2 Kings 13 - Pijin Bible

King Jehoahas blong Israel

¹ Long mektuenti-tri yia wea King Joas, san blong King Ahasaea, hemi king long Jiuda, Jehoahas, san blong King Jehu, hemi kamap king long Israel. Hemi king long Samaria fo seventin yia.

² King ya tu hemi gohed fo duim olketa nogud samting long ae blong Yawe bikos hemi barava falom ravis wei blong King Jeroboam, san blong Nebat, wea bifoa hemi bin mekem pipol blong Israel fo sin.

³ So Yawe hemi kros long olketa, an fo lelebet longtaem hemi letem King Hasael blong Siria fo kontrolem olketa, an bihaen long Hasael, san blong hem King Ben-Hadad hemi kontrolem Israel tu.

⁴ Nao King Jehoahas hemi prea go long Yawe mekem hem helpem olketa. Yawe hemi herem prea blong hem bikos hemi luksave dat king blong Siria hemi barava spoelem pipol blong Israel.

⁵ So Yawe hemi givim wanfala lida long olketa fo sevem olketa from paoa blong olketa blong Siria. Go-go olketa stapgud long olketa ples blong olketa moa olsem bifoa.

⁶ Bat olketa no lusim ravis wei blong laen blong King Jeroboam wea bifoa hemi bin mekem pipol blong Israel fo sin, an olketa letem tambu kaving blong woman god ya Asera fo stap yet long Samaria.

⁷ Long datfala taem, King Jehoahas hemi no garem plande man fo faet, bikos king blong Siria hemi bin spoelem an kilim olketa dae. Hemi garem nomoa fifti soldia wea i raed long hos, an tenfala kaat fo faet, an 10,000 soldia.

⁸ Olketa narafala samting wea King Jehoahas hemi duim, wetem olketa bikfala samting wea hemi mekem long taem fo faet, olketa raetemdaon long Buk Abaotem Olketa Samting Olketa King blong Israel i Duim.

⁹ An taem hemi dae, olketa berem hem long Samaria, an san blong hem Jehoas hemi sensim hem fo kamap king.

King Jehoas blong Israel

¹⁰ Long mekteti-seven yia wea King Joas hemi king long Jiuda, Jehoas, san blong King Jehoahas, hemi kamap king long Israel. Hemi king long Samaria fo sikstin yia.

¹¹ Bat hem tu hemi gohed fo duim olketa nogud samting long ae blong Yawe bikos hemi no lusim ravis wei blong King Jeroboam, san blong Nebat, wea bifoa hemi bin mekem pipol blong Israel fo sin.

¹² Olketa narafala samting wea King Jehoas hemi duim, wetem olketa bikfala samting wea hemi duim long faet agensim King Amasaea blong Jiuda, olketa raetemdaon long Buk Abaotem Olketa Samting Olketa King blong Israel i Duim.

¹³ Taem hemi dae, olketa berem hem long Samaria, long beregraon blong olketa olo blong hem, an san blong hem Jeroboam hemi sensim hem fo kamap king.

Profet Elaesa hemi dae

¹⁴ Bifoa King Jehoas hemi dae, Profet Elaesa hemi sik tumas an hemi kolsap dae. Nao King Jehoas hemi kam visitim hem, hemi krae fo hem. Hemi krae olsem, “!Fata blong mi! !Fata blong mi! !Yu nao yu olsem kaat fo faet an olketa man i raed long olketa hos blong Israel.”

¹⁵ Den Elaesa hemi tok olsem long hem, “Yu go tekem kam bou wetem olketa aro.” So hemi go tekem kam.

¹⁶ Elaesa hemi talem hem fo holem bou. King hemi duim olsem, an Elaesa hemi putum han blong hem long han blong king.

¹⁷ Den Elaesa hemi sei long hem, “Yu go openem windo long saet long ist.” So king hemi go openem. An hemi tok moa olsem long king, “Oraet, yu sut.” So King hemi sut. Nao Elaesa hemi kolaot bikfala olsem, “!Yu aro blong Yawe! !Bae hemi yusim yu fo winim pipol blong Siria! Bae yu barava winim olketa blong Siria long faet long Afek.”

¹⁸ Den profet hemi tok olsem long hem, “Yu tekem olketa narafala aro, an yu hitim graon.” So king hemi tekem olketa aro ya, an hemi hitim graon trifala taem, an hemi stop.

¹⁹ Bat samting ya hemi mekem man blong God fo kros, so hemi tok olsem long hem, “Sapos yu bin hitim graon ya faefala o siksfala taem, bae yu save barava winim olketa finis, bat hemi luk olsem bae yu winim olketa trifala taem nomoa.”

²⁰ Nao Elaesa hemi dae, an olketa berem hem. Evri yia long taem fo plantem kaikai, olketa grup long soldia blong Moab i kam long Israel fo stilim olketa samting.

²¹ Wanfala taem, samfala pipol blong Israel i karim wanfala bodi fo go berem hem. Den olketa lukim wanfala grup blong soldia blong Moab i kam, so olketa torowem bodi nomoa go insaet long grev wea olketa bin putum bodi blong Profet Elaesa long hem bifoa. Bat wea, taem bodi ya hemi kasem olketa bon blong Elaesa ya, man ya hemi laefbaek moa, an hemi stanap.

Pipol blong Israel i faetem pipol blong Siria

²² Long taem wea King Jehoahas hemi king long Israel, King Hasael blong Siria hemi gohed fo spoelem olketa olowe.

²³ Bat Yawe hemi kaen an hemi sore long olketa, so hemi no letem ami blong Siria fo kam barava spoelem olketa finis. Oltaem hemi helpem olketa bikos hemi bin mekem spesol agrimen wetem Ebraham, an Aesak, an Jekob bifoa. An hemi no raosim olketa, mekem olketa stap farawe long hem.

²⁴ Taem King Hasael hemi dae, san blong hem, Ben-Hadad, hemi sensim hem fo kamap king long Siria.

²⁵ Den King Jehoas hemi go faetem Ben-Hadad trifala taem. An hemi winim hem long trifala faet ya, an hemi tekembaek olketa taon wea Hasael hemi bin tekemaot from dadi blong hem, King Jehoahas.