2 Jon 1 - Pijin Bible

¹ Mi lida long sios, mi raet go long yu gudfala woman wetem olketa pikinini blong yu. Mi lavem yufala tumas. Hemi no mi seleva nomoa, bat evriwan hu i save long tru toktok nao, olketa lavem yufala.

² Ya, mifala lavem yufala bikos disfala tru toktok hemi stap long yumi evriwan an bae hemi stap wetem yumi olowe.

³ Taem yumi save long wei blong tru toktok an wei blong lav, God Dadi blong yumi wetem Jisas Kraes San blong hem, tufala bae kaen tumas long yumi an sore long yumi an bae tufala mekem yumi fo stap long piis.

Tising blong Kraes

⁴ Mi hapi fogud taem mi herem dat samfala long olketa pikinini blong yu i gohed fo falom tru toktok, olsem wea God Dadi blong yumi hemi bin talem yumi fo duim.

⁵ Gudfala woman, mi wande talem yu dat yumi mas lavem yumi evriwan. Disfala lo hemi no niufala lo wea mi raetem fo yufala. Nomoa. Stat kam bifoa, yumi save finis long diswan.

⁶ An disfala lav, hemi minim wea yumi mas gohed olowe fo obeim olketa lo blong God. An disfala lo blong hem, hemi olsem yufala herem finis taem yufala stat fo biliv, wea yufala mas stap long wei blong lav.

⁷ Plande pipol hu i gohed fo laea, i bin goraon long evri ples finis. Olketa man ya i no biliv dat Jisas Kraes hemi bon kam wetem bodi olsem yumi. Eniwan olsem, hemi man fo laea an hemi enemi blong Kraes.

⁸ So yufala mas lukaot, nogud yufala lusim olketa samting wea mifala hadwaka fo hem. Moabeta yufala tekem evrisamting wea God hemi redim fo yufala.

⁹ Eniwan hu hemi no falom tising blong Kraes bat hemi adem go enikaen samting moa long disfala tising, God no save stap wetem hem ya. Bat eniwan hu hemi gohed strong fo falom tising blong Kraes, God Dadi wetem San blong hem bae tufala stap wetem hem.

¹⁰ So sapos eni tisa hemi kam long yufala an hemi no falom disfala tising blong Kraes, yufala mas no tekem hem go long haos blong yufala. An nomata fo welkamem hem, yufala mas no duim tu.

¹¹ Bikos eniwan hu hemi welkamem man olsem, hemi somaot dat hemi joen wetem datfala man long olketa ravis waka hemi duim.

Las toktok

¹² Mi garem plande samting fo talem go long yufala, bat mi no wande raetem long disfala leta. Mi laekem tumas fo kam long yufala an fo stori gud wetem yufala, mekem yumi save hapi tumas.

¹³ Olketa pikinini blong gudfala sista blong yu, i talem halo go long yufala.