2 Kings 15 - Pijin Bible

King Asaraea blong Jiuda

¹ Long mektuenti-seven yia wea disfala mektu King Jeroboam hemi king long Israel, Asaraea, san blong King Amasaea, hemi kamap king long Jiuda.

² Long datfala taem, hemi kasem sikstin yia. An hemi king long Jerusalem fo fifti-tu yia. Mami blong hem hemi Jekolaea hu hemi woman blong Jerusalem.

³ King ya hemi falom wei blong dadi blong hem, so hemi gohed fo duim olketa samting wea i stret long ae blong Yawe.

⁴ Nomata olsem, hemi no aotem olketa tambuples fo wosipim olketa narafala god, an olketa pipol gohed fo mekem sakrifaes an bonem insens long olketa tambuples ya.

⁵ Nao Yawe hemi mekem wanfala ravis sik blong skin fo kasem king ya, so go kasem taem hemi dae hemi go stap seleva long wanfala haos. An hemi mekem san blong hem, Jotam nao hemi lukaftarem haos blong king, an lidim gavman long Jiuda.

⁶ Olketa narafala samting wea King Asaraea hemi duim, olketa raetemdaon long Buk Abaotem Olketa Samting Olketa King blong Jiuda i Duim.

⁷ Taem hemi dae, olketa berem hem kolsap long beregraon blong olketa olfala king long Biktaon blong King Deved. An san blong hem Jotam nao hemi sensim hem fo kamap king.

King Sekaraea blong Israel

⁸ Long mekteti-eit yia wea King Asaraea hemi king long Jiuda, Sekaraea, san blong King Jeroboam, hemi kamap king long Israel. An hemi king long Samaria fo siks mans.

⁹ Bat hem tu hemi duim olketa nogud samting long ae blong Yawe olsem olketa olo blong hem i duim bifoa. Hemi no lusim ravis wei blong King Jeroboam, san blong Nebat, wea bifoa hemi bin mekem pipol blong Israel fo sin.

¹⁰ Nao Salum, san blong Jabes, hemi mekem plan fo kilim dae King Sekaraea, so hemi kilim hem dae long Ibleam, an hemi sensim hem fo kamap king.

¹¹ Olketa narafala samting wea King Sekaraea hemi duim, olketa raetemdaon long Buk Abaotem Olketa Samting Olketa King blong Israel i Duim.

¹² So long disfala wei, Mesij blong Yawe hemi bin talem long King Jehu bifoa hemi kam tru. Hemi bin sei, “Mi promisim yu olsem, olketa long laen blong yu long fofala jeneresin bae i kamap king blong Israel.”

King Salum blong Israel

¹³ Long mekteti-naen yia wea King Yusaea hemi king long Jiuda, Salum, san blong Jabes, hemi kamap king long Israel. Hemi king long Samaria fo wanfala mans nomoa.

¹⁴ Long datfala taem, Menahem, san blong Gadi, hemi lusim taon long Tiasa fo kam long Samaria. Den hemi kilim dae King Salum, an hemi sensim hem fo kamap king.

¹⁵ Olketa narafala samting wea King Salum hemi duim, an disfala stori long ravis plan blong hem fo kilim dae King Sekaraea, olketa raetemdaon long Buk Abaotem Olketa Samting Olketa King blong Israel i Duim.

¹⁶ Long datfala taem, Menahem hemi faetem pipol blong taon long Tifsa. Hemi spoelem taon ya an olketa ples raonem hem, bikos olketa no letem hem fo kam insaet long taon. An hemi stilim olketa samting long taon ya, an hemi spoelem olketa woman blong taon wea i babule, hemi yusim naef fo faet katem open bele blong olketa woman ya.

King Menahem blong Israel

¹⁷ Long mekteti-naen yia wea King Asaraea hemi king long Jiuda, Menahem, san blong Gadi, hemi kamap king long Israel. Hemi king long Samaria fo tenfala yia.

¹⁸ Bat hem tu hemi duim olketa nogud samting long ae blong Yawe. Oltaem long taem wea hemi king, hemi gohed fo duim olketa nogud samting long ae blong Yawe bikos hemi no lusim ravis wei blong King Jeroboam, san blong Nebat, wea bifoa hemi bin mekem pipol blong Israel fo sin.

¹⁹ Long datfala taem, King Pul blong Asiria hemi kam long Israel fo faetem olketa. Bat King Menahem givim 34,000 kilo long silva long King Pul fo letem Menahem gohed fo rul ovarem pipol blong Israel.

