin kilim dae plande pipol olsem long Jerusalem, an Yawe hemi no save fogivim disfala sin ya.

⁵ Olketa narafala samting wea King Jehoeakim hemi duim, olketa raetemdaon long Buk Abaotem Olketa Samting Olketa King blong Jiuda i Duim.

⁶ Taem hemi dae, san blong hem Jehoeakin, hemi sensim hem fo kamap king.

⁷ Nao long datfala taem, king blong Ijip wetem ami blong hem i no save kamaot moa from Ijip fo faet, bikos king blong Babilonia hemi tekova long olketa lan wea king blong Ijip hemi holem fastaem, stat long smolfala wata long spialaen long lan blong Ijip, go kasem Yufretis Riva long not.

King Jehoeakin blong Jiuda

⁸ Long taem wea Jehoeakin hemi kamap king long Jiuda, hemi kasem eitin yia. An hemi king long Jerusalem fo trifala mans nomoa. An mami blong hem Nehusta hu hemi dota blong Elnatan, blong Jerusalem.

⁹ King ya hemi duim olketa nogud samting long ae blong Yawe, olsem dadi blong hem.

¹⁰ Long datfala taem, ami blong King Nebukadnesa i kam hipap raonem Jerusalem fo faet long hem.

¹¹ Nao King Nebukadnesa tu hemi kam long taon ya taem ami blong hemi i satem hem.

¹² Den King Jehoeakin wetem mami blong hem, an olketa wakaman blong hem, an olketa komanda blong hem, an olketa bikman blong hem i sarenda long king ya. Long mekeit yia wea King Nebukadnesa hemi king long Babilonia, hemi tekem King Jehoeakin an putum hem long prisin.

¹³ Hemi tekem evri gudfala samting wea i stap long Tambuhaos blong Yawe, an long haos blong king. An olketa karim go evri gol samting wea King Solomon hemi bin wakem bifoa fo yusim long Tambuhaos. Evrisamting hemi hapen barava olsem wea Yawe hemi bin talem bifoa.

¹⁴ An hemi fosim evriwan fo lusim Jerusalem. Olketa fosim aot olketa bikman an olketa komanda, an olketa wakaman hu i save duim waka long aean an long timba. Olketa evriwan i kasem olsem 10,000 pipol. Hemi lusim nomoa olketa pua pipol, olketa nao stap long lan blong Jiuda.

¹⁵ King Nebukadnesa hemi tekem King Jehoeakin wetem mami blong hem, an olketa waef blong hem, an olketa bikman blong haos blong hem, an olketa lida blong Jiuda. Hemi tekem olketa ya go long biktaon long Babilon.

¹⁶ An hemi tekem tu evriwan blong ami blong Jerusalem, hem nao 7,000 soldia wea fit fo faet, an 1,000 wakaman wea i save duim waka long aean.

¹⁷ An Nebukadnesa hemi mekem Matanaea, wanfala angkol blong King Jehoeakin, fo kamap king long Jiuda. Den hemi sensim nem blong hem, nao hemi kolem hem King Sedekaea.

King Sedekaea blong Jiuda

¹⁸ Long taem wea King Sedekaea hemi kamap king long Jiuda, hemi kasem tuentifala yia. An hemi king long Jerusalem fo levenfala yia. An mami blong hem hemi Hamutal hu hemi dota blong Jeremaea, an hemi blong taon long Libna.

¹⁹ King ya hemi duim olketa nogud samting long ae blong Yawe, olsem wea King Jehoeakim hemi bin duim.

²⁰ Nao bikos Yawe hemi kros tumas long pipol blong Jerusalem an olketa narafala pipol blong Jiuda, go-go-go hemi raosim olketa, mekem olketa no stap wetem hem. Oraet, King Sedekaea hemi agensim king blong Babilonia.