1 Samuel 5 - Pijin Bible

Trabol kasem pipol blong Filistia

¹ Taem olketa blong Filistia i holem Tambu Boks blong God, olketa karimaot from Ebeneser an olketa tekem go long taon long Asdod.

² Den olketa go putum insaet long tambuhaos blong wanfala god blong olketa wea nem blong hem nao Dagon. Olketa putum go kolsap long ston tambu kaving blong Dagon.

³ Long eli moning long neks de, olketa pipol blong Asdod i go long tambuhaos blong god ya, bat wea tambu kaving blong Dagon hemi foldaon. Nao fes blong disfala tambu kaving hemi godaon long graon long frant long Tambu Boks blong Yawe. Olketa liftimap tambu kaving ya, an olketa putum gudfala moa long ples blong hem.

⁴ An long neks de long eli moning, olketa lukim dat tambu kaving ya hemi foldaon moa long frant long Tambu Boks. Bat hed an tufala han blong tambu kaving i brek, an trifala pisis ya i stap olobaot long doa blong tambuhaos. Bodi blong kaving nomoa hemi stap seleva.

⁵ Dastawe, kam kasem tude, olketa prist blong god ya wetem olketa pipol blong Asdod wea i kam fo wosip; olketa no save step long ples long doa ya, olketa save goraon nao.

⁶ Long datfala taem, Yawe hemi spoelem olketa pipol long Asdod wetem olketa pipol long olketa ples raonem hem, an mekem olketa garem olketa boela wea i gohed fo suelap long bodi blong olketa.

⁷ Taem olketa pipol blong Asdod i lukim samting ya, olketa tok olsem, “God blong Israel hemi mekem trabol fo kasem yumi an god blong yumi Dagon. Olsem, yumi mas lusim Tambu Boks.”

⁸ So olketa sendem samfala man fo go kolem faefala sif blong olketa fo hipap tugeta. Den olketa askem olketa sif ya olsem, “?Wanem nao bae yumi duim long disfala Tambu Boks blong God blong Israel?” Olketa sif ya i tok olsem, “Yufala tekemaot Tambu Boks from ples ya an karim go long taon long Gat.” So olketa karim go long Gat.

⁹ Bat taem olketa tekem go long taon ya, Yawe hemi mekful long olketa tu, nao olketa fraet fogud go-go olketa krangge nao, bikos hemi spoelem olketa wetem olketa boela wea i suelap long bodi blong olketa evriwan, nomata man hemi olo o yangfala.

¹⁰ So olketa sendem Tambu Boks ya go long Ekron, wea hemi wanfala taon moa blong Filistia. Taem olketa karim Tambu Boks ya go kasem Ekron, olketa man blong taon ya i gohed fo singaot olsem, “!Sei! Olketa tekem kam Tambu Boks blong Israel long ples blong yumi. !Ating olketa wande kilim yumi nao ya!”

¹¹ So olketa sendem samfala man fo go long olketa sif blong Filistia fo talem olketa olsem, “!Yufala tekemaot Tambu Boks ya an sendem gobaek long ples blong hem, mekem hemi no save kilim yumi evriwan!” Olketa pipol blong taon ya evriwan i barava fraet fogud bikos God hemi gohed fo spoelem olketa.

¹² Olketa hu i sik long olketa boela bat i no dae, olketa ka-krae go long olketa god blong olketa fo helpem olketa.