²⁰ King Menahem hemi bin fosim olketa risman long Israel fo givim silva seleni long hem fo peim King Pul. Olketa evriwan i bin givim samting olsem 600 gram silva. An taem King Pul hemi tekem seleni ya, hemi gobaek long kantri blong hem.

²¹ Olketa narafala samting wea King Menahem hemi duim, olketa raetemdaon long Buk Abaotem Olketa Samting Olketa King blong Israel i Duim.

²² An taem hemi dae, olketa berem hem long beregraon blong olketa olo blong hem, an san blong hem, Pekahaea nao hemi sensim hem fo kamap king.

King Pekahaea blong Israel

²³ Long mekfifti yia wea King Asaraea hemi king long Jiuda, Pekahaea, san blong King Menahem, hemi kamap king blong Israel. Hemi king long Samaria fo tufala yia.

²⁴ Bat hem tu hemi gohed fo duim olketa nogud samting long ae blong Yawe bikos hemi no lusim ravis wei blong King Jeroboam san blong Nebat, wea bifoa hemi bin mekem pipol blong Israel fo sin.

²⁵ Wanfala komanda long ami blong hem hemi Peka, san blong Remalaea. Nao hemi mekem plan fo kilim dae King Pekahaea. So hemi tekem fifti man blong Gilead, an olketa kam kilim hem dae insaet long strongfala sefples long haos blong king long Samaria. An olketa kilim dae tu Agob an Arie. So Peka hemi kamap king.

²⁶ Olketa narafala samting wea King Pekahaea hemi duim, olketa raetemdaon long Buk Abaotem Olketa Samting Olketa King blong Israel i Duim.

King Peka blong Israel

²⁷ Nao long mekfifiti tu yia wea King Asaraea hemi king long Jiuda, Peka, san blong Remalaea, hemi kamap king long Israel. An hemi king long Samaria fo tuenti yia.

²⁸ Bat hem tu hemi gohed fo duim olketa nogud samting long ae blong Yawe bikos hemi no lusim ravis wei blong King Jeroboam san blong Nebat, wea bifoa hemi bin mekem pipol blong Israel fo sin.

²⁹ Long datfala taem, King Tiglat-Pilesa blong Asiria hemi kam fo faet long Israel. Hemi winim olketa taon long Ijon, an Abel-Bet-Maaka, an Janoa, an Kedes, an Hasoa, an olketa vilij blong tufala eria blong Gilead an Galili, an long distrik long Naftali. Hemi tekova long olketa ples ya, an hemi fosim olketa pipol fo go long Asiria.

³⁰ Long mektuenti yia wea King Jotam, san blong King Asaraea, hemi king long Jiuda, Hosea, san blong Ela, hemi mekem plan fo kilim King Peka. So hemi kam faetem an kilim hem dae. Den hemi sensim hem fo kamap king.

³¹ Olketa narafala samting wea King Peka hemi duim, olketa raetemdaon long Buk Abaotem Olketa Samting Olketa King blong Israel i Duim.

King Jotam blong Jiuda

³² Long mektu yia wea King Peka, san blong Remalaea, hemi king long Israel, Jotam, san blong King Yusaea, hemi kamap king long Jiuda.

³³ Long datfala taem, hemi kasem tuenti-faev yia. An hemi king long Jerusalem fo sikstin yia. Mami blong hem hemi Jerusa hu hemi dota blong Sadok.

³⁴ King Jotam hemi gohed fo duim olketa samting wea i stret long ae blong Yawe barava olsem wea dadi blong hem hemi bin duim.

³⁵ Hemi wakembaek gudfala disfala geit long saet long not long open eria blong Tambuhaos blong Yawe. Bat olketa tambuples fo wosipim olketa narafala god i stap nomoa, an olketa pipol i gohed fo mekem sakrifaes an bonem insens long olketa tambuples ya.

^36-37 Long datfala taem, Yawe hemi sendem King Resin blong Siria an King Peka blong Israel wetem ami blong tufala fo go faet agensim pipol blong Jiuda. Olketa narafala samting wea King Jotam hemi duim, olketa raetemdaon long Buk Abaotem Olketa Samting Olketa King blong Jiuda i Duim.

³⁸ Taem hemi dae, olketa berem hem long beregraon blong olketa olfala king long Biktaon blong King Deved. An san blong hem Ehas, hemi sensim hem fo kamap king